UMI DUDUWO 16 - Qullaawa Maxaafa

¹ Gondooru Taabootano massite Daawiti qixxeessino dukkani giddo wortu. Hakkunni gedensaanni Kaaliiqira gudinse shilqinshannitanna mittimmate kakkalo shiqishshu.

² Daawiti kakkalo shiqishihu gedensaanni manna Kaaliiqi su'minni maassi'ri.

³ Mannu baalunkura sagale beehi. Meya labbaahu gatikkinni Israeelete manni baalunkura mitto mitto tima, du'rinshoonni maalanna shiima qeeqqitino laalo uyi.

⁴ Daawiti Gondooru Taabootira albaanni uurrite Israeelete Magano Kaaliiqa galatunni, guwishshunninna ayirrinyunni magansi'nanni gede assitannore shiima Leewaawoota wori.

⁵ Asaafi albisa, Zakkaariyaasino isi kaa'laancho assine worri. Yihieeli, Shemiramooti, Yi"ieeli, Matiitiya, Eeliaabi, Beenaya, Abidaaranna Yihieeli maasinqonna bagana ganate, Asaafi qolle tsenaatsile ganate worri.

⁶ Beenayanna Yahazieeli yinanni qeesoota wo'manka woyite Gondooru Taabootira albaanni uurrite xurumba ufuuffanno gede assini.

⁷ Daawiti Asaafiranna gattino Leewaawootira Kaaliiqira galatu faarso shiqishate annimma uyinonsahuno hakka warooti.

GALATU FAARSO

⁸ Kaaliiqa galattesi; su'masino guwisse; assinore baala gosate hasaabbe.

⁹ Kaaliiqira galatu faarso faarse; assino dhagge baala kulle.

¹⁰ Qullaawu su'misinni naaxxe; iso magansidhannorira baalaho tashshi yoonsa.

¹¹ Kaa'losi afidhinanni gede Kaaliiqa hasidhe; wo'manka woyite magansidhesi.

^12-13 Ki'ne soqqamaanchisi Israeeli ooso, doorino'neri Yaiqoobi sirchi baalu, Kaaliiqi assino maalale baalanna, yiino yoo wodanche.

¹⁴ Kaaliiqi Maganonkeeti; isi baatto baalate halaale coyi'ranno.

¹⁵ Hegerera ikkanno gede uyinoha, Maganu gondooro horonta habbinoonte.

¹⁶ Abirihaami ledo eino gondooronna, Yisihaaqira xaarino xaaro agaranno.

¹⁷ Konne coye Yaiqoobira wodho, Israeelete gondooro asse worino.

¹⁸ Isino, «Kana"aani baatto eemmohe; atera iqqakki ikkitanno» yiino.

¹⁹ Maganu manni kiiro aje noo waro, Kana"aani gobbara wosinimma hee'rino.

²⁰ Gobbatenni gobba sa'u; gashshootunni gashshoote sa'anni raataabbu.

²¹ Maganu kayinni ayino gadadisansara wore dilaino; insa agarara yee mootoolla,

²² «Doorantinore soqqamaano'ya gawajjitinoonte; himanaano'yano kissinoonte» yee qorophisiisino.

²³ Baattote aana heedhinoonni gosa baala Kaaliiqira faarse. Gatisaanchimmasi barru baala kulle.

²⁴ Dagate ayirrinyesi lallabbe; dhaggesino gosa baalate kulle.

²⁵ Kaaliiqi lowoho; lowo galati hasiisannosiho; wole maganna baalantenni roore ayirradoho.

²⁶ Wole gosa magansidhannoti kaphu magannaati; Kaaliiqi kayinni gordo kalaqinoho.

²⁷ Ayirrinyunna gaamaarre gaangeessitinosi; jawaantenna hagiirru Qullaawa Minesi no.

²⁸ Mannu sirchi baalu Kaaliiqa galatte; ayirrinyisinna jawaantesi daafira guwissesi.

²⁹ Kaaliiqiha ayirrado su'ma galatte; fushshaate haadhine abbe; ki'neno isiwa amme. Qullaawu Magani leellanno woyite magansidhesi.

³⁰ Baattote aana heedhinanni gosa baala, albasiinni qece yitine huxidhe; baatto shashshafantannokki gede kaajjite uurritino.

³¹ Gordu hagiidho; baattoteno tashshi yoose; daga baalate, «Kaaliiqi mootete» yitine kulle.

³² Baarunna giddosi noori baalu harqo; gatunna gate noori baalu hagiidho.

³³ Kaaliiqi baattote aana yoo yaara daanno waro, dubbu haqqe Kaaliiqi albaanni hagiirrunni faarsito.

³⁴ Kaaliiqa galattesi; isi shaqqadoho; bagamannokkihu baxillisino hegerehona, Kaaliiqa galattesi.

³⁵ Kaaliiqano, «Magano gatisaanchonke, ballo gatisinke; daga baalate giddonni gamba assite gobbanke qolinke; hatte yannara galanteemmohe; qullaawa su'makkino ayirrinseemmo» yiiyye.

³⁶ Israeelete Magani Kaaliiqi hegere geeshsha galatamo. Mannu baalunku, «Hamii'ni» yee, Kaaliiqa galati.

DAAWITI YERUSAALAMETENNA GEBAOONI MAGANSI'NANNI GARA INJEESSI

³⁷ Moote Daawiti Asaafiranna Leewaawootu godowa ikkitinorira Gondooru Taabooti noowa magansi'rate seerira annimma uyinsa. Insano hakkiicho ganyite barra tuqa soqqantanni heedhu.

³⁸ Insa kaa'litanno gede Yidutuni beetto Abidaaranna isi boosaallinni wole 68 manna lende worri. Hoosanna Abidaara huxxu waalchuwa agarate roorroota ikkitu.

³⁹ Qeesicha Saadooqiranna isi ayidde ikkitinorira wolootu qeesootira, Gebaooni noohura Kaaliiqa magansi'nanni dukkani giddo assinanni seerira annimma uyinonsa.

⁴⁰ Hatto assinohuno Kaaliiqi Israeelete mannira uyino seeri garinni, soodonna hawarro wo'manka woyite gudinse shilqinshanni kakkalo shilqishshanno gedeeti.

⁴¹ Insa ledo Hemaani, Yidutuninna bagamannokkiha Kaaliiqi baxille heddanni wo'manka woyite isira galatu faarso faarsitanno gede bande doorroonni manni no.

⁴² Hemaaniranna Yidutunira xurumbuwate, tsenaatsillatenna galatu faarso faarsinanni yannara gannannihura wolu muuziiqu uduunnira annimma uyinonsa. Yidutuni boosaalli mannira huxxu waalchuwa agarate annimma uyinonsa.

⁴³ Hakkunni gedensaanni mannu baalunku mini minisira ha'ri. Daawitino maatesi maassi'rara minisira ha'ri.