UMI MOOTOOLLA 1 - Qullaawa Maxaafa

MOOTE DAAWITI GEEDHIMMASI YANNARA

¹ Moote Daawiti lowo geeshsha geedhino daafira soqqamaanosi qiida hoolate uddano duuntinosi. Ikkollana qiida dihooltinosi.

² Kunnira soqqamaasinesi, «Moote! Mulekki heedhe towattannoheta mitte seemo beetto hanse abbineenna ledokki galte qiida hooltannohe gede assinoyya?» yitu.

³ Hakkunni gedensaanni, Israeele baalate giddo xuma seemo beetto hassanni marte, Suneeminni Abishaagi yinanni beetto affe haadhe abbitusi.

⁴ Iseno lowo geeshsha xumate; mooteno ledosi heedhe towattusi. Ikkollana isi ise ledo siimu xaadooshshe diassino.

ADOONIYAASI MOOHARA HASI'RI

^5-6 Hattenne yannara, Daawitira Hagiiti iltinohu Abeseloomi maa'ni Adooniyaasi annisi Daawiti ye'e yee egenninosikki daafira, «Mooheemmo» yee kai. Kunnira, faradi gaarenna farado, qoleno albaanni hadhannore 50 manna qixxeessi'ri. Isi dana lowo geeshsha xumaho.

⁷ Konne coyeno Tseruya beetti Iyoaabinna qeesichu Abiyaataari ledo ma'lino. Insano hedosi garaho yite kaa'litusi.

⁸ Ikkollana qeesichu Saadooqi, Yoodahe beetti Beenaya, himanaanchu Naataani, Shimi"i, Reinna Daawitiri ayirraddu mootete mini agaraasine kayinni Adooniyaasi coye dikaa'litino.

⁹ Mitto barra Adooniyaasi, Ayini-Rogeeli yinanni buichowa Zoheleeti Kinchi mule ge'reewo, woraammanna harditino wodha gorre kakkali. Annisi ooso roduuwasi baalanna Yihudu roorroota baala kakkalote jilira dagganno gede woshshi.

¹⁰ Ikkollana rodoosi Selemooni, himanaancho Naataani, Beenayanna ayirradda agaraasine diwoshshino.

SELEMOONI MOOHA

¹¹ Hakkunni gedensaanni Naataani Selemooni amawa Bersaabehiwa mare, «Mootenke Daawiti afikkinni Hagiiti beetti Adooniyaasi umosi moote assi'rita afitta?

¹² Xa umikkitanna beettikki Selemooni lubbo gatisi'ratta gede ani mitto coye kuleemmohe.

¹³ Moote Daawitiwa marte, moote! ‹Beetti'ya Selemooni ate gedensaanni dargakki amadannota dicoyi'ritto? Adooniyaasi hiitto ikke moohiyya?› yite xa'mi.

¹⁴ Konne coye mootete hasaabbanni heedheenna anino e"e coyi'ratta coyi adda ikkinota lede egensiiseemmo» yiise.

¹⁵ Bersaabehino moote Daawitira hasaabbara marte isi noowa e'u. Mooteno lowo geeshsha geedhe noo daafira, Suneemitte Abishaagi seekkite towattanni noosi.

¹⁶ Bersaabehino e'e umo heeshshi yite albasiinni guluphitu. Moote Daawitino, «Mayi mitiinsinohe?» yee xa'mise.

¹⁷ Iseno, «Moote'ya, ‹Ane gedensaanni beetti'ya Selemooni moohanno› yite Maganikki Kaaliiqi su'minni dixaarootto?

¹⁸ Ikkollana kune ati afittokkinni Adooniyaasi moohino.

¹⁹ Kunnira lowo woraamma, harditino wodhanna ge'reewo kakkalino. Jilahono oosokki, qeesicha Abiyaataarinna olantokki roorricha Iyoaabi woshshino. Soqqamaanchokki Selemooni kayinni diwoshshino.

²⁰ Moote Mooticha'ya, Israeelete manni baalu ate darga moohannoha kulattonsara agadhe no.

²¹ Hatto assa hoogittoro kayinni, ati noottokki waro anenna beetto'ya Selemooni haxawarroota assite kiirtannonke» yitusi.

²² Bersaabehi mootete ledo hasaabbanni heedheenna, himanaanchu Naataani mootete minira dayi.

²³ Mooteteno Naataani dayinota kultusi. Naataanino mootenniwa e"e umo heeshshi yee albunni baatto kise,

²⁴ «Moote mooticha'ya, Adooniyaasi ate darga moohanno gede egensiisoottoni?

²⁵ Kune techo Adooniyaasi lowo woraamma, harditino wodhanna ge'reewo gorre kakkalino. Jilahono oosokki, olantokki roorrootanna qeesicha Abiyaataari woshshino. Xa kune ittanninna agganni, ‹Moote Adooniyaasi seeda diro hee'ro!› yite weeddissanni no.

²⁶ Ikkollana tenne giddoonni ane soqqamaanchokki, qeesicha Saadooqi, Yoodahe beetto Beenayanna soqqamaanchokki Selemooni diwoshshino.

²⁷ Moote mootichi'ya, ledokki gashshaanora kulittokkinni Adooniyaasi ate darga moohanno gede assoottoni?» yee xa'mi.

²⁸ Moote Daawitino, «Hanni galagalte daggona Bersaabehi woshshe!» yii. Iseno galagalte dagge albasiinni uurritu.

²⁹ Isino, «Iillinoe qarri baalunkunni gatisinoehu Heeshshote Kaaliiqi su'minni xaareemmo.

³⁰ Beettikki Selemooni ane darga amade moohannota Israeelete Magani Kaaliiqi su'minni xaaroommo coyi techo wo'mannota egensiiseemmohe» yiise.

³¹ Bersaabehino guluphite umo heeshshi yite albisenni baatto kisse, «Ati moote mootichi'ya Daawiti hegerera hee'ri!» yitu.

³² Hakkunni gedensaanni moote Daawiti qeesicha Saadooqi, himanaancho Naataaninna Beenaya woshshiishi. Insano e'e albasiinni uurritu.

³³ Mooteno, «Mootimma'ya mine noo gashshaano ledo martine beetto'ya Selemooni gaangiicho'ya gulufeenna ki'ne dukkissine Giyooni Buichowa dirrisse.

³⁴ Hakkunni gedensaanni qeesichu Saadooqinna himanaanchu Naataani buurte Israeelete moote assitosina. Buudu xurumbano ufuuffine naggi yitino qoonqonni, ‹Moote Selemooni seeda diro hee'ri!› yiiyye.

³⁵ Ayirrinyunnihura barcimi'yara ofollara daanno woyite, ki'ne dukkissine abbe. Israeelenna Yihuda gashshanno gede dooroommosi daafira ane darga isi moohanno» yiinsa.

³⁶ Beenaya, «Eewanni ati moote mootichi'ya yoottore Maganikki Kaaliiqi wonsho!

³⁷ Moote'ya, Kaaliiqi ate ledo hee'rinte gede Selemooni ledono hee'ro! Gashshootesino ate moote'ya yannanni roore jawaata asso!» yii.

³⁸ Hakkunni gedensaanni Saadooqi, Naataani, Beenayanna mootenniri ayirradda agaraasine Selemooni mootete gaango gulufisiisse Giyooni Buichowa massitu.

³⁹ Qeesichu Saadooqi, Qullaawu Dukkani giddonni buurranni zayite haa're Selemooni buuri. Mannuno buudu xurumba ufuufanni naggi yitino qoonqonni, «Moote Selemooni seeda diro hee'ri!» yii.

⁴⁰ Galagalte Yerusaalame higgu woyiteno iso dukkisse suusulle ufuuffanninna lowo geeshsha hagiirrunni qeexaa'litanni baatto milli assitu.

⁴¹ Adooniyaasinna jilaho woshshi'rino manni jila guddara rakke heedhe mannu canco macciishshitu. Iyoaabino buudu xurumbi luulo macciishshe, «Kuni katamu giddo noo luuli mayinniho?» yee xa'mi.

⁴² Isino coyi're gudikkinni, qeesichu Abiyaataari beetti Yoonaataani dayi. Adooniyaasino, «Hanni amo ei! Ati dancha manchootina dancha duduwo abba dihoogattona» yii.

⁴³ Yoonaataani Adooniyaasira, «Dancha duduwo diabboommo; ayirradu moote Daawiti Selemooni moohisino.

⁴⁴ Dukkissannosi gedeno qeesicha Saadooqi, himanaancho Naataani, Beenayanna ayirradda mootete mini agaraasine soyino. Insano iso mootete gaangiicho gulufisiissino.

⁴⁵ Saadooqinna Naataani, Giyooni Buicho mule massite buurte moohissinosi. Hakkunni gedensaanni mannu baalu hagiidhe ilillisanninna qeexaa'lanni katama higanni no; xa macciishshitinanni heedhinoonni luulino konneeti.

⁴⁶ Kuneeti Selemooni moohe mootimmate barcimira ofollino.

⁴⁷ Qoleno jajjabba gashshaano moote Daawitiwa shiqqe, ‹Maganikki Kaaliiqi Selemooni gashshoote atehunni roore maccahanna jawaata asso!› yitino. Mooteno daallasisira hee're Kaaliiqira kumbuule,

⁴⁸ ‹Techo ooso'ya giddonni mittu ane darga moohanno gede assinohunna konne coyeno laeemmo gede kaa'linoehu Israeelete Magani Kaaliiqi galatamo!› yiino» yee kulisi.

⁴⁹ Adooniyaasi jilaho woshshino manni baalunku konne coye macciishshe lowo geeshsha waajje, mittu mittunni fule faro faro hige ha'ri.

⁵⁰ Adooniyaasino Selemooni waajje Qullaawu Dukkani giddora e"e kakkallanni uduunnichi aana noo buudda cu'mi're eeggo ei.

⁵¹ Selemoonira, «Kuneeti Adooniyaasi ate waajje, ‹Moote Selemooni ane soqqamaanchosi shaannoekki gede xaaroe› yaanni kakkalote uduunnichi buudda cu'mi're no» yine kullisi.

⁵² Moote Selemoonino, «Adooniyaasi ammanaminoha ikkiro dananchisi nafa dikisamanno; aanasi bunshe anfiro kayinni reyanno» yii.

⁵³ Hakkunni gedensaanni Selemooni Adooniyaasi kakkallanni darginni haa're abbanno gede manna soyi. Adooniyaasino mootenniwa shiqe umo heeshshi yee galaxxi. Hakkunni gedensaanni moote, «Minikkira ha'ri!» yiisi.