UMI DUDUWO 12 - Qullaawa Maxaafa

BIINIYAAMI GA'RE GIDDONNI BALAXE DAAWITI HOODE HA'RINO MANNA

¹ Daawiti Saaooliwiinni xooqe ha're Tsiqilaagi hee'reenna, ola egentino bagadaano hale ikkitasira isiwa hadhu.

² Insano Saaoolinte gede Biiniyaami ga're mannaati. Insa qiniitichonna guracho anganni digaananna worbicho corqaayyetennino kinna ola dandiitannoreeti.

^3-7 Hajajjannonsari Gibiaawichu Shimia ooso Ahiezeeriitinna Yoaasiiti. Olantote su'muwano aante noote: Azimaaweeti ooso Yizieelinna Peleexi, Berakanna Anatooti ilama ikkinohu Iyu, macca bagadaanchi gedensaanni qole 30 bareeddara roorricha ikkinohu Gebaoonichu Yushimaiya, Gedera ilama ikkitinori: Ermiyaasi, Yahizieeli, Yohanaaninna Yozaabaadi, Hariifi ilama ikkitinori: Eliuuzayi, Yarimooti, Beaaliya, Shemaariyanna Shefaaxiya, Qore boosaallo ikkitinori: Hiliqaana, Yushiyahu, Azaarieeli, Yoezeerinna Yashobiaami, Gedoori ilama ikkitinori: Yirohaami ooso Yoeelaatinna Zebaadiyaati.

GAADI GA'RE GIDDONNI DAAWITI HOODE HA'RINO MANNA

⁸ Daawiti gammoojjitte gobbara qiishote giddo hee'reenna Gaadi ga're giddonni maccarinna ola egentino bagadaano dagge olantosi ledo karsantu; insano wonqotenninna urdetenni olammanni gara egentinoreeti; doobbiichu gede waajjishshannoreetinna bullichimma buubbannoreeti.

^9-13 Su'minsa deerri deerrinsa garinni kunninni aane nooho: Umihu Ezeeri, layinkihu Abidiyu, sayikkihu Eeliaabi, shoolkihu Mishimana, ontikkihu Ermiyaasi, leelkihu Atayi, lamalkihu Eelieeli, settikkihu Yohanaani; honsikkihu Elizabaadi, tonnikkihu Ermiyaasi, tonaa mitikkihu Makibaanayiiti.

¹⁴ Kuri Gaadi ga're giddonni shiimu manni aliidita kumu roorrenna woriidita xibbu roorre afidhinoreeti.

¹⁵ Insa mitte higge dirunni umi aganira, Yordaanoosi Wayi gaxa gane daye hee'reenna giddoonni higge tayisse fulte, waaho soojjaatoonninna galchimaanni laggate giddo hee'ranno manna shorrite huntino.

BIINIYAAMINNA YIHUDU GA'RE GIDDONNI DAAWITI HOODE HA'RINO MANNA

¹⁶ Yihudunninna Biiniyaami ga'renni xinqame fulinohu shiimu manni qiishi're noowa Daawitiwa ha'ri.

¹⁷ Daawitino insawa shiqqi yee, «Kawiira ha'litinaera danchummate dagginoonniha ikkiro haa'reemo'nena, ninke ledo heedhe. Assoommo'neri nookkiha diini'yara sayissine uyitinaera dagginoonniha ikkiro kayinni akaakkanke Magani afo'ne» yii.

¹⁸ Gedensaanni sajjooho roorricha ikkinohura Amaasayira Maganu Ayyaani dirrisi. Isino, «Isseyi beetto Daawiti! Ninke ate haleeti. Ateranna halekkira qinoo'ne; Maganuno hale ikkohe» yee qoonqosi naggi asse coyi'ri. Daawitino insa hagiidhe adhe olantote roorroota assinsa.

MINAASE GA'RE GIDDONNI DAAWITI HOODE HA'RINO MANNA

¹⁹ Daawiti Filisxeemootu ledo Saaooli qasara gaadi yannara, Minaase ga'renni shiimu manni Daawiti kaa'lara mari. Filisxeemete roorrooti kayinni, «Daawiti ninke agure mootichisiwa Saaooliwa higanno» yite waajjitino daafira malte Tsiqilaagi higanno gede assitusi. Kunnira isi insa dikaa'lino.

²⁰ Daawiti Tsiqilaagi higi yannara, Minaase ga're giddonni ledosi higginori su'muwa kunninni aante noote: Adinaahi, Yozaabaadi, Yidi"ieeli, Mikaaeeli, Yozaabaadi, Eelihuutinna Tsilitayiiti. Kuri baalunku Minaase gobbara noo waro kumu roorrootaati.

²¹ Baalunku bareedda bagadaano ikkitino daafira, diinu ugganno yannara gaadaannuwa ikkite Daawiti kaa'litino. Gedensaannino Israeelete olantora olu roorroota ikkitino.

²² Barru barrunkunni haaru haaru manni daye lexxanna Daawiti olanto lowo geeshsha bati'ranna wolqaataame ikkitu.

DAAWITI OLANTO BATINYE

^23-37 Daawiti Kebirooni hee'reenna haammata qajeeltino olanto dagge isi olanto ledo karsantino. Kaaliiqi coyi'rino garinni Daawiti Saaooli darga moohanno gede lowo geeshsha kaa'litusi. Kiironsano aante noote: Yihudu ga'renni: Wonqotenninna urdetenni feeffattinori 6,800 olanto, Simiooni ga'renni: Danchu garinni qajeeltinori 7,100 olanto, Leewi ga'renni: 4,600 manna, Aarooni ilama giddonni Yoodahe hoode hadhinori 3,700 manni, egennaminohu aju bagadaanchi Saadooqi ayiddinni 22 gaadaannuwa, Saaooli ayiddi giddonni Biiniyaami ga'renni 3,000 mannaati. Ikkollana Biiniyaami ga're giddonni rooru manni Saaoolira badhe diwodhino. Efireemi ga'renni: 20,800 mannaati; baalunku qolte boosaalli boosaallinsara egennantino bareeddaati. Galchimaanni nootenni Minaase ga'renni: 18,000 mannaati; insano Daawiti moohisate addinni doorroonnireeti. Yisaakoori ga'renni: 200 albisootaatinna insa hajajjanna soqqantannoreeti. Kuni albisooti Israeelete manni assate hasiisannorenna yannano badde affino egennaammaati. Zaabilooni ga'renni: Daawitira ammanantinori gobbansa baxxannori, olaho qixxaabbinori, qolteno mayi gari bagadinnino olama dandiitannori 50,000 olanto, Nifitaalemi ga'renni: 1,000 albisootaatinna urdenna wonqo amaxxitinori 37,000 olanto, Daani ga'renni: 28,600 qajeeltino olanto, Aseeri ga'renni: 40,000 olaho qixxaabbino olantooti. Yordaanoosira soojjaatoonni nootenni Roobeeli, Gaadinna daratu Minaase ga'renni baxi bagadinni olama dandiitannori 120,000 olanto no.

³⁸ Kuri baalunku olaho qixxaabbe Daawiti Israeele baalantera moohisate murcidhe isi noowa Kebirooni hadhu. Gatinohu Israeelete mannino tenne hedora sumuu yee no.

³⁹ Insa baalunku fiixansa ikkitinori qixxeessitino sagale ittanninna agganni 3 barra Daawiti ledo keeshshitu.

⁴⁰ Aliyyeenni hee'rannohu Yisaakoori, Zaabilooninna Nifitaalemi ga're manni harrete, gaalaho, gaangootahonna boottate lowo sagale: Bullee, balase, qeeqqitino laalo, woyinete xajjenna ejersu zayite hogowe haa're dayino. Qoleno gorrinanniha lowo lalonna ge'reewo haa're dayino. Kuni coyino gobbate noo manni hagiidhinota leellishanno.