SAYIKKI YOHAANNISI 1 - Qullaawa Maxaafa

YOHAANNISI SOYINO KEERE

¹ Ani geerchu halaalunni baxeemmohura Gayiyoosira soyemmo sokka.

² Jaala'ya! Heeshsho qiniitannohe gede, gogikki fayyo ikkanno gedenna lubbokki harshammi yitanno gede huucceemmohe.

³ Halaaleho ammanamakkinna halaalunni hee'rakki roduuwu dagge kulteennae macciishshe, lowo geeshsha hagiidhoommo.

⁴ Ooso'ya halaalaancho heeshsho heedhannota macciishshatenni roorino hagiirri dinoe.

GAYIYOOSI DANCHUMMA

⁵ Jaala'ya! Egennoottokkire ikkiturono, roduuwa ammanamatenni towatoottonsa.

⁶ Insano baxillunni assoottonsare mannaho hasaabbino; xaano Maganu hagiidhanno garinni doogonsara kaa'littonsaro danchaho.

⁷ Dagatewiinni mittoreno adhitukkinni su'misira yite fultino.

⁸ Xaate halaalu loosira gutammeemmo gede hattoo manna kaa'la hasiissannonke.

DIYOXIRAAFIISI HEELAATAMANNA DIMEXIROOSI GALATAMA

⁹ Beetekiristaanete sokka borreessoommo; ikkollana albiidiha ikka hasi'rannohu Diyoxiraafiisi haa'ra giwinonke.

¹⁰ Kunnira ki'newa dayemmo woyite, xonanninkenna shollishanninke loosanno looso baala baalunkura kuleemmo. Hakkonne calla ikkikkinni roduuwano dihaa'ranno; haadhannoreno hoole insano beetekiristaanetenni fushshe shorranno.

¹¹ Jaala'ya! Dancha ikkinnina busha labbooti; danchare assannohu Maganunniho; bushare assannohu kayinni Magano diafino.

¹² Dimexiroosire mannu baalu farci'ranno; halaalunku farci'rannosi. Isire ninkeno farci'neemmo; farci'neemmo coyino halaale ikkinota afatto.

JEEFOTE KEERE

¹³ Borreesseemmohehu lowo coyi nooe; ikkollana borreesse soyammohera dibaxoommo.

¹⁴ Muli yanna giddo xaandeemmo gede hexxo nooe; hakka woyite gamba yine hasaambeemmo.

¹⁵ Keeru ledokki hee'ro. Jaallanke keere dhaantinohe. Jaallanke mittu mittunkura keere iillishie.