NEHIMIYA 13 - Qullaawa Maxaafa

ISRAEELE AMOONOOTANNA MOAABOOTA GOBBANSANNI FUSHSHITE HA'RISSU

¹ Hakko barra Seerunniha Muse Maxaafa mannaho nabbambanna, «Moaabootunna Amoonootu Maganu manni ledo hegerera dixaaddanno» yaanno darga anfi.

² Insa ledo xaaddannokki gede hoolloonnihu, Israeele Gibitsetenni fultu yannara doogote aana heedheenna, sagalenna waa ho'litinonsahuraati. Hakkiino sa'e runsiissansara Beleaami woxunni hidhitino. Maganinke kayinni rumo maassote soorrino.

³ Israeele konne coye macciishshituhu gedensaanni, wole gobba sircho ikkino manna giddonsanni fushshitu.

NEHIMIYA WOLERENO HAAROONSI

⁴ Qullaawa Mine, uduunnu minira annimma noosihu qeesichu Eeliyaashiibi Xobbiya ledo seedu diri jaalooma afi'rino.

⁵ Kunnira, seeru garinni Leewaawootaho, faarsaanotenna agaraasinete uyinoonninsaha gidu fushshaatenna hixaana, uduunne, gidunniha, haaro woyinehanna zayitenniha tonnunni mitto qeesootaho uyinanni fushshaate worranniwa hee'ranno gede fajjisi.

⁶ Ani kayinni hatte yannara Yerusaalamete dinoommo; Baabilooni moote Arxekisiisi moohihunni sajjiina layinki diro galagale mootenniwa ha're noommo. Shiima yanna gedensaanni moote fajjo xa'mi're,

⁷ Yerusaalame dayommo. Daanni hee'renni, Eeliyaashiibi Xobbiyara Qullaawu Mini giddo mitto darga uyinosita afe masummo.

⁸ Aarame Xobbiya uduunne baalankanni mininni fushshe wigidiide tugummo.

⁹ Hakkonne dargano fiite keereensitanno gede hajajummo. Dargankonni Maganu Mini uduunne, gidu fushshaatenna hixaana galagalche worummo.

¹⁰ Hakkunni gedensaanni, Leewaawootunna faarsaano hasiisannonsare aa hoongeenna agurte baattonsa loosidhara hadhinotano afummo.

¹¹ Anino, «Maganu Mine mayira lashshi assine agurri?» yee roorroota boroorummo. Leewaawootanna faarsaanono darga dargansa qole soqqantanno gede assummo.

¹² Hakkunni gedensaanni mannu baalunku gidunniha, haaro woyinehanna zayitenniha tonnunni mitto miinju minira haa're abbi.

¹³ Uduunnu minira qeesicha Shelemiya, seeru rosiisaancho Saadooqinna Leewaawicha Pedaya woroommo. Maataaniya beetti beetti Zakuuri ilinohu Hanaani kaa'laanchonsaati. Insano loosu miillansara hasiisannore beehate ammanantinoreeti.

¹⁴ Magano'ya ballo, minikkiranna minikki soqqanshora assoommoha dancha coye habbootie.

¹⁵ Hatte yannara Yihudaho Fooliishshote Barra, woyine huuncitannore, gide, woyinete xajje, woyinete laalo, balasenna addi addi hogowo harrete hogophite Yerusaalame daggannore afe, Fooliishshote Barra mittoreno hirtannokki gede qorophisiisummo.

¹⁶ Qoleno, Yerusaalamete noohu Xiroosi gobba manni, qulxu'menna addi addi uduunne abbite Fooliishshote Barra Yerusaalamete Yihudu mannira hirtu.

¹⁷ Anino Yihudu gashshaano, «Kuni assitinannihu bushu coyi maati? Fooliishshote Barra mayira batteessitinanni?

¹⁸ Annuwa'ne togo assiteenna Maganinke ninkeranna kataminkera busha coye diabbino? Ki'neno Fooliishshote Barra batteessitine Israeelete hanqo abbitinanni heedhinoonni» yee boroorummonsa.

¹⁹ Hakkunni gedensaanni, Fooliishshote Barri eara albaanni leeshshi yee hee'reenna, Yerusaalamete waalchuwa cufantanno gede, Fooliishshote Barri sa"a geeshsha fa'nantannokki gedenna mittoreno haa'ne Yerusaalame abbinannikki gede agaranno manna worummo.

²⁰ Daddalaasine Arbete hawarro uduunnensa anga adhite Yerusaalamete gobbaanni uurrite heedheenna mitteegenna lameege afoommo.

²¹ Anino, «Huxxaho gobbaanni mayira galtinanni? Tenne'ne agurtinannikkiha ikkiro, dieleemmo'ne» yuummonsa. Hakkunni gedensaanni Fooliishshote Barra daa agurtu.

²² Leewaawootu umonsa keereensidhanno gede, dagge waalchuwa agartanno gedenna Fooliishshote Barra ayirrissanno gede kulummonsa. Magano'ya tenneno habbootie; bagamannokkihu baxillikkinni laie.

ISRAEELE WOLE GOBBAHA MEENTONSA HA'RISSU

²³ Hatte yannaranni, Ashidoodi, Amooninna Moaabi gobba seenne adhitino Yihudooti noo gede afummo.

²⁴ Gamisa oosonsa, Ashidoodi gosahunninna wole gobba qaalinni coyidhanni no. Ninke qaaleno diegentino.

²⁵ Konne mannano borooroommo; rumoommo. Gamisa gane dananchonsano ciroommo. Hakkunni gedensaanni, insanna oosonsa wole gobba manni ledo adhantannokki gede Maganu su'minni xaarsiisoommo.

²⁶ Qoleno, «Israeelete moote Selemooni ditogoo cubbo loosino? Daga baalate mereero isi gedee moote nooni? Maganuno baxe Israeele baalate aana moohisinosi. Hakko iso nafa wole gobba meenti so'risiisinosi.

²⁷ Ninkeno Selemooni gede wole gobba meento adhatenni Maganinke aana sao assinoni?» yuummonsa.

²⁸ Qeesootu roorrichi Eeliyaashiibi beetti beetti Yoyadai ooso giddonni mittu, Beetihorooni Katamira hee'rannohunnita Sanbalaaxi beetto adhino. Yoyadai Yerusaalametenni shorroommo.

²⁹ Magano'ya qeesinatinsaha, qeesootunnihanna Leewaawootu gondooro batteessitinore habbooti.

³⁰ Hakkunni gedensaanni, allaggichu coyi baalunkuwiinni keereensummonsa. Qeesootunna Leewaawootu looso loosonsa affe soqqantanno gede assoommo.

³¹ Yanna yannantenni kakkalote ikkitanno haqqe shiqinshanni garanna umi laalcho shiqinshanni gara biddi assoommo. Magano'ya ballo, assoommore qaagge maassi'rie.