MIKIYAASI 3 - Qullaawa Maxaafa

MIKIYAASI ISRAEELETE GASHSHAANONNA KAPHU HIMANAANO BOROORI

¹ Ki'ne Israeelete gashshaano, konne coye macciishshe! Halaalaancho yoo afa dihasiissanno'ne?

² Ki'ne kayinni dancha coye gibbine busha coye baxxinoonni. Manna'ya uurro gogansa dultine maalansa miqichinsawiinni baddinoonni.

³ Manni'ya goga dultine maalansa murtine ittinoonni. Miqqansano hiiqqaqqitine midaanote ganfanni maali gede murmurtinoonni.

⁴ Ki'neno qarrantine Kaaliiqiwa higgine raartinanni yanna dagganno. Isi kayinni didawaranno'ne. Busha looso loossinoonni daafira huuccatto'ne dimacciishshanno.

⁵ Kaphu himanaano hasidhinore afidhannoha ikkiro, «Keeru dirranno'ne» yitanni dudubbanno. Hasidhinore afi'ra hoogganno woyite kayinni, «Dartu danno'ne» yitanni manna so'risiissanno. Kaaliiqi hatto assitanno himanaano,

⁶ «Barru hashsha ikkanno'ne; arrishsho e'eenna daanno tunsichi amadanno'ne. Manna'ya so'risiissinoonni daafira, xaate kunni ka'a ajuuja dileeltanno'ne; himanano dicoyidhinanni» yiinsa.

⁷ Ajuuja la'annorinna himana coyidhanno kaphaasine baala qinaannonsakki daafira irraabbanno. Maganuno dawaro qolannonsakki daafira waajjite anga umoho wodhite hadhanno.

⁸ Anera kayinni Kaaliiqi Ayyaanasinna wolqasi wonshinoe. Israeelete gosahu saonsanna cubbinsa mageeshshihoro egensiiseemmo gede halaalu yoo yaammora wolqanna jawaante uyinoe.

⁹ Ki'ne halaalaanchimma gibbinanniri, halaale kaphoho soorritinanniri Israeelete gashshaano konne coye macciishshe.

¹⁰ Ki'ne Maganu katama Yerusaalame mundeetenninna bunshetenni mintinanni.

¹¹ Katamu mootoollano yoo uyitannohu gubbo itteeti; qeesootinsa jajja uyinikkinni dirosiissanno; himanaanonsano woxiweello himana dicoyidhanno. Kuni duuchu ikke hee'reenna, «Kaaliiqi ninke ledo noo daafira mittu qarrino di"iillannonke» yitanni Kaaliiqa hexxitanno.

¹² Kunnira, ki'nenni kainohunni Yerusaalamete Katami loosi'nanni darga ikke gatanno. Diigame duuno ikkanno. Qullaawu Mini minamino ilaalino dubbo ikkanno.