UMI DUDUWO 23 - Qullaawa Maxaafa

¹ Daawiti lowo geeshsha geedhihu gedensaanni beettosi Selemooni Israeelete moohisi.

LEEWAAWOOTU LOOSO

² Moote Daawiti Israeelete roorroota, qeesootanna Leewaawoota baala mitteenni gamba assi.

³ Diro sajjoonna hakkuyi ale ikkitino Leewaawoota kiirreenna 38,000 ikkitu.

⁴ Insa giddonni 24,000 ikkitannore Qullaawa Mine minsiissanno gede wori. 6,000 ikkitannore borrote taje amaddannorenna mannaho coye affannore asse wori.

⁵ Shoole kume ikkitannore qole agaraasine assini. Wolootu shoolu kumi qolte, moote aannonsahunni muuziiqu uduunninni faarsotenni Kaaliiqa galattanno gede worri.

⁶ Daawiti Leewaawoota boosaallu boosaallunkunni sasewa beehi. Insano Gershooni, Qehaatinna Meraari boosaallooti.

⁷ Gershoonira Laidaaninna Shimi"i yinanniri 2 labballi ooso noosi.

⁸ Laidaanino Yihieeli, Zetaaminna Iyueeli yinannire 3 labballi ooso ili.

⁹ Shimi"ino Shelomooti, Hazieelinna Kaaraani yinannire 3 labballi ooso ili. Kuri baalu Laidaani sircho ikkino boosaallira baalaho roorrootaho.

^10-11 Shimi"i gedensaanni ilamansa deerri garinni Yahaati, Ziina, Yiuushinna Beeriya yinannire 4 labballi ooso ilino. Yiuushiranna Beeriyara lowo ooso noonsakkihura mittu boosaalli gede kiirantanno.

¹² Qehaatino Amiraami, Yutsihaari, Kebirooninna Uzieeli yinannire 4 labballi ooso ili.

¹³ Qehaatihu bayiru beetti Amiraami Aarooninna Muse annaati. Aarooniranna sirchisira geedote geeshsha Qullaawu Mini uduunne keereensitanno gede, Kaaliiqira kakkalo shiqishshanno gede, soqqantannosi gedenna hegere geeshsha isi su'minni manna maassidhanno gede bandoonninsa.

¹⁴ Maganu manchiti Muse ooso Leewaawootu ledo kiirantino.

¹⁵ Muse Gershoominna Elieezeeri yinannire 2 labballi ooso ilino.

¹⁶ Gershoomi ooso giddo roorrichu Shebueeliiti.

¹⁷ Elieezeerira Rehaabiya yinannihu mittu beetti callu noosi. Rehaabiya kayinni lowo ila afi'rino.

¹⁸ Qehaatihu layinki beetti Yitsihaari boosaallisira roorricha ikkinoha Sheloomiiti yinanni beetto afi'rino.

¹⁹ Qehaatihu sayikki beetti Kebirooni Yiriya, Amaariya, Yahizieelinna Yiqamiaami yinannire 4 labballi ooso ilino.

²⁰ Qehaatihu shoolki beetti Uzieelino Miikanna Yushiya yinannire 2 labballi ooso ilino.

²¹ Meraarino Mahiilinna Muushi yinannire 2 labballi ooso ilino. Mahiilino Aliaazaarinna Qiishi yinannire 2 labballi ooso ilino.

²² Aliaazaari kayinni seenne agurranna labbaaha ilikkinni reyino. Seennisi wosiilinsa Qiishi oosora mine assi'rino.

²³ Meraarihu layinki beetti Muushi Mahiili, Edeerinna Yarimooti yinannire 3 labballi ooso ilino.

²⁴ Kuri baalunku boosaallu boosaallunkunninna ayiddu ayiddunkunni kiirroonni Leewaawootaati. Mitto mittonka su'mi su'minsanni kiirroonni. Lemuu diririnna hakkuyi ali Leewaawooti baalu Qullaawu Mini soqqanshora qeechu noonsareeti.

²⁵ Daawitino, «Israeelete Magani Kaaliiqi mannisira keere uyino. Isino hegere geeshsha Yerusaalamete hee'ranno.

²⁶ Kunni ka'a Kaaliiqa magansi'nanni dukkananna magansi'rate seerira ikkanno uduunne Leewaawootu duha dihasiissannonsa» yii.

²⁷ Daawiti goofimarchoho uyino biddishshi garinni 20 diro ikkinonsarenna hakkuyi ali Leewaawoota baala soqqanshote kiirri.

²⁸ Insa Qullaawa Mine soqqantannore qeesoota Aarooni ooso kaa'litanno. Qolleno insa Qullaawu Mini nafaranna giddoyido towattanno gede, qullaawa uduunne keereensitaranna woleno Qullaawu Mini soqqansho baala wonshitara worroonni.

²⁹ Kaaliiqira fushshaate assine shiqinshanni timiranna bulleera, shiishikkinni gannanni timiranna ejersu zayitenni liinsanni bulleera annimma insara uyinoonni. Qullaawu Minira uyinanni fushshaate baala keentannorinna bikkitannorino insaati.

³⁰ Wo'manka woyite soodonna hawarro Kaaliiqira galatanna ayirrinye uyitannori Leewaawootaho.

³¹ Fooliishshote Barra, Aganu Leellihunni umi barranna wole ayyaannara Kaaliiqa galatanna ayirrisa insa loosooti. Yanna yannantenni tenne haja wonshitanno Leewaawooti mageeshsha ikka hasiissannoro worroonni seeri no. Kaaliiqa magansi'rate seera wonshinanni yanna baalantera worroonniri insaati.

³² Kunnira Leewaawootaho Kaaliiqa magansi'nanni dukkaninna Qullaawu Mini haja baalate annimma uyinoonninsa. Qullaawu Mini giddo magansi'rate seera wonshitannore fiixansa ikkitinore qeesoota Aarooni sirchono kaa'litanno.