MIKIYAASI 7 - Qullaawa Maxaafa

ISRAEELETE MANNI SAALU AANA UWI

¹ Ani laalo xinqi'nihu gedensaanni gatino xaro yorannoha ikkoommo; hakkunni dinona anera aanne'e.

² Magano baxannohu danchu manchi baattote aana horontanni dino. Mannu mereero taashshannohu dino. Wo'munku mannu mundee dunate duganno; mittu mittunku umisi fiixa woshshaadara faana gananno.

³ Bushino coye assate addintanni busulootaho. Gashshaanchunna daanyu gubbo ita hasidhanno. Roorrichu yorinore kulannonsa gashshaano, yortosi wonshate hakkawoyintenni isi ledo mitteenni ma'litanno.

⁴ Insa giddonni, «Addinta dancha ammanaminoho» yinoonni manchi utunninna qu'muudotenni bande dila'nanniho. Himanaanote widoonni qorophisiisinonsa garinni Maganu mannasi qorichishanno yanna dagganno. Kuneeti xaano ikkiro dartu aana no.

⁵ Olliichokki woy jaalakki ammantooti. Hanqafidhe galattotera minaamakkira nafa layidhanni coyi'ri.

⁶ Hattenne yannara, beettu annasi mishanno; beetto amasera, beettu beettono ballosera diina ikkitanno. Manchoho mini manni diina ikkanno.

⁷ Ani kayinni Kaaliiqa agadheemmo. Gatisaancho'ya Magano hexxeemmo. Isino macciishshannoe.

KEERU MAGANUWIINNI DAANNO

⁸ Diina'ya, uwa'yara hagiidhitooti. Uwummorono kaeemmona. Tunsote ofollummorono Maganu caabbicho ikkannoe.

⁹ Maganu aana sao assoommo daafira, hanqosi cinca hasiissannoe. Goofimarchoho kayinni, Maganu anera coyi'rannoe. Ane aana iillitino gawajjora yoo yaannoe. Xawaabbu widirano fushshannoe. Gatisaanchimmasino laeemmo.

¹⁰ Diini'ya konne duucha lae saalfatanno. «Kaaliiqi Maganikki hiikko no?» Yaanni qacifatannehu diini'ya sholle doogote qaccera noo sabbi gede kakkadamanna ille'ya la'anno.

¹¹ Ki'ne Yerusaalamete manna, katami'ne huxxamanno yanna dagganno. Hattenne yannara, gashshooti'ne hala'lanno.

¹² Manni'ne duuchunku raginni ki'newa higanno. Daannohuno, soojjaatinni Asoori gobbanni, wodiidinni Gibitsetenni, Efiraaxisi mulinni, hattono xeertote noo wayibbanna ilaallawiinniiti.

¹³ Baatto kayinni aanase hee'ranno manni bunshenni kainohunni molo ikkite gattanno.

MAGANU ISRAEELETE MANNIRA LEELLISHINO SHOOSHANQE

¹⁴ Kaaliiqa'ya ballo, ati dooroottota gosakki, Qermeloosi dubbi giddo calluwinsa ofoltinore mannakki, iqqikki ge'reewo siqqichokkinni allaali. Albi diri gede Baasaaninni Geleaadi geeshsha allaali.

¹⁵ Gibitsete gobbanni fultu wari gede dhaggekki leellishinsa.

¹⁶ Gobbate gashshaano baala konne la'anni saalfattanno. Wolqansa mullare ikkite gattino daafira, afoo cu'midhanno. Maccansano amaxxitanno.

¹⁷ Hamasunna wolootu uullate aani da'muulla gede goshooshantanni buko laaxxanno. Qiishonsa giddonni huxidhanni fultanno. Lowo waajjanni Kaaliiqi Maganinkewa higganno. Ate waajjitanni heedhanno.

¹⁸ Cubbo agurannohu, gattinorira saonsa sayisi'rannohu, maaro aannohunna hegere baxille leellishate yee koma amadannokkihu ate gedee Magani nooni?

¹⁹ Galagalte maarattonkera cubbonke kadde, baaru diimera tugatto.

²⁰ Bi're albi dirinni kayisse annuwankera oottonsa hexxo garinni, Yaiqoobira ammanamakki, Abirihaamira bagamannokkiha baxillekki wonshi.