MIKIYAASI 1 - Qullaawa Maxaafa

SAMAARIYUNNA YERUSAALAMETE QURTO

¹ Iyoaataami, Akaazinna, Hiziqiyaasi hoode hoodetenni Yihudaho gashshitu yannara Kaaliiqi Morisheeti Katamira ilaminohura Mikiyaasira Samaariyunna Yerusaalamete daafira kulinosi sokka aante noote:

² Ki'ne daga konne coye macciishshe. Uullate aana heedhinanniri baalunku wodanche. Ayirradu Kaaliiqi ki'ne aana naqqasanno. Qullaawu Minisi giddo hee're coyi'ranno.

³ Kuneeti, Maganu Qullaawu Minisinni daanni no; dirre ilaallate umi aana ha'ramanno.

⁴ Hattenne yannara giira daaqissanno gaga gede, ilaalla lekkasira woroonni daaqqanno. Roggeno lagicha dirranno wayi gede ikkitanno.

⁵ Kuni baalu ikkannohu Israeelete manni cubbo loosatenni Magano dadillisinohuraati; Israeelete manni baora kaima ikkinohu ayeti? Jawiidi katamansa Samaariya di"ikkino? Yihudu manni kaphu maganna magansi'ratenni cubbo loosanno gede assinohuno ayeti? Yerusaalame di"ikkitino?

⁶ Kunnira Maganu, «Mine diinge xawoho duunnoonni kinna gede asseemmose; woyine kaansanniwa ikkitanno; katamise giggilono lagicha qole duneemmo; xintaseno reqecci asseemmo.

⁷ Misillase baala hiiqqaqqante ubbanno; maganise minira foortannori shiqishshino afanshi baalu cancaname giiramanno. Samaariyu manni tenne misilla gamba assinohu foorretenni afi'ranno qiniitira doogo qixxeessi'raraati. Baarigaarransano culkanna birra raabbe adhite hadhe foorrete hajara qiniite assidhanno» yaanno.

⁸ Hakkunni gedensaanni Mikiyaasi, «Kunni daafira yaaddo'ya leellishate mulqi're mulla lekkanni ha'ranni yeedaalate gede ikke godoodeemmo; balgudu gede ikke raareemmo.

⁹ Samaariyu manni mada hurtannokkite. Kuni qarri Yihudahono iillanno; manni'ya nafarano kisanno» yii.

DIINU YERUSAALAME SHIQI

¹⁰ Gaati Katamira heedhanno diinnankera iillinonke qarra kultinoonte; hakko horontanni wi'litinoonte; Beeti-Ofira heerannohu ga'renke manni mereero kayinni bukote aana gongo'mitinanni wi'le.

¹¹ Ki'ne Shaafiri qachi manna, mullootu saalsiisanno garinni qafadantine hadhe. Tsanaani Katamira heedhannori katamunni fulate dijawaattanno; Beetietseeli umisi wi'late darga ikkinohura maaxamate di"injaanno'ne.

¹² Kaaliiqi Yerusaalamete bao abbanni hee'reenna Maarooti manni danchu coyi daannonke yee hiitto hexxanno?

¹³ Ki'ne Lakiishi heedhinanniri faradu gaare qixxeessidhe. Israeelete cubbi balaxe ki'newa leellinona, kunnira Yerusaalame sao assitanno gede kaima ikkitinoonniri ki'neeti.

¹⁴ Yihudu manna! Ki'ne kunni ka'a Morisheeti-Gaati Katama keerunni yiiyye. Israeelete mootoolla Akiziibi gosa kaa'lo agadhite hoogganno.

¹⁵ Maaresha Katama! Kaaliiqi diinaho sayise aannohe. Horranno diini baatto'ne adhanno. Ayirraddu Israeelete gashshaano Adulaami godira maaxantanno.

¹⁶ Ki'ne Yihudu manna! Ooso'ne qafadante hadhanno daafira, baxxinanni ooso'nera manchittine umo'ne meexxe. Umi'neno doowirchu umi gede bulla ikko.