ROSIISAANCHO 11 - Qullaawa Maxaafa

EGENNAAMU ASSANNORE

¹ Sagalekki wayi aana tugi; lowo barri gedensaanni, galagalchite afi'rattona.

² Baattote aana bushu coyi mayi daannoro diafoottona, Jirokki 7 woy 8 darga beekke wodhi.

³ Wayi gomichu giddo wo'mihu gedensaanni xeena ikke dirranno; haqqu wodiidira woy aliyyera hige uwiro, hakko uwinowalla hee'ranno.

⁴ Bubbete raga galaalchannohu diwixi'ranno; gomicho la"annohu dimixxanno.

⁵ Bubbete gara afoottokkinte gede, lubbo woy foolu amate godowi giddora hiitto ikke eannoro diegennootto. Hattonni, wo'manka kalaqino Magani loosanno gara afa didandaatto.

⁶ Kuni woy ku'u woyyannoro, woy wo'munku seyannoro afoottokki daafira, soodono wixi; hashsha geeshshano wixa agurtooti.

⁷ Xawaabbu danchaho; arrishsho afa illete hagiirsiissanno.

⁸ Mannu lowo diro hee'rirono, hee'rino diri baalunkunni hagiidho. Kayinnilla, tunsichu diri roore ikkannota qaagona. Daannori baalu haafaho.

ANJEKKINNI HEEDHE KALAQAANCHOKKI QAAGI

⁹ Ati wedellichu, wedellichimmakkinni tashshi yoohe; wedellichimmakki yannara wodanikki hagiidho; wodanikki hedinoha, illekki la'inoha assi. Ikkollana kunni baalunku coyira Maganu yoote shiqishannohetano habbooti.

¹⁰ Anjenna wedellichimma mulenni sa'annotena, yaaddo wodanikkinni, qarra abbannore manninatikki aaninni hoo'li.