UMI DUDUWO 24 - Qullaawa Maxaafa

QEESOOTAHO UYINOONNITA LOOSU ANNIMMA

¹ Aarooni ilama gaamo aante noote: Aarooni 4 labballi ooso ilino. Insano: Naadaabi, Abihu, Aliaazaariitinna Itaamaariiti.

² Naadaabinna Abihu sircho sa'ukkinni annansa balaxxe reyitino. Kunnira insa darga roduuwinsa Aliaazaarinna Itaamaari qeesimmatenni soqqantino.

³ Moote Daawiti Aarooni sircho loosinsa garinni gaamo gaamo asse beehi. Hatto assinohu Aliaazaari sircho ikkinohu Saadooqinna Itaamaari sircho ikkinohu Ahimeleeki kaa'liteennaati.

⁴ Aliaazaari ayiddi roorroota 16 assine, Itaamaari ayidde qolle 8 gaamo assinoonni. Hatto assinoonnihu Aliaazaari ayiddi labballi kiiro Itaamaari ayiddiha roorino daafiraati.

⁵ Aliaazaarinna Itaamaari ilama giddonni Qullaawu Mini loosiranna magansi'rate hajara roorrootaho. Kunnira, looso hixunni beenkoonninsa.

⁶ Hixa gannanni gede Aliaazaarinna Itaamaari ilama bado badotenni e'anno. Hakkunni gedensaanni insa su'ma Leewaawichu Naatinaeeli beetti borreessaanchu Shemaiya borreessanno. Konne coye assinanni woyite mereeroho heedhe affannori, mootenna ledosi gashshaano, qeesootu Saadooqinna Abiyaataari beetti Ahimeleeki, qoleno qeesootunna Leewaawootu ayidde ikkitino roorrootaati.

^7-18 Kunnira woroonni kiirroonnire lemiina shoolenka ayidde hixinsa garinni kunninni aanchine gaammoonni: Yihoyaariibi gaamo, Yidaiya gaamo, Hariimi gaamo, Seooriimi gaamo, Malkiya gaamo, Miyaamiini gaamo, Haqoosi gaamo, Abiya gaamo, Iyyaasu gaamo, Shakaaniya gaamo, Eeliyaashiibi gaamo, Yaqiimi gaamo, Huupa gaamo, Yeshebiaabi gaamo, Biilga gaamo, Imeeri gaamo, Heziiri gaamo, Hapitseetsi gaamo, Fetahiya gaamo, Yiheziqeeli gaamo, Yakiini gaamo, Gamuuli gaamo, Delaya gaamootinna Meaaziya gaamooti.

¹⁹ Kuni manni Qullaawu Mini looso beeqqinohu Israeelete Magani Kaaliiqi ahaahonsa Aarooni hajajino garinniiti.

LEEWAAWOOTU KIIRO

²⁰ Wolootu Leewi sirchi ayiddi roorrooti su'mi kunninni aane nooho: Yehideya Shebueeli widoonni Amiraami sirchooti.

²¹ Umihu Yushiya Rehaabiya sirchooti;

²² Yahaati Sheloomiiti widoonni Yitsihaari sirchooti;

²³ Yiriya, Amaariya, Yahizieelinna Yiqamiaami Kebirooni oosooti. Insa su'ma ilamansa deerrinni borreessinoonni.

²⁴ Saamiri Miika widoonni Uzieeli sirchooti;

²⁵ Zakkaariyaasi Miika rodii Yushiya widoonni Uzieeli sirchooti;

²⁶ Mahiili, Muushinna Yaiziya Meraari sirchooti.

²⁷ Yaiziyaami: Shohaami, Zakuurinna Ibiiri yinannire 3 labballi ooso ilino.

²⁸ Mahiilino Aliaazaarinna Qiishi yinannire 2 labballi ooso ilino. Aliaazaari labbaa beetto horonta di"ilino.

²⁹ Qiishi kayinni Yirahime"eeli yinanniha mitto labbaa beetto ilino.

³⁰ Muushino Mahiili, Edeerinna Yarimooti yinannire 3 labballi ooso ilino. Kuri baalunku Leewi sirchi ayiddeeti.

³¹ Mittu mittunku ayiddi roorrichinna maa'nuno bayiruno fiixinsa gede Aarooni sircho ikkitino qeesooti assitunte gede, loosinsara hixa ga'nitu. Konne coye mereeroho heedhe affannori, moote Daawiti, Saadooqi, Ahimeleeki, qeesootunna Leewaawootu ayiddi roorrootaati.