UMI DUDUWO 10 - Qullaawa Maxaafa

SAAOOLITANNA OOSOSI REYO

¹ Filisxeemootu dagge Gilboa Ilaali aana ola fante Israeele qassu; lowo manna shiteenna, gatino manni fule xooqi.

² Filisxeemootu Saaoolinna oososi fuursite shorritunsa. Shorrite iillituhu gedensaanni oososi: Yoonaataani, Aminaadaabinna Melkishuano shitu.

³ Saaooli noo widoonni olu duu'rino daafira, diinu olino maxxi daye Saaooli qase madiissisi.

⁴ Saaoolino bagadosi duhannoha, «Tini maganiweelo gosa shite godo'litannoekki gede, bisekki kounni fushshite ati shiie» yiisi. Bagadosi duhannohu kayinni lowo geeshsha waajjino daafira shaa giwi. Kunnira Saaooli umisi bisera dirme reyino.

⁵ Bagado duhannohu Saaooli reyita afe, isino umisi bisera dirme ledosi reyino.

⁶ Kunni garinni Saaoolinna sasunku oososi mitteenni reyiteenna, gashshootesi haa're sainohu dino.

⁷ Iyiziraeeli Lagichira heedhanno Israeelooti, olantonsa xooqqinotanna Saaoolinna oososi reyitinota affe, katammansa agurte ba'eenna, Filisxeemootu dagge amaddu.

⁸ Layinki soodo Filisxeemootu reyitinore mulqidhara dagganno woyite, Saaoolinna sasunku oososi reeshshi Gilboa Ilaalira uwe nooha affu.

⁹ Hakkunni gedensaanni Saaooli umo murte, bagadosinna olu imaana adhite, qeellete duduwo magannansaranna manninsara kulanno gede manna sokku.

¹⁰ Saaooliha olu bagado maganinsa mine massite wortu; umosi kayinni massite maganinsa Daagooni mine suttu.

¹¹ Geleaadi Yabiisi Katamira hee'ranno manni baalu, Filisxeemootu Saaooli assitinota macciishshe,

¹² bareedu manni mare Saaoolihanna oososi reeshsha haa're Yabiisi abbe qilxote hunda madaare, 7 barra ita aga agure manchiti.

^13-14 Saaooli reyinohu Kaaliiqira ammanama hoogino daafiraati. Kaaliiqi hajajo wonsha giwino; Maganu yaannore agadha agure ekera coyishshiishshannori ledo ma'li. Kunnira Kaaliiqi iso shee, gashshootesi Isseyi beettira Daawitira sayise uyi.