UMI DUDUWO 22 - Qullaawa Maxaafa

¹ Kunnira Daawiti, «Kaaliiqi Maganunnihu Qullaawu Mininna Israeelete manni shilqote kakkalo shiqishannohu kakkalote dargi kawiicho ikkona» yii.

QULLAAWA MINE MINATE ASSINOONNI QIXXAAWO

² Moote Daawiti Israeelete baattora heedhannore wole gobba manna gamba assi. Insa giddonni gamisa Qullaawa Mine minnanni kincho boccanno gede wori.

³ Daawiti waalchuwa seekkinanni misimaarranna cufana amaddanno maaxaffa seekkinanni siwiilanna keenne dandiinannikkita lowo camo qixxeessino.

⁴ Xiroosinna Sidoona manni kiiro lowo geeshsha bati'ra darroonnikki daguwa abbannosi gede assi.

⁵ Daawiti, «Beetti'ya Selemooni Kaaliiqira minannohu Qullaawu Mini lowo geeshsha biifadonna gobba baalate egennaminoha ikka hasiissanno. Ikkollana isi anje afi'rino daafiranna egennosino lowota ikkitinokki daafira baalankare ani qixxeesseemmosi» yee hedi. Kunnira Daawiti reyara albaanni mine minate ikkannoha lowo uduunne qixxeessino.

⁶ Daawiti beettosi Selemooni woshshiishe Israeelete Maganira Kaaliiqira Qullaawa Mine minanno gede hajajisi.

⁷ Selemoonira, «Beetto'ya, ani wodani'yanni Magani'ya Kaaliiqi ayirrinyira Qullaawa Mine minate hedoommo.

⁸ Kaaliiqi kayinni, ‹Ati lowo manna shootto; batinye ola olante lowo manni mundee dunootto. Kunnira Qullaawa Mine ati diminattoe.

⁹ Ani diinisi baalunkuwiinni fooliishshiishe keere eennasi keerunni gashshanno beetti ilamannohe. Isi gashshanno yannara Israeelete keerenna harshammo eemmo daafira su'masi Selemooni yinanni.

¹⁰ Anera Qullaawa Mine minannoehu isooti. Isi beetto ikkannoe; anino anna ikkeemmosi. Gashshootisino minisinni fulikkinni Israeelete aaninni soorramikkinni hee'ranno› yee hexxo uyinoe» yiisi.

¹¹ Qoleno, «Xaano beetto'ya, Kaaliiqi ledokki hee'ro! Coyi'rino garinni Maganikki Kaaliiqi mine minatto gede isinni qineessohe.

¹² Israeelete aana roorre aannohe yannara, seerisi garinni gashshatto gede Maganikki Kaaliiqi egennonna hayyo oohe.

¹³ Kaaliiqi Muse widoonni qole Israeelete uyino seera baala wonshittoro, baalunkuri qinaannohe. Jawaati; muratoottoha ikki; waajjitooti; hexxo mudhitooti!

¹⁴ Qullaawa Mine minate ikkiro, ani 3,400,000 kiilo ikkanno culkanna 34,000,000 kiilo birra gamba assoommo; qoleno kiirre fullannikki camonna siwiila qixxeessoommo; haqqenna kinnano hakko garinni qixxeessoommo. Ikkirono atino ledde shiqishatto.

¹⁵ Atera kinna bocannohu, kinchunni minannohunna haqqunni minannohu lowo manni noohe. Qoleno addi addi ogimma afidhinori:

¹⁶ Culkunni, birrunni, camotenninna siwiilunni loonsanni gara egentinoti batinye ogeeyye noohe. Xaate looso hanafi. Kaaliiqino ledokki hee'ro» yiisi.

¹⁷ Daawiti Israeelete roorrooti baalu beettosi Selemooni kaa'litanno gede hajaji.

¹⁸ Insarano, «Magani'ne Kaaliiqi xaa geeshsha ki'ne ledo no; raga baalaho keere uyino'ne. Tenne gobbara heedhanno gosa baala qeele amadeemmo gede assinoe. Insano ki'nenna Kaaliiqi anga galtannore ikkitino.

¹⁹ Kunnira Magani'ne Kaaliiqira wo'mu wodani'nenninna wo'ma lubbo'nenni soqqammesi. Kaaliiqiha Gondooru Taabootanna Kaaliiqa magansi'rate ikkannoha qullaawa uduunne baala wortinanni gede ayirrinyisira Qullaawa Mine mina hanaffe» yiinsa.