ROSIISAANCHO 4 - Qullaawa Maxaafa

¹ Xaano kalqete aana assinanni beebba afoommo; gadadantinori sheshifachishannonsaha hoogge wi'litanna laoommo. Roorre baala gadadissannonsarita ikkitinohura kaa'lannonsaha diafidhino.

² Anino, «Xa lubbotenni noorinni roore alba reyitinori ba'raadhinoreeti» yoommo.

³ Wo'munkunni roore kayinni horo ilaminokkihunna kalqete aana assinanni beebba lainokkihu ba'raa'rinoho.

⁴ Qoleno mannu halchinore afi'rate daafure loosanno gara baala laoommo; mannu hatto ikkannohu olliichosi hinaasino daafiraati. Kunino haafaho; diilallo cu'mate gedeeti.

⁵ Anga xaaxi're ofollannohu cee'maleessu hudetenni reyanno.

⁶ Ikkollana, lamente anganni loonsanni haafamantenni wodanu fooliishsho ledo, mitte anganni loonsoonnihu shiimu rooranno. Kunino diilallo cu'mate gedeeti.

⁷ Xaano tenne kalqera nooha haafu coye afoommo.

⁸ Callisi hee'rannoha mitto mancho afoommo. Ila woy rodoo diafi'rino; loosisi kulle didandiinanniho; noosi jirono illesi la'e diduubbino. «Togo daafureemmohu ayeraati? Umo'ya hagiirruwiinni mayira hooleemmo?» yee diegennino. Kunino haafaho; wottote heeshshooti.

⁹ Loosi're dancha guma afi'rate, mitto calla ikkantenni lame ikka woyyitanno.

¹⁰ Mittu uwiro mittu kayisanno. Uweenna kayisannosihu nookkihura aanne'e!

¹¹ Qiidu yannara lamu mitteenni goxxuro iibbannonsa. Callisi goxannohura hige maminni iibbannosi?

¹² Mittu manchi callichisi dandaannokki dano, lamu ittisa dandiitanno. Sase qiqqishonni gannoonni siiwo rakke dita'anno.

¹³ Seejjo adhannokkihunni gowwu geerchu mootenni, busulu buxichu wedellichi woyyanno.

¹⁴ Kuni wedellichi, usurunni tidhaminoha woy gashshootisi giddo buximatenni ilaminoha ikkara dandaanno.

¹⁵ Tenne kalqera hee'ranno manni baalu mootete darga amadanno wedellichi hoode ha'ranna laoommo.

¹⁶ Isi moohe gashshanno manni, kiiro diafi'rinoho. Isi gedensaanni daanno manni kayinni iso dijajanno. Kunino haafaho; diilallo cu'mate gedeeti.