NEHIMIYA 2 - Qullaawa Maxaafa

ARXEKISIISI NEHIMIYA YERUSAALAME HA'RANNO GEDE FAJJISI

¹ Arxekisiisi moohihunni lemiikki diro Nisaani yinanni aganira mitto barra, mootete woyinete xajje haa're shiqishoommo. Hakkunnira albaanni moote albi'ya aana dadillu malaate afe diegennino.

² Kunni daafira, «Dhiwamittokkinni albikki mayira xawulushshi yiino? Kuni wodanu dadilleeti ikkinnina wole di"ikkino» yiie. Anino lowo geeshsha waajjummo. Ikkollana mootete,

³ «Moote, ati hegerera hee'ri! Akaakka'ya madaarantino katami diigameenna huxxu cufannano giirante gooffeenna hiitto dadilla hoogeemmo?» yee dawaroommo.

⁴ Mooteno, «Xa ma"assinahera hasi'rattoyya?» yee xa'mie. Anino Gordu Magano huucci'rummohu gedensaanni,

⁵ mootete, «Moote, ati maahoyye yiittoeronna baxattoeha ikkiro, akaakka'ya madaarantinowa Yihudaho noo katama Yerusaalame ha'reemmo gedenna, isono galagalche mineemmo gede fajjie» yee huucci'rummo.

⁶ Hattenne yannara, mootitte mootete mule ofolte heedheenna, mooteno xa'mo'ya haa're, «Doogokki mageeshshi yanna adhitannohe? Mamoote higatto?» yee xa'mie. Anino mageeshshi yanna adhitannoeronna mamaro higeemmoro kulummosi.

⁷ Hakkiichinni aanche, Yihuda sa"ate fajjitannoe gede Efiraaxisi Awuraajji Galchimihu gashshaanora borrote sokka aannoe gede moote xa'mi'rummo.

⁸ Hattono Asaafi yinannihu, mootete dubbo agarannohu, Qullaawu Mini huxxi waalchira katamu huxxiranna ani galeemmo minira ikkitanno haqqe kadhate borrote sokka uyinannie gedeno xa'mi'rummo. Dancha Maganu anga ledo'ya noo daafira, moote xa'mi'roommore baala uyie.

⁹ Mooteno shiima olu hajajaanonna faradaano ane ledo hadhanno gede assi. Anino Efiraaxisi Awuraajja Galchimiha hige ha'rummo. Hakkiichira iillanni hee'renni, borrote sokka gobbate gashshaanora uummo.

¹⁰ Kayinnilla, Beetihorooni Katamira hee'rannohu Sanbalaaxinna Amooni gobba roorrichi Xobbiya, Israeelete mannira dancha coye assanno manchi dayinota affe lowo geeshsha hanqitu.

NEHIMIYA YERUSAALAMETE HUXXA GAANGAAWE LAI

¹¹ Ani Yerusaalame iille, hakkiicho 3 barra fooliishshi'roommo.

¹² Yerusaalamete looseemmo looso baala, Maganu wodani'yara worino coye ayerano kulummokkinni keeshshoommo. Hakkunni gedensaanni, miilla'ya giddonni shiima manna hoode adhe hashshu mereero fuloommo. Ani gulufe noommo harricho agurranna, wole saada dinonke.

¹³ Lagichu huxxi waalcho fule, «Dhudhuufu Buicho» yinannite widoonni hege, wodiidoonni ishine tunganniwa maroommo. Yannano hashshaati. Saeemmo woyite diigantinota katamu huxxuwanna giirante gooffinota huxxu waalchuwa laoommo.

¹⁴ Hakkiichinnino sae, katamaho soojjaatoonni aliyye ragira, «Buichote Waalcho» yinanniwanna mootete kofamewa maroommo. Kayinnilla, gulufoommo harrichi diigantino kinna aanaanni hige sa"anno faro diafi'rino.

¹⁵ Kunni daafira, hashsha Qedirooni Waa dirre huxxa la"anni sae ha'roommo. Goofimarchohono hattenne dayommo doogo hige lagichu huxxi waalchi widoonni katama eoommo.

¹⁶ Gobbate aana heedhanno roorrooti mereero, hiikko noommoronna ma"assoommoro afinohu dino. Hatte yanna geeshsha, Ayihudootu miilla'yara, qeesootaho, albisootahono ikko roorrootaho woy ledo loossara hendoonniriranna wolu mannirano kuloommori mitturino dino.

¹⁷ Xa kayinni insara, «Xaate noo qarra baala la'e. Kuneeti, Yerusaalame diigantino; huxxu waalchuwano giirante gooffino. Kunnira, xa amme ka'ne katamu huxxa huxxine, iillinonke saala hoo'lino!» yoommonsa.

¹⁸ Hakkiinni aancheno, dancha Maganu anga ledo'ya noota, asse kaa'linoe garanna moote kulinoere baala egensiisummonsa. Insano, «Galagalchine minno!» yituehu gedensaanni, looso danchu garinni hanafate qixxaabbu.

¹⁹ Kayinnilla, Sanbalaaxinna Xobbiya hattono Geesaami yinannihu mittu Arabichi ninke fushshinoommota loosu qixxeesso macciishshitu yannara, qacifattanninna oso'litanni, «Ma"assitinanni heedhinoonniro affinoonni? Woy mootete aana ka'inara hasidhinoonnini?» yite xa'mitunke.

²⁰ Anino, «Gordu Magani loosonke qineessannonke; ninke isi soqqamaanooti; kunnira looso hananfeemmo. Ki'nera kayinni, Yerusaalamete gutu, doyichonna wogate karsi dino'ne» yee dawarummonsa.