UMI MOOTOOLLA 11 - Qullaawa Maxaafa

SELEMOONI KAALIIQIWIINNI FAFINO GARA

¹ Moote Selemooni wole gobba meento halchino daafira, Gibitsete moote beettono heedheenna, Hitootu, Moaabootu, Amoonootu, Edoomootunna Sidoonootu seenne lede adhi.

² Kaaliiqi Israeelete mannira, «Magannansa magansidhinanni gede assanno'nena, dagate seenne adhitinoonte!» yiinonsa. Selemooni kayinni Kaaliiqi hoolino daga giddonni adhino. Insa baxe higa hoogino.

³ Selemooni 700 mootete ilama ikkino seennenna 300 irkote meento adhino. Insano Selemooni Kaaliiqiwiinni xeerti'ranno gede assino.

⁴ Geedhimma lexxitanni hadhusi kiironni, wole maganna magansi'ranno gede assisi. Annisi Daawiti gede ikke Kaaliiqira diammanamino.

⁵ Astaarooti yinannita Sidoonootu magano tiyyi'nanniha Molooki yinanniha Amoonootu magano magansi'ri.

⁶ Kunni garinni Selemooni Kaaliiqi giwannoha busha coye assino. Annisi Daawiti gede ikke wo'mu wodanisinni Kaaliiqi hoode diha'rino.

⁷ Yerusaalamete soojjaatoonni noo gaari aana tiyyi'nanniha Moaabootu magano Kamooshinna Amoonootu magano Molooki magansi'nanni darga seekkino.

⁸ Qoleno wole gobbahu meentisi magannansara hixaana giidhannowanna kakkalo shiqishanno darga seekkino.

^9-10 Israeelete Magani Kaaliiqi 2 hige leellinosi. Qoleno wole maganna magansi'rannokki gedeno kulinosi. Selemooni kayinni isi yiino gede di"ikkino. Roorenka Kaaliiqiwiinni lede fafi; Kaaliiqino hanqinosi.

¹¹ Kunnira Kaaliiqi Selemooni, «Ane ledo eootto gondooro affanni heedhe diigoottohuranna hajajo'yano wonshoottokki daafira gashshoote atewiinni hoole soqqamaanokki giddonni mittoho aammoraati.

¹² Ikkollana yoommo coye annikki Daawiti daafira yee ati lubbotenni heedheenna ikkikkinni beettikki yannara asseemmo.

¹³ Beettikkiwiinni kayinni gashshoote gudise dihooleemmo. Annikki Daawitinna umi'yaha assi're doodhoommo Katami Yerusaalamennihu daafira yee mitte ga're anga gatiseemmosi» yii.

SELEMOONI DIINNA

¹⁴ Ikkollana Kaaliiqi Edoomi moote mininni Hadaadi yinanni mancho Selemooni aana ka"anno gede assi.

¹⁵ Alba Daawiti Edoomootu ledo olami waro, gaadaanni Iyoaabi reyino manna madaarara fulino widoonni Edoomi manna shee gudino.

¹⁶ Iyoaabinna Israeelete olanto Edoomi manna shite gudda geeshsha hakkiicho 6 agana keeshshitino.

¹⁷ Hatte yannara gattinori xooqqe Gibitse hadhinori Hadaadinna annisi mine soqqamannohu Edoomi manni shiimu callu gatino. Hakka waro Hadaadi shiimaho.

¹⁸ Insano Midiyaami gobbanni ka'e Faaraani yinanniwa hadhu. Hakkiicho hee'ranno mannino insa ledo karsami. Hakkunni gedensaanni baalunku mitteenni Gibitsete gobba hadhu. Hakkiichono Gibitsete moote ledo xaaddu. Isino Hadaadira baatto, galanno minenna itanno sagale uyisi.

¹⁹ Hadaadi moote Ferioonira elo ikki. Mooteno galtesi Xafineesi rodoo uyisi.

²⁰ Iseno Hadaadira Genubaati yinanniha labbaa beetto iltusi. Isono Feriooni galte haadhe mootete minira massiteenna mootete ooso ledo lophi.

²¹ Hadaadi Gibitsete hee're moote Daawitinna olantosi hajajaanchi Iyoaabi reyitinota macciishshe, «Galagale gobba'ya higeemmo gede assie» yee Ferioonira hasaawi.

²² Ferioonino, «Mayira ha'ratto? Gobbakki higate hedoottohu mayi xe"eennaheeti?» yee xa'misi. Hadaadino daware, «Xeinoeri mitturino dinona, ha'reemmo gedella agurie» yii. Hakkunni gedensaanni fule gobbasi ha'ri. Edoomi moote gede Hadaadino Israeelete mannira diina ikki.

²³ Qoleno Kaaliiqi Rezooni yinanniha Eliaada beetto Selemoonira diina assi. Rezooni Tsooba moote Hadaadiezeeri mootichisiwiinni fule bai.

²⁴ Isino ha're addi-fulootaho roorricha ikkino. Kuni coyi ikkinohu Daawiti Hadaadiezeeri qeele halesi ikkitinore Sooriyoota gudihu gedensaanniiti. Rezooni ledosire anga adhe Demaasiqo ha'reenna mannisi Sooriyaho moohisisi.

²⁵ Selemooni lubbotenni hee'ri geeshsha Hadaadinna Rezooni Israeelete diina ikkite lowo geeshsha qarra kalaqqinonsa.

KAALIIQI IYORBIAAMIRA UYINO HEXXO

²⁶ Wolu Selemooni aana kainohu Efireemi gobbara Tsereda yinanniwa ilaminohu Naabaaxi beetti Iyorbiaamiiti. Isino Selemoonira soqqamannoho. Tseerua yinanniti amasi gunnittete.

²⁷ Iyorbiaami Selemooni aana ka"anno gede faro faninosi coyi kunninni aane nooho: Selemooni Yerusaalamete soojjaatoonni boono wonshe taashshe, annisiha Daawiti Katami huxxano lede kaajjishi waro,

²⁸ Iyorbiaami jawaatanna ogeessa ikkinota afe, Minaasenna Efireemi ga're giddo wolqate looso loossannorira roorricha assinosi.

²⁹ Mitto barra Iyorbiaami Yerusaalametenni fule ha'ranni hee're katamaho gobbaanni, haaro uddano uddi'rinohunni Seelonni dayino himanaanchi Akiyanni xaadino.

³⁰ Akiyano uddi're noota haaro uddano fushshe tonaa lamewa daddari.

³¹ Hakkunni gedensaanni Iyorbiaamira, «Tonne hoccicho ati adhi. Israeelete Magani Kaaliiqino, ‹Gashshoote Selemooni anganni haa're 10 ga're atera eemmohe.

³² Soqqamaanchi'ya Daawitiranna wole Israeelete gobba baalate giddonni aneneete doodhoommohura Yerusaalamete Katami daafira yee mitte ga're angasi gatisoommosi.

³³ Hatto assoommohu Selemooni ane agure, Sidoonootu magano Astaarooti, Moaabootu magano Kamooshinna Amoonootu magano Milkoomi magansi'rino daafiraati. Qoleno annisi Daawiti gede ikke doogo'ya ha'ra giwino; seera'yanna hajajo'ya ayirrisa giwatenni sao assino.

³⁴ Ikkollana Selemooniwiinni gashshoote gudise dihooleemmo. Lubbotenni noo geeshsha gashshootu aana hee'ranno gede asseemmosi. Hatto asseemmohuno doodhoommohunna seera'yanna hajajo'ya agadhihu soqqamaanchi'ya Daawiti daafira yeeti.

³⁵ Gashshooteno Selemooni beetti anganni hoole 10 ga're atera eemmohe.

³⁶ Ikkollana magansi'nannie gede doodhoommohura Yerusaalamete Katamira soqqamaanchi'ya Daawitira caabbichu xoannosikki gede beettisira mitte ga're eemmosi.

³⁷ Iyorbiaami! Ani ate Israeelete moote asseemmohe. Hasi'rootto gobba baalate gashshaancho ikkatto.

³⁸ Soqqamaanchi'ya Daawiti gede wo'mu wodaninni hajajamittoero, seera'yanna hajajo'ya wonshittoro, ane albaanni halaale ikkino coye assittoro, ani wo'manka woyite ledokki hee'reemmo. Daawitira assummonte gede Israeelete moohatto gedenna oosokkino dargakki amadde gashshitanno gede asseemmo.

³⁹ Selemooni cubbira yee Daawiti sircho qorichisheemmo. Ikkollana hegere geeshsha diqorichisheemmo› yiino» yii.

⁴⁰ Selemooni Iyorbiaami shaara hasi'ri. Iyorbiaamino Gibitsete mootewa Shishaaqiwa xooqe, Selemooni reya geeshsha hakkiicho hee'ri.

SELEMOONI REYI

⁴¹ Selemooni assinohu wolu coyi baalu, loosino loosinna hayyosi baala dhaggesi amadino maxaafi giddo borreessineenna no.

⁴² Selemooni Yerusaalamete hee'ranni Israeele baalate 40 diro moohino.

⁴³ Hakkunni gedensaanni Selemooni annuwasinte gede reenna annisi Daawiti Katamira madaarroonnisi. Beettisi Roobiaami isi darga moohino.