UMI MOOTOOLLA 20 - Qullaawa Maxaafa

SOORIYU OLANTO SAMAARIYA DOYISSITU

¹ Hatte yannara Sooriyu moote Benihadaadi olantosi baala mittowa gamba assi. Lowo faradonna faradi gaare afidhinota 32 mootoolla hale assi're mare, Samaariyu Katama doyisse amade ola fani.

² Hakkunni gedensaanni Benihadaadi katamaho noohuwa Israeelete mootewa Akiaabiwa manna soye, «Benihadaadi,

³ ‹Birrikkinna culkikki, meentikkinna jawaata oosokki anereeti› yiino» yii.

⁴ Akiaabino, «Mootichi'yara Benihadaadira, ‹Maahoyye, yoottota baxoommo› yiino yitine kullesi» yee dawari.

⁵ Benihadaadi soqqamaasine shiima yanna gedensaanni Benihadaadiwiinni sokka haadhe galagalte dagge Akiaabira, « ‹Birrakkinna culkakki, meentokkinna oosokki anera aatto gede sokka soommohe.

⁶ Xaano qole mootimmakkihanna ledokki gashshaano mine soqqe giddo nooha ayirrado uduunne baala xinqisiisse haadhe daggannoe gede ga'a tenne yannara bagadaano'ya soyemmo› yiino» yite kultusi.

⁷ Akiaabino gobbate geerra baala woshshe gamba asse, «Kuni manchi coye hasanni noota affini? Kunni albaanni meento'yanna ooso'ya, birra'yanna culka'ya eemmosi gede xa'meennae, maahoyye yoommo» yiinsa.

⁸ Geerrunna gamba yiino manni, «Isi yaannore mite yiteno kiirtooti. Maahoyyeno yitooti» yitusi.

⁹ Isino Benihadaadi soqqamaanora, «Mootete mootichi'yara, ‹Kunni albaanni yoottoere haa'roommo. Xa layinkimeeshsho yootto coye kayinni diadheemmo yiino› yitine kullesi» yiinsa. Soqqamaanono galagalte hadhe sokka mootete kultusi.

¹⁰ Benihadaadi, «Samaariyu Katami mitte mitte bushshu cu'mo nafa ikkinsakkinni mucuqqi assite guddanno olanto soya hoogummohero maganna shitoe!» yee wirri asse sokka soyi.

¹¹ Akiaabino soqqamaanote, «Benihadaadira, ‹Qeelittokkinni balaxxe mayira boo'natto?› yiinohe yitine kullesi» yiinsa.

¹² Benihadaadi halesi ikkitino mootoolla ledo dukkannansa giddo aganni hee'reenna, Akiaabi sokka iilliteennasi mannasi katama qasate qixxaawanno gede hajaji. Mannisino rahe kae darga darga amadi.

¹³ Hatte yanna giddo mittu himanaanchi Akiaabiwa daye, «Kaaliiqi, ‹Olantote batinye la'e waajjitooti! Ani techo insa qeelatto gede asseemmohe. Atino ani Kaaliiqa ikkoommota afatto› yiinohe» yiisi.

¹⁴ Akiaabino, «Olaho balaxe ayi fulannoyya?» yee xa'mi. Himanaanchuno, «Kaaliiqi, ‹Awuraajjuwate gashshooti giddo nooti aja olanto balaxxe albaanni fula dandiitanno› yiino» yiisi. Isino qole, «Ola ayi balaxe fanannoyya?» yee xa'mi. Himanaanchu daware, «Ati balaxxe fanatto» yiisi.

¹⁵ Kunnira Akiaabi awuraajjuwate gashshooti giddo noore 232 aja olanto woshshi. Hakkiinni aanche Israeelennita 7,000 olanto gamba assi.

¹⁶ Benihadaadinna halesi ikkitinori 32 mootoolla dukkannansara agge dimbite heedheenna barru taalootira Israeelete olanto gaadoho fultu.

¹⁷ Aja olantono balaxxe alba ikkite fultu. Hatte yannara Benihadaadi balaxe soyino qotaano galagalte higge, «Kuneeti mitte gaadu gaamo Samaariyunni fulte kawa higge dagganni no» yite kultusi.

¹⁸ Benihadaadino, «Olahono ikko araaraho dagginohano ikkiro, lubbotenni heedheennanni haadhine abbe» yii.

¹⁹ Israeelete olanto hoodete heedheenna, aja olanto alba ikkite fultu.

²⁰ Mittu mittunku illete xaadisiha shii. Sooriyootu xooqqanna Israeelootu shorritanni hoode hadhu. Benihadaadi kayinni farashsho gulufe shiima faradaasine ledo xooqe fuli.

²¹ Israeelete moote Akiaabino rahe diinu faradonna faradi gaarensa horri. Sooriyootano lowo geeshsha gawajje qeelle adhi.

²² Hatte yannara himanaanchu Akiaabiwa daye, «Sooriyu moote dagganno birrara galagale hige ola fanannona, atino xa galagalte qaera higge olanto seekkite qixxeessi'ri» yiisi.

SOORIYOOTU LAYINKIMEESHSHO ISRAEELE QASSARA DAGGU

²³ Hatte yannara Benihadaadira amaalaasinesi, «Israeelete maganna ilaalu magannaati. Qeeltinonkehuno kunniraati. Xawoho olammoommoro addintanni qeelleemmonsa.

²⁴ Kunnira xa, sajjiina lamenka halekki ikkitino mootoolla dirrisse, insa darga woloota wori.

²⁵ Albaanni gooffu olanto geeshshita wole qixxeessi. Faradonna faradi gaareno albite geeshshita qixxeessi. Hakkunni gedensaanni Israeeloota xawoho qanse qeelleemmo» yitusi. Benihadaadino mannisi yiinore macciishshe baxe yitino gede assi.

²⁶ Kunnira layinki birrara Benihadaadi olantosi gamba assi're Israeele qasara Afeeqi yinanni katama mari.

²⁷ Israeeleno lassante sinqenna bagado adhite olaho qixxaabbu. Insano 2 gaamo ikkite Sooriyootaho albaanni marte kunseentu. Israeelete olanto baatto wo'mitinotenni Sooriyu olanto ledo taashshinanni woyite, lamewa beenkoonnita shiima meu hoshsha labbanno.

²⁸ Himanaanchu Akiaabiwa daye, «Kaaliiqi, ‹Sooriyootu Kaaliiqi ilaalu aani maganooti ikkinnina xawu magano di"ikkino yitino daafira, tenne lowo geeshsha batidhino olanto angakkira sayise eemmohe. Atino ani Kaaliiqa ikkoommota afatto› yiino» yiisi.

²⁹ Sooriyootunna Israeele geeqantanni 7 barra wo'ma keeshshitu. Lamalki barra olama hanaffeenna Israeele hakko barranni 100,000 Sooriyoota shitu.

³⁰ Gattinorino xooqqe Afeeqi Katama e'u. Hakkiichono 27,000 ikkanno mannira aanaho katamu huxxi toe shee gudi. Benihadaadino xooqe katama mare mittu minira e"e holgeenni maaxami.

³¹ Ledosi gashshaano, «Israeelete mootoolla marartannoreeti yinanna macciishshinoommo. Kunnira miteekke gatisannoheha ikkannona, halloho xiddu uddano usudhine, goowaho siiwo xaaxi'ne Israeelete mootewa ha'noni?» yitu.

³² Hakkunni gedensaanni, halloho xiddu uddano usudhite, goowaho siiwo xaaxidhe moote Akiaabiwa marte, «Soqqamaanchikki Benihadaadi, ‹Ballo eeggatena lubbo'ya gatisie› yee soqqeenna dangoommo» yitusi. Akiaabino, «Isi xaano lubbotenni nooni? Hakkawoyiteetiro danchate; isi anera dirodiimmate» yee dawarinsa.

³³ Mannootuno dancha coye qolansara agadhite noo daafira, yiinota hakkawoyintenni hawulukki assite haadhe, «Halaalenko Benihadaadi atera rodooho» yitu. Akiaabino, «Maahoyyena martine anewa abbesi» yiinsa. Benihadaadino dayenna Akiaabi ledosi faradi gaaresi aana ofollanno gede assisi.

³⁴ Benihadaadino, «Anni'ya annikkiwiinni adhino katamma qoleemmohe. Anni'ya Samaariyaho assinte gede, atino Demaasiqote daddalu darga fa'na dandaatto» yiisi. Akiaabino, «E'neemmo sheemaatinni anino ate ha'ratto gede asseemmohe» yiisi. Kunni garinni Akiaabi ledosi sheemaate e"e ha'ranno gede assisi.

MITTU HIMANAANCHU AKIAABIRA KULINO HIMANA

³⁵ Shiima yanna gedensaanni, himanaanote giddonni mittu Kaaliiqi hajajino garinni mitto ledosi himanaancho, «Ganie» yii. Ku'u kayinni gana giwi.

³⁶ Kunnira hakku himanaanchi, «Kaaliiqi hajajo wonsha giwootto daafira, anewiinni hadhanni heedheennanni doobbiichu shaannohe» yiisi. Yiinonte gede isiwiinni baxxanni hee'reennanni doobbiichu fule shiisi.

³⁷ Hakkunni gedensaanni himanaanchu wolu manchiwa mare, «Ganie» yii. Hakku manchi lowo geeshsha gane madiissisi.

³⁸ Himanaanchuno anfannisikki gede alba hoccunni usudhe Israeelete moote agarara mare doogote gama uurri.

³⁹ Moote mulesiinni sa"anni hee'reenna, «Moote! Ani tenneetinkunni olu giddo noommo. Olantote giddonni mittu qafadino mancho haa're abbe, ‹Konne mancho agari. Bairo reyatto; woy kayinni 3,000 kinchu birra baatatto› yiinoe.

⁴⁰ Ani loosu bati'reennae ka'a kawa yaanna manchu fule baino» yii. Mooteno, «Ati umikki yootto coyi amadinohe daafira qorichishamatto» yiisi.

⁴¹ Himanaanchuno rahe alba fa'ni. Mooteno manchu himanaancho ikkinota afi.

⁴² Hakkunni gedensaanni himanaanchu, «Kaaliiqi, ‹Ani reyanno gede hajajoommoha gate ha'ranno gede assootto daafira, isi darga ati reyatto. Olantosino gatte hadhanno gede assootto daafira olantokkino gooffanno› yiino» yiisi.

⁴³ Moote Akiaabino hifatamanninna hanqanni qaesi Samaariya ha'ri.