QOLASIYAASI SOKKA 3 - Qullaawa Maxaafa

KIRISTOOSINNI HAARO HEESHSHO AFI'NANNI

¹ Xa Kiristoosi ledo reyotenni ka'inoonniha ikki geeshsha, Kiristoosi Maganu qiniiteenni ofolle noowa iima gordoho nooriwa wodana'ne hakko gashshe.

² Wo'manka woyite iima gordoho noo coye hedde ikkinnina, tenne gobbare heddinoonte.

³ Ki'ne reyitinoonni; heeshsho'neno Kiristoosi ledo Maganunniwa dahaabbe no.

⁴ Heeshsho'ne ikkinohu Kiristoosi leellanno yannara, ki'neno isi ledo ayirrinyunni leeltinanni.

AKKALANNA HAARO HEESHSHO

⁵ Kunnira uullate aana noota tenne gobba yorto duucha shiiyye. Hakkurino foorrete, battaawate, maalu yortote, busha halchooti, kaphu maganna magansi'rate yortooti.

⁶ Kunninni kainohunni Maganu hanqi hajajantannokki ooso aana daanno.

⁷ Ki'neno kunni albaanni hajajantannokkiri ledo heedhine hattoo coye assitinanni keeshshitinoonni.

⁸ Xa kayinni hanqo, aara, bunshe, xono, afimala hasaawa baala suume'nenni hunne.

⁹ Mimmiti'ne ledo kapho coyidhinoonte. Akkala mannimma loosise ledo mulqitine tugginoonnina.

¹⁰ Kalaqinohu daninni egennotenni haaroo'mitannota haaro mannimma uddidhe.

¹¹ Hakkiicho Giriikichunna Ayihudichu, barciminohunna barciminokkihu, allaggichunna fiixu borojjichu woy biilu dino. Kiristoosi kayinni wo'manko; wo'munku giddo no.

¹² Xa Maganu doodhino manni gede qullaawootanna baxantinoonnire ikkitine mararro, joongille, shaqqille, shooshanqenna cinca, uddanote gede assitine uddidhe.

¹³ Ki'ne ki'neneewa koffi yitinoonni coye baala cincatenni agurre. Kiristoosi agurino'nente gede, ki'neno mimmiti'nera agurre.

¹⁴ Kuri duuchunku aleenni duuchanka xaadise, wo'ma mittimma aannoha baxille uddidhe.

¹⁵ Mitte mannimma biso ikkitine woshshantinoonnihu keerehootina, Kiristoosi keeri wodani'nera mooho. Galatu mannano ikke.

¹⁶ Maganu qaali wo'me hee'ro'ne; egenno baalatenni mimmito'ne rosiissenna seejje. Faarsotenni, guwishshunninna, geewotenni, Magano wodani'nenni galattinanni faarse.

¹⁷ Magano Anna isinni galattinanni coyi'ratenni woy loosunni assitinannire baala Mootichu Yesuusi su'minni asse.

AMMA'NINO MINI MANNI HEESHSHO

¹⁸ Ki'ne meento! Mootichu albaanni hasiisanno coye ikkino daafira minaanni'nera hajajamme.

¹⁹ Ki'ne labballo! Minaama'ne baxxe; kakkachoota ikkitinoontensa.

²⁰ Ki'ne ooso! Mooticha hagiirsiisanno coye ikkino daafira, baalunku coyinni iltino'nerira hajajammensa.

²¹ Ki'ne iltinoonniri! Dadillaamma ikkitannokki gede, ooso'ne caacceessitinoontensa.

²² Ki'ne faantootu! Biilla'nera baalunku coyira hajajamme; insa hagiirsiissinara yitine leellamate ikkikkinni, taalu wodaninni Mooticha waajjitinanni ikkona.

²³ Assitinannire baala mannaho ikkikkinni Mootichu Yesuusira assitinannihu gede taalu wodaninni asse.

²⁴ Mootichuwiinni iqqa ba'raarshu gede assitine adhitinannita affinoonni. Soqqantinannihu Mootichu Kiristoosiraati.

²⁵ Maganu yoo dassannokki daafira, busha assannohuno loososi mixxanno.