ROSIISAANCHO 5 - Qullaawa Maxaafa

MUDDANTE AFOO FULTOOTI

¹ Maganu minira eatto yannara qaafokki agadhi. Macciishshate shiqa gowwootu shiqishshanno kakkalonni roortanno. Insa bushanna dancha badde diegentino.

² Coyi'rate muddantooti; Maganoho mitore aate muddante xano xa'nitooti. Maganu gordoho no; ati kayinni baattote aana nootto. Kunnira, batinye coye coyidhooti.

³ Jawaawurru loosu batinyinni daannonte gede, manchu gowwimma coyisi batinyinni anfanni.

⁴ Maganu gowwootunni dihagiidhannona, Maganoho xa'nittoro rakke xanokki wonshi'ri.

⁵ Xano wonshattokkiha ikkiro kayinni xa'na hoogittoro woyyate.

⁶ Cubbu giddora eessannohena, arrawikki hasi'rire coyi'rara worte agurtooti. Hatto assite ka'e, Maganu Mini soqqamaanchira, «Afummokkinni xa'noommo» yitooti. Maganu arrawikkinni kainohunni loosi'roottore hunara mayira hasi'ratto?

⁷ Haaqeete batinyinna coyi batinyi haafaho. Kunnira Magano ayirrisi.

JIRONO HAAFAHO

⁸ Mitte gobbara buxane beebba assi'nannanna halaale dawinsanna affe dhaggeeffattooti. Rooreho rooru no; insa wo'munkura aleenni hige la"annohu no.

⁹ Moote nafa baatto loonse gamba assinoonni jajjinni hee'ranno.

¹⁰ Woxe baxannohura woxu di"ikkannosi; duroo'mara hasi'rannohu diduuwanno. Kunino haafaho.

¹¹ Jiro batidhu deerrinni, itannohu bati'ranno; illetenni la"ate ka'aanni, loosi'rinohu maa lexxanno?

¹² Loosanno manchi kayinni, iti geeshshano itiro, coommino goxicho goxanno; dureessaho kayinni jirosi goxano diuyitannosi.

^13-14 Kalqete aana mitto dadillisanno coye afoommo. Hakkuno, mannu bushu barrira ikkitannoe yee lowo jiro gamba assi'ranno. Tini jirono hedeweelcho gooffe beettoho sa'ukkinni gattanno.

¹⁵ Mannu amasi godowi giddonni mullu ilaminonte gede, galagale mullu higanno. Daafurisi giddonni mittoreno anga adhe diha'ranno.

¹⁶ Ilamino garinni mulla anganni galagale ha'rasi dadillissannote. Daafurisi baalu diilallo cu'mate gedeeha ikke gatanno.

¹⁷ Dirosi baala tunsichunni, yaaddotenni, caaccaawatenni, aaramatenninna dhiddotenni gudanno.

¹⁸ Kuneeti ani afoommohu danchunna biifino coyi, mannu Maganu worinosi geeshsha kalqete hee're loosi'rinoha itanninna aganni hagiidhate.

¹⁹ Maganu mannaho jironna qiniite uyisironna, kunninni hagiidhanno gede assisiro, daafurisi gumira galaxxannoha ikka hasiissannosi. Tinino Maganu uyino eltooti.

²⁰ Maganu wodanaho hagiirre worinosihura, mannu heeshshosi daafira diyaadanno.