UMI DUDUWO 15 - Qullaawa Maxaafa

GONDOORU TAABOOTA HAA'RE HA'RATE ASSINOONNI QIXXAAWO

¹ Daawiti hee'ranno minna, Daawiti Katamira Yerusaalamete mi'nino. Maganunniha Gondooru Taaboota worranni dargano hakko seekke dukkana qasi.

² Hakkunni gedensaanni Daawiti, «Kaaliiqi hegere geeshsha isira soqqantannonna Gondooru Taaboota dukkanno gede Leewaawoota doorino daafira, Taaboota insa calluwu dukkanno» yii.

³ Hakkiinni aanche Gondooru Taaboota qixxeessinoonni dargira haa're massanno gede Israeelete manna baala Yerusaalame woshshi.

⁴ Aarooni ilamanna Leewaawoota woshshanno mannano soyi.

⁵ Leewaawichu Qehaati boosaallinni, Urieeli 120 manna hoodete adhe dayi.

⁶ Meraari boosaallinni, Asaaya 220 manna hoodete adhe dayi.

⁷ Gershooni boosaallinni, Iyueeli 130 manna hoodete adhe dayi.

⁸ Elitsafaani boosaallinni, Shemaiya 200 manna hoodete adhe dayi.

⁹ Kebirooni boosaallinni, Eelieeli 80 manna hoodete adhe dayi.

¹⁰ Uzieeli boosaallinni, Aminaadaabi 112 manna hoodete adhe dayi.

¹¹ Daawiti qeesoota Saadooqinna Abiyaataari qoleno Leewaawoota Urieeli, Asaaya, Iyueeli, Shemaiya, Eelieelinna Aminaadaabi woshshiishi.

¹² Leewaawoota, «Ki'ne boosaalli'nera albisootaho. Israeelete Magani Kaaliiqiha Gondooru Taaboota qixxeessoommo dargira dukkine abbitinanni gede ki'neneetenna ilama'ne baala keereense.

¹³ Kunni albaanni Taaboota ki'ne daggine duha hooggineenna, ninkeno Maganinke Kaaliiqi hedino gede assate iso xa'ma hoongoommohura qorichishinonke» yii.

¹⁴ Hakkunni gedensaanni Israeelete Magani Kaaliiqi Taaboota dukke haadhe hadhanno gede qeesootunna Leewaawootu umonsa keereensidhu.

¹⁵ Kaaliiqi Muse widoonni qole hajajino garinni Leewaawootu Taaboota dawaayyeho worte qotinsara dukke hadhu.

¹⁶ Daawiti roduuwinsa giddonni baganunni, maasinqotenninna tsenaatsiletenni hagiidhitanni faarsitannore wortanno gede albissanno Leewaawoota hajaji.

^17-21 Tenne faarsaano boosaallinni camote tsenaatsile gantara worroonniri: Iyueeli beetti Hemaani, isi ayidde ikkinohu Berakiya beetti Asaafi, qoleno Meraari boosaallinni Qusaya beetti Etaaniiti. Shiima bagana gana kaa'litannonsari, Zakkaariyaasi, Yaizieeli, Shemiramooti, Yi"ieeli, Uuni, Eeliyaabi, Maiseyaatinna Beenayaati. Jawa bagana gana kaa'litannori qolte: Matiitiya, Eelifelehu, Miqineya, Qullaawu Mini agaraasine giddonni Abidaaraatinna Yi"ieeliiti.

²² Muuziiqu uduunne gana egennino daafira, Kanaaniya faarsaanote roorricha assinoonni.

^23-24 Berakiyanna Hiliqaana, Abidaaranna Yuhiya Gondooru Taaboota agartara doorroonni. Qeesootu Shebaaniya, Iyosaafiixi, Naatinaeeli, Amaasayi, Zakkaariyaasi, Beenayanna Elieezeeri Gondooru Taabootira albaanni hadhanni buudu xurumba ufuuffanno gede doorroonni.

GONDOORU TAABOOTA YERUSAALAME HAA'NE MASSINI

²⁵ Hakkunni gedensaanni moote Daawiti, Israeelete geerrinna olantote hajajaano Gondooru Taaboota abbitara hagiidhitanni Abidaara minira hadhu.

²⁶ Gondooru Taaboota dukkanno Leewaawoota Kaaliiqi kaa'lannonsa gede 7 woraammanna 7 ge'reewu gocca kakkaltu.

²⁷ Daawiti dancha gede shaashshine gannoonni kaabbanna gagasu uddano uddi're no. Faarsaano baala, Faarsaanote roorrichi Kenaaniyanna Gondooru Taaboota dukkino Leewaawooti dancha gede shaashshine gannoonni uddano uddidhe no.

²⁸ Kunni garinni Israeelete manni baalunku buudunnihanna siwiilu xurumba ufuufanni, tsenaatsile gananni, maasinqonna bagana gananni hagiidhanninna ilillisanni Gondooru Taaboota duhe Yerusaalame abbi.

²⁹ Taaboota Katama eessinanni hee'neenna Saaooli beetto Melkooli masikootete giddoonni qolte la'u. Moote Daawitino hagiidhe kubbanni nooha affe wodanisenni mishshusi.