UMI DUDUWO 4 - Qullaawa Maxaafa

YIHUDU ILAMA

¹ Yihudu ooso Faareesi, Hetsirooni, Kariimi, Huuriitinna Shobaaliiti.

² Shobaali Reaya ili; Reaya Yahaati ili; Yahaati Tsoria hee'ranno mannira akaakka ikkitinore Ahumayininna Lahaadi ilino.

^3-4 Huuri Kaaleebiranna Efiraatara bayira beettooti; gamisa oososi Beetelihemete heedhanno. Wolootu Huuri ooso: Etaami, Phiinieeliitinna Ezeeriiti. Etaami ooso: Iyizirieeli, Ishaamanna Edibaashi yinannire 3 ooso ilino; Hatsilelifooni yinannitino insa rodooti. Gedoori Katama safinohu Phiinieeliiti; Hushaani Katama safinohu Etseeniiti.

⁵ Teqoa Katama safinohura Ashihuurira Heelanna Naira yinanniri 2 meenti noosi.

⁶ Naira Ahuzaami, Hefeeri, Temininna Ahashitaari yinanni ooso iltusi.

⁷ Heelano Tsereti, Yitsihaarinna Etinaani yinanni ooso iltusi.

⁸ Qootsi Anuubinna Tsobeeba yinannire 2 labballi ooso ili; Qootsi qole Haruumi beetti Ahaariheeli ilamara ahaahoho.

⁹ Yaabeetsi roduuwisinni roore ayirradoho. Amasi iso lowo gamenni iltino daafira su'ma, Yaabeetsi yite fushshitusi.

¹⁰ Yaabeetsi, «Magano'ya ballo, maassi'rie; gobba'yano halashshie; angakkino anewiinni faffoonke"e; xiwameemmokki gede gawajjannoeriwiinni agarie» yee Israeelete Magano Kaaliiqa huucci'ri. Isino huucci'rinore wonshisi.

WOLOOTU ILAMA KIIRO

¹¹ Shuha rodii Keluubi Mehiiri ili; Mehiiri Eshitooni ili.

¹² Eshitooni Beetiraafa, Faasehanna Tehiina yinannire 3 ooso ili; Tehiina Nahaashi yinanni katama safi. Insa ilama Reka yinanni gobbara heedhanno.

¹³ Qenaazi Gotooniyaalinna Seeraya yinannire 2 ooso ili. Gotooniyaalino Hataatinna Meonotayi yinannire 2 ooso ili;

¹⁴ Meonotayino Ofira ili. Seeraya angate ogimma afidhinori heedhannoha Geharashiimi yinanni katama safinoha Iyoaabi ilino.

¹⁵ Yoofooni beetti Kaaleebi Iiru, Eelanna Na"aami yinanni ooso ili. Eelano Qeneezi ili.

¹⁶ Yihalelieelino Ziifi, Ziifa, Tireyanna Asaarieeli ili.

^17-18 Izira ooso: Yeteeri, Mereedi, Efeeriitinna Yaalooniiti. Mereedi Biitiya yinannita Gibitsete moote beetto adhe Maariyaami yinannita meya beetto, Shaamayinna Yushibahi yinannire 2 labballi ooso ili. Yushibahi Eshitaamoa Katama safino. Yihudaawitte galtesi, Gedoori Katama safinoha Yereedi, Sokko Katama safinoha Hebeeri, Zanoha Katama safinoha Yeqitieeli iltusi.

¹⁹ Hoodiya Nahaami rodoo adhi. Insa sirchi Qeila Katamira heedhannorira Garimi gosaranna Eshitemoa Katamira heedhannorira Maikaati gosara annuwate.

²⁰ Shimooni Aminooni, Riina, Benihanaaninna Tiilooni yinannire 4 labballi ooso ili. Yishi"i Zoheetinna Benizoheeti yinanni ooso ili.

SHEELA ILAMA

²¹ Sheela Yihudu beettooti. Isi ilama: Leeka Katama safinohu Eeri, Maaresha Katama safinohu Laida, Beeti-Ashibea Katamira heedhannori uddano gantanno gosa,

²² Yoqiiminna Kozeebi katammara heedhanno Moaabooti seenne adhite iltinori Yashuubilihemete heedhannori Iyoaasiitinna Saraafiiti. (Kuni albi taje giddonni haa'noonniho.)

²³ Insa mootete minira doru uduunne gantannoreeti; heedhannohuno Nexaiiminna Gedera yinanni katammaraati.

SIMIOONI ILAMA IKKITINORE

²⁴ Simiooni Nemueeli, Yamiini, Yariibi, Zaaranna Shauuli yinannire 5 labballi ooso ili.

²⁵ Shauuli Shaluumi ili; Shaluumi Mibisaami ili; Mibisaami qole Mishimai ilino.

²⁶ Mishimai Hamueeli, Zakuurinna Shimi"i ili.

²⁷ Shimi"i 16 labballi oosonna 6 seenne ilino; roduuwisira kayinni lowo ooso dinonsa. Kunni daafira Simiooni ga're Yihudu ga're geeshsha dihala'litino.

²⁸ Daawiti gashshooti geeshsha Simiooni ilama aante noo katammara heedhino; insano, Bersaabehi, Molaada, Hatsaari-Shuaali,

²⁹ Biliha, Etseemi, Tolaadi,

³⁰ Beetueeli, Herma, Tsiqilaagi,

³¹ Beeti-Markabooti, Hatsaari-Suusiimi, Beetibiriinna Shairayimi;

³² hattono Etaami, Ayini, Remooni, Tokeeninna Ashaani yinannirira wolootu shiimmaadda katammaranna,

³³ gaangaawinsara noo qachuwara heedhanno. Kuni insa heedhanno dargi Bailaati Katami geeshsha iillanno. Hattonni Simiooni ilama ikkitinori mininsa manni daafiranna heedhanno darguwa daafira borreessite wortino taje tenneeti.

³⁴ Gosa gosate sooreeyye kunninni aante nooreeti: Meshobaabi, Yamileki, Ameesiyaasi beetti Yoosha,

³⁵ Iyueeli, Yoshiibiya beetti Iyu, (Seeraya beetti Yoshiibiya, Ase"eeli beetti Seeraya),

³⁶ Eliyoenayi, Yaiqooba, Yeshohaya, Asaaya, Adieeli, Yeshimieeli, Beenaya,

³⁷ Shiifi"i beetti Ziiza, Yidaiya, Shimiirinna Shemaiya sircho ikkinohu Alooni beetti Shifiaati.

³⁸ Insa ilama ledde ledde batidhu;

³⁹ kunnira ge'reewo allaa'litannowa hasidhanni hakko noo lagichira soojjaatoonni marte Geraari geeshsha iillite amaddu.

⁴⁰ Hakkiicho gurku assannori nookkita keeru wo'minota hala'lado, danchanna shaqqado hayissote gobba afidhu. Hakkunnira albaanni hakkiicho Kaami gosa heedhanno.

⁴¹ Yihudu moote Hiziqiyaasi yannara hakku manni Geraari gobba geeshsha ha're, hakkiicho heedhannore Kaamootanna Meunoota galtannowiinni shorre hune ge'reewinsara ikkitanno geeshshita hayissote gobba afi're hakkiicho teese hee'ri.

⁴² Simiooni ga're giddonni 500 manni Edoomi Ilaala ha'ri. Kuni manni Yuushi"i ooso Felaaxiya, Neaariya, Refayanna Uzieeli anga haa're ha'rino.

⁴³ Insano gattino Amaaleqoota gudde, hatte yannanni kayisse hakkiicho teesse heedhu.