ROSIISAANCHO 6 - Qullaawa Maxaafa

¹ Kalqete aana mannaho lowo geeshsha ayirrinoha wole busha coye afoommo.

² Maganu mannaho jiro, qiniitenna ayirrinye aanno; hasiisannore mittoreno dixeisanno. Ikkollana jirosinni hagiidhanno gede kaayyo diuyinosi; isi daafurroha wolu itanno. Kunino haafaho; lowo geeshsha dadillisannoho.

³ Mittu manchi 100 ooso iliro, lowo dirono hee'riro, kayinnilla wodanisi harshammi yaa hoogironna, garunni madaarama hoogiro, isinninni ama godowa kisidhinohu woyyate.

⁴ Hakku, ama godowa kisidhinohu, mulla haafa ilame tunsicho ha'ranno; su'misino hawame gatanno.

⁵ Arrishsho la"a hoogironna, mittoreno afa hoogiro nafa, hakko manchinni roore fooliishsho noosi.

⁶ Hakku manchi hagiidhikkinni 2,000 diro hee'riro nafa, lamunku martuwa marte mitto darga hadhanno.

⁷ Mannu daafurannohu kokkesiraati. Ikkollana, «Duuwoommo» diyaanno.

⁸ Egennaamu gowwa mayinni rooranno? Buxichu hee'nanni gara afasinni maricho lexxanno?

⁹ Kunnira, lexxate haafamantenni, noohunni hagiidha woyyate. Kunino haafaho; diilallo cu'mate gedeeti.

¹⁰ Ikkannohu baalu albanni ikkanno yinoonniho; mannu ikkannoti albanni anfoonnite. Ayino jawaantetenni roorannosihu ledo yekkeeramara didandaanno.

¹¹ Coyi bati'ri deerrinni, gowwimma lexxitanno; kunino mannaho kaa'lannori dino.

¹² Caalu gede ikkite sa'anno yanna tenne haranchotenna, tidhitinokkite giddo mannaho woyyannore afinohu ayeti? Woy kayinni reyihu gedensaanni tenne kalqera ikkannore, mannaho kula dandaannohu ayeti?