NEHIMIYA 9 - Qullaawa Maxaafa

ISRAEELETE MANNI CUBBONSA AAGINTAAWI

¹ Hakko aganiranni lemiina shoolki barra Israeelete manni mittowa gamba yii. Cubbinsara gaabbansanna dadillansa egensiisate xiddu uddano uddidhe, uminsa aana buko giggishshidhe itanna aga agurte qatuntu.

² Wole gobba manni ledono xaada agurtu. Hakkunni gedensaanni, baalunku ka'e uurrite uminsanna akaakkansa loossino cubbo baala aagintaabbu.

³ Hakkiicho uurritino gedeenni Maganinsa Kaaliiqi seeri maxaafa 3 saate wo'ma nabbambinsa. Wole 3 saateno cubbonsa aagintaabbanni Maganonsa Kaaliiqa magansidhu.

⁴ Leewaawootaho fulte uurritanno tullichi noonsa. Kunni aana Iyyaasu, Baani, Qadimieeli, Shebaaniya, Buuni, Sherebiya, Baaninna Kenaani uurrite qoonqonsa naggi assite Maganonsa Kaaliiqa huuccidhu.

⁵ Iyyaasu, Qadimieeli, Baani, Hashebaaniya, Sherebiya, Hoodiya, Shebaaniyanna Fetahiya yinanni Leewaawooti, «Ka'ine uurritine Magano'ne Kaaliiqa galatte; Kaaliiqa hegere hegerera guwissesi. Mannu guwishshi jawimmasi gudise leellishate guutinokkiha ikkiro nafa, ayirradu su'miha Kaaliiqa guwissesi» yitu.

AAGINTAAWATE HUUCCATTO

⁶ Kunni baalu gedensaanni Israeelete manni, «Kaaliiqa, ati callu Maganoho; ati gordonna gordu beeddahe kalaqootto. Baattonna baara, giddonsa noore baala kalaqoottohu ateeti; baalunkura lubbo woroottonsa. Gordu olanto baala heeshshi yite magansidhohe!

⁷ Kaaliiqa Magano, ati Baabilooninni Uuri yinanni baattonni, Abiraami doorte kawiichira abbittosi; su'masino soorrite, ‹Abirihaami› yite fushshoottosi.

⁸ Isino atera ammanaminoha ikkinota afootto; isi ledo gondooro eootto; Kana"aanootu, Hitootu, Amooraawootu, Ferizootu, Iyaabuusootunna Gergesootu heedhannota, Kana"aanootu baatto sirchisira iqqa assite aate xaaritto; ati ammanamoottoha ikkoottohura eootto gondooro seekkite agarootto.

⁹ «Ati akaakkanke Gibitsete heedheenna iillinonsa qarra laootto; Duumu Baari mule heedhe, kaa'lattonsara shiqishidhino huuccatto macciishshootto.

¹⁰ Gibitsete moote aana, roorrootisinna baattosira hee'ranno manni baalu aana, dhaggenna maalale leellishootto. Hatto assoottohuno insa mannakki assite gadadissino gara afoottohuraati; hatto assakkinni techo geeshsha su'mikki maccaha ikkino.

¹¹ Baara lamewa beekke doogo seekkite, mannakki moola baatto aanaanni qolte sayisootto. Kincho baaru diimera tungannihu gede, mannakki shorrino diina, baaru giddo itame ba"anno gede assootto.

¹² Barra gomichunni massagoottonsa; hashsha bubbanno giiranni doogo xawisoottonsa.

¹³ Gordunni dirrite mannakki Siina Ilaalira hasaawisootto. Dancha doogo kulannoha halaalaancho seeranna dancha woga oottonsa.

¹⁴ Qullaawa Fooliishshote Barrakkino ayirrissanno gede rosiisoottonsa; soqqamaanchikki Muse widoonni amanyootekki, hajajokkinna seerakki oottonsa.

¹⁵ «Hudidhu yannara sagale gordunni oottonsa; goodhu yannarano waa kinchu giddonni fushshoottonsa. Aattonsara xaarootto baatto, amaddanno gede hajajoottonsa.

¹⁶ Akaakkanke kayinni boonaleeyyenna hettisamaano ikkitino; hajajokkino ayirrisa gibbino.

¹⁷ Hajajantannokkire ikkitino; assoottonsa dhagge baala habbino. Boo'nansanni kainohunni qoxxisante, giddonsanni albisa doodhite, galagalche Gibitsete borojjimmara haa're ha'rannonsa gede assitino. Ati kayinni baxillu wo'minoheha, hanqate muddamattokkiha, mararattohanna maarattoha, maarokkino batidhino Magano ikkootto daafira, daguroottonsa.

¹⁸ Insa siitu misilenni kaphu magano uminsara seekkidhe, ‹Gibitsetenni massage fushshinonke magani konneeti› yitino. Magano'ya, su'makki lowo geeshsha xonsiissino.

¹⁹ Ikkollana, maarokki bati'ra ikkitino daafira, hattenne halallitte gobbara dicallachishoottonsa. Wo'manka woyite barra gomichunni, hashsha giiratenni massagoottonsa.

²⁰ Danchummakkinni assate hasiisannore baala kuloottonsa; ittannota ‹Menna› yinanni sagalenna agganno waano uyittonsa.

²¹ Shoyilloo diro wo'ma halallitte gobbara hadhanna, hasiisannonsare baala qixxeessoottonsa; uddanonsano digooffino; lekkansano didarshitino.

²² «Dagate gashshootenna mootoolla qeelte, baattonsara aantino gobba amaddanno gede assootto. Moote Sewooni gashshinota Hasebooni baatto qeelte amaddino; moote Aagi gashshinota Baasaani baatto ragidhino.

²³ Gordu beeddahe gede batinye ooso oottonsa; akaakkansara aattora xaarootto baatto amadde heedhanno gede assoottonsa.

²⁴ Oosonsa Kana"aani baatto amadde heedhino; hakkiicho heedhanno gosa ati qeelootto. Mootoollatenna hattenne Kana"aani gobba manni aana, hasidhinore baala assitanno gede wolqa oottonsa.

²⁵ Mannikki qiinshoonni katamma, shaqqado baatto, jirote wo'mitino minna, umantinota wayi bu'a, ejersu zayitenna woleno laalannohanna woyinete haqqe baala amadino. Itte duubbe maqayeno du'mitino; shaqqillikkinni oottonsahu danchu coyi baalunni hagiidhitino.

²⁶ «Mannikki kayinni atera haxawarre, qaalikkira hajajama giwino; seerakkino macciishsha giwate badhe wodhino. Qorophisiisse atewa higganno gede kultinonsata himanaanokki shiino; yanna yannantenni ate su'ma xonsiisatenni dieemaramino.

²⁷ Kunnira, diinnansa qeelte gadadissannonsa gede sayisse oottonsa. Qarrantanno yannara kaa'lo afi'rate atewa raartino; atino gordoho heedhe macciishshoottonsa. Maarokki batinyinni kainohunni, diinnansawiinni gatissannonsa albisoota soottonsa.

²⁸ «Ikkollana, keere afidhanni heedhenni, galagalte cubbo loossino; atino galagalchite qeelte gashshitannonsa diinnara sayisse oottonsa. Qarrinsa yannara kaa'lo afi'rate atewa higge raartino; atino gordoho heedhe macciishshoottonsa; maarokki jawimmanni kainohunni yanna yannantenni gatisoottonsa.

²⁹ Seerikkiwa higganno gede qorophisiisoottonsa; seerakki agadha heeshshote doogo ikkituro nafa, insa kayinni, boo'natenninna haxawarrimmatenni seerakki wigidiidde tuggino. Atera badhe wodhite, wodanansano mokkookkisse macciishsha gibbinohe.

³⁰ Lowo diro cincatenni qorophisiisoottonsa; Ayyaanikkinni himanaanokki widoonni qolte qorophisiisoottonsa; mannikki kayinni macca duwe giwino daafira, ollaansa ikkitino dagara sayisse oottonsa.

³¹ Qolteno ati mararattohanna maaratto Magano ikkoottohura, agurattonsaranna hunattonsara dihasi'rootto.

³² «Maganonke Kaaliiqa ballo, ati jawaho, wolqaataamohonna ayirradoho! Baxillunniha gondoorokkino hegere geeshsha disoorratto. Asoori mootoolla ninke gadadisa hanaffu yannanni kayise, xaa geeshsha iillinonke qarri bati'rahona, ajishshe la'ooti. Mootoollankenna albisootinke qeesootinkenna himanaanonke, akaakkankenna manninke baalu addintanni shetino; ninke baalunku shentoommo garano qaagi.

³³ Ninke qorichishate assoottori baalu garaho; ninke sao assinummorono, ati ammanamakki dixeisootto.

³⁴ Akaakkanke, mootoollanke, albisootinkenna qeesootinke, seerakki diagadhitino; oottonsa hajajonna qorophishiishsha dimacciishshitino.

³⁵ Ati oottonsatera shaqqadotenna hala'lado baattora heedhanno yannara, mootoolla maassokkinni gashshite heedheennansanni, busha doogonsanni higge atera disoqqantino.

³⁶ Kunninni kainohunni, kuneeti ati akaakkanke laalchose ittanno gede oottonsatera, dancha baattora borojje ikkinoommo.

³⁷ Ninkeno cubbo loosankenni dadillinsoommohehura, ninke aana gashshaano assite kayisootto mootoollara, baattote atoote gabbarranni hee'noommo. Insa ninkenna saadanke aana baxisinsare assitanno; kunninni kainohunni lowo shetto giddo hee'noommo!» yee huucci'ri.

MANNU ASSI'RINO SHEEMAATE

³⁸ Kunni garinni ninke Israeelete manni baalunku sheemaantummohu gedensaanni borreessineenna roorrootu, Leewaawootunna qeesootu farrantino.