UMI DUDUWO 26 - Qullaawa Maxaafa

QULLAAWU MINI AGARAASINE

¹ Qullaawu Mini agaraasine kunninni aane noo garinni gaammoonni: Qorahi boosaallinni Asaafi ayiddi giddonni Qore beetto Mesheleemiya worroonni.

² Isira 7 labballi ooso noosi. Insano ilamansa deerri garinni Zakkaariyaasi, Yidi"ieeli, Zebaadiya, Yaatinieeli,

³ Elaami, Yihohanaaninna Eliyehoeenayi yinannireeti.

⁴ Maganu Abidaarara 8 labballi ooso ee maassi'rinosi. Oososino ilamansa deerri garinni Shemaiya, Yihozabaadi, Yoaahi, Saakaari, Naatinaeeli,

⁵ Amieeli, Yisaakooriitinna Peulitayiti.

^6-7 Abidaarahu bayiru beetti Shemaiya: Otini, Refaeeli, Iyoobeedinna Elzaabaadi ilino. Isi fiixa ikkitinori wolootu qolte Eelihuutinna Semaakiyaati. Insano noonsa egennonni boosaallinsara roorrootaho. Wo'munkura aleenni lamu maa'nuullu roore egenno afidhino.

⁸ Abidaara godowinni Qullaawa Mine agara dandiitannore 62 jawaata manna anfi.

⁹ Mesheleemiya 18 jawaata oosonna fiixa afi'rino.

¹⁰ Meraari boosaalli giddo 4 labballi ooso afi'rinohu Hoosa yinanni manchi no. Oososi giddonni bayira ikka hoogirono annisi Shiimiri albisa assinosi.

¹¹ Aantinorino Hiliqiya, Xebaaliyanna Zakkaariyaasi yinannireeti. Hoosa godowinni Qullaawa Mine agartara worroonniri mitteenni 13 mannaati.

¹² Qullaawa Mine agartannori ayiddu ayiddunkunni gaamotenni beehantino. Insano wolootu Leewaawooti gede Qullaawa Mine soqqantannoreeti.

¹³ Mitto mittonka waalcho agarate, aja akkala yinikkinni ayiddi ayiddinsa batinyi garinni hixa ganni.

¹⁴ Shelemiyara soojjaatoonni noo waalcho agarate hixu fulisi. Wo'ma woyite dancha mala aannohura beettisira Zakkaariyaasira aliyyeenni noo waalcho agarate hixu fulisi.

¹⁵ Isira Abidaarara wodiidoonni noo waalchi iillinosi; oososino uduunne worranni minna agartara worri.

¹⁶ Shupimiranna Hoosara Galchimaanni noohunna aliidi doogo widoonni noohu Shalekeeti yinanni waalchi iillinsa. Agaratannohu gannoonninsa bado agadhiteeti.

¹⁷ Barru barrunkunni soojjaatoonni 6, aliyyeenni 4, wodiidoonni 4 agaraasine worranni. Uduunnu mine agarateno barru barrunkunni 4 manna worranni. Insano lame lame ikkite lamenka uduunnu mine agartanno.

¹⁸ Galchimaanni doogote gamba assine seekkinoonni nafari mule 4 agaraasine worroonni. Nafara agarateno qolle 2 agaraasine worroonni.

¹⁹ Qorahinna Meraari boosaallira uyinoonnihu agarate loosi konneeti.

WOLOOTA QULLAAWU MINI ROORROOTANNA SOQQANSHONSA

²⁰ Leewaawootu giddonni Akiyara Qullaawu Miniha uduunnu minenna Kaaliiqira shiqinshanni fushshaate worranni minnara annimma uyinoonni.

²¹ Gershooni boosaallinni mittu Laidaani beetti Yihieeli isi godowa ikkitinori ledo ayiddu roorrichaati.

²² Zetaaminna Iyueeli yinanniri 2 Yihieeli ooso Qullaawu Mini miinjira annimma uyinoonnireeti.

²³ Amiraami, Yitsihaari, Kebirooninna Uzieeli ilamarano loosu qeecha uyinoonninsa.

²⁴ Muse beetti Gershoomi ilama ikkinohu Shebueeli miinju mini Qullaawu Minihura annimma uyinoonnirira roorrichaho.

²⁵ Isino Gershoomi rodii Elieezeeri widoonni Sheloomiitira maalu fiixaati; Elieezeeri Rehaabiya ili; Rehaabiya Yishaiya ili; Yishaiya Yoraami ili; Yoraami Ziikiri ili; Ziikiri Sheloomiiti ili;

²⁶ Sheloomiitinna ayiddisi moote Daawiti, ayiddu roorrooti, boosaallu albisootinna olu hajajaano Kaaliiqira badde shiqishshino fushshaatira annimma uyinoonnireeti.

²⁷ Insa olu yannara haa'ne abbinanni uduunni giddonni gama haadhe Qullaawu Minira baxxinoha assite wortanno.

²⁸ Himanaanchu Saamueeli, moote Saaooli, Neeri beetti Abeneerinna Tseruya beetti Iyoaabi Qullaawu Mini hajora badde shiqishshino fushshaate baalanka annimmatenni towattannori Sheloomiitinna ayiddesiiti.

²⁹ Yitsihaari ilama giddonni Kenaaniyaranna oososira Qullaawu Mini soqqanshora gobbaanni gashshootunna coye afate annimma uyinoonninsa.

³⁰ Kebirooni ilama giddonni Hashaabiyaranna 1,700 egenno afidhinorira ayiddisira Yordaanoosira galchimaanni nootera Israeelete gobbara maganittete soqqanshonna gashshootu haja wonshitanno gede annimma uyinoonninsa.

³¹ Kebirooni ilamara roorrichu Yiriyaati. Daawiti moohihunni shoyilliikki diro tajete borro giddo hanse Geleaadi gobbara Yaizeeri yinanni darga heedhannore Kebirooni ilama ikkitinore jawaata manna anfoonni.

³² Moote Daawiti hatte ilama giddonni jawaatoota 2,700 ayiddu roorroota doorino. Yordaanoosi Wayira soojjaatoonni noo Israeelera Roobeeli, Gaadinna Minaase gobbara magansi'rate soqqanshonna gashshootu hajo wonshitanno gede annimma uyinonsa.