MARRO 9 - Qullaawa Maxaafa

MANNU HAJAJAMA GIWI

¹ «Israeelete manna, macciishshe! Gordo iillanno huxxi noonsare jajjabba katamma afidhinore, ki'nenni roore jawanna jawaata daga hooltine baattonsa amaddinara Yordaanoosi Waa tayissine fultinanni.

² Hakkiicho heedhannori Enaaqootu jajjabbahonna hojjaameeyye mannaati. ‹Enaaqoota ittisara dandaannohu nooni?› yinanna macciishshitinoonni.

³ Ikkollana, uyino'ne hexxo garinni Magani'ne Kaaliiqi ittanno giira gede ikke balaxe alba'neenni fulannoha ikkinota xa affinanni. Insano hunanno; ille'nenni la'inanna qeelannonsa. Ki'neno insa rahotenni shorritine huntinanni.

⁴ «Magani'ne Kaaliiqi insa albi'nenni hoolihu gedensaanni, ‹Tenne baatto ragi'neemmo gede Kaaliiqi kawiichira abbinonkehu, keeraano ikkinoommo daafiraati› yitine wodani'nenni heddinoonte. Kunninni di"ikkino; tenne daga Kaaliiqi albi'nenni shorrannohu bunshensanni kainohunniiti.

⁵ Baattonsa martine ragidhinannihu keeraanchimma'nenni woy wodani'ne sumbenni kainohunni ikkikkinni, annuwa'nera Abirihaamira, Yisihaaqiranna Yaiqoobira aansara xaarino qaale wonshara Magani'ne Kaaliiqi tenne daga bunshensanni kainohunni albi'nenni shorrannohuraati.

⁶ Kunnira, Magani'ne Kaaliiqi tenne dancha baatto ragidhinanni gede aanno'nehu keeraanchimma'nenni kainohunni ikkinokkita buuxxe. Ki'ne haxo mokkookkootaho.

CULKU SIITO

⁷ «Magano'ne Kaaliiqa halallitte baattora hanqissinisita qaagge; horonta habbinoonte. Gibitsetenni fultini barrinni kayissine techo geeshsha Kaaliiqira maahoyye gibbinoonni gedeenni kawiichira iillitinoonni.

⁸ Siina Kaaliiqa hanqoho kakkayissinoonni; isino ki'ne hunara lowo geeshsha hanqino.

⁹ Kaaliiqi ki'ne ledo eino gondooro borreessinoonnita bonce seekkinoonni kinna haa'rammora ani ilaalu iimira fuloommo. Hakkiicho mittoreno itummokkinninna agummokkinni 40 hashshanna 40 barra keeshshoommo.

¹⁰ Kaaliiqi angasinni borreessinota 2 bocame kinna uyinoe. Xaadoho gamba yitini barra Kaaliiqi ilaalu aana, giirate giddo hee're ki'nera kulino'ne hajajo baalanti hattenne kinna aana borreessante no.

¹¹ Shoyilluu hashshinna shoyilluu barri gedensaanni, Kaaliiqi lamenta bocame kinna gondoorunnita uyinoe.

¹² Hakkunni gedensaanni Kaaliiqi, ‹Kai! Gibitsetenni fushshittohu mannikki battaawinona kawiinni rakke dirri. Hajajo'yawiinni rahe fafino; daashshine seekkinoonniha kaphu magano qixxeessi'rino› yiinoe.

¹³ «Qoleno Kaaliiqi, ‹Kuni manni haxo mokkookka ikkinota seekke afoommo.

¹⁴ Horonta qaanganninsakki gede baattote aaninni co'o asse huneemmona agurie. Ate kayinni insanni roore jawaatanna bati'ra gosa asseemmohe› yiinoe.

¹⁵ «Kunnira ilaalu buwanni hee'reennanni, lamenta gondoorunnita bocame kinna haa'ranni hee'renni ilaalu aaninni galagale dirroommo.

¹⁶ Halaalinta ki'ne Magani'ne Kaaliiqi aana sao assitinoonnita laoommo. Daashshine seekkinoonnita siitu misileno umi'nera qixxeessidhinoonni. Kaaliiqi hajajino'ne doogonni rakkine fultinoonni.

¹⁷ Kunnira, anga'ya noota lamenta bocame kinna tuge alba'neenni hiiqqaqqoommo.

¹⁸ «Hakkunni gedensaanni, Kaaliiqi albaanni cubbo loossine assitinoonni bunshenni hanqissinoonnisi daafira, ita aga agure shoyilloo hashshanna shoyilloo barra galagale Kaaliiqi albaanni gombisamoommo.

¹⁹ Aarisinni huna'nera kaino daafira, Kaaliiqi hanqi lowo geeshsha waajjishinoe. Ikkollana, isi galagale huuccatto'ya macciishshino.

²⁰ Hatte yannara, Kaaliiqi Aaroonino shaara lowo geeshsha hanqino. Anino isi daafira yee Kaaliiqa huuccoommo.

²¹ Qoleno hakkonne cubbu looso'ne, seekkidhinoonnita siitu misile haa're giiroommo. Hakkunni gedensaanni, hiiqqaqqe bukonna buluulo asse ilaalu aaninni dirranno wayi giddo fincoommo.

²² «Xaano qoltine, Teberaami, Maasahinna Qibirooti-Hataawa yinanniwa Kaaliiqa hanqissinoonnisi.

²³ «Kaaliiqi Qaadesi Bernenni fushshi'ne yannara, ‹Amme fulle! Oommo'ne baattono ragidhe› yiino'ne. Ki'ne kayinni, Magani'ne Kaaliiqira maahoyye gibbinoonni; iso diaddaxxitinoonni; hajajamano gibbinoonnisi.

²⁴ Ani afummo'ne yanna baalantera, Kaaliiqira maahoyye gibbinoonninte gedeenni heedhinoonni.

²⁵ «Kunninni kainohunni, Kaaliiqi hunanno'ne gede coyi'rinohura, hakkonne shoyilloo hashshanna shoyilloo barra Kaaliiqi albaanni diriire,

²⁶ ‹Mooticha Kaaliiqa'ya, jawimmakkinni woxxoottohanna jawaata cigilekkinni Gibitsetenni fushshoottoha woxekki ikkinoha mannakki huntooti.

²⁷ Soqqamaanokki Abirihaami, Yisihaaqinna Yaiqoobi qaagi. Kunni mannita wodaninsa haxawarrimma, bunshenna cubbo kiirtooti.

²⁸ Hakkunni ka'a kayinni Gibitsootu, «Kaaliiqi aansara xaarino baatto iillishansara dandiinokkihuranna giwannonsa daafira halallitte gobbara shaara fushshinonsa» yitanno.

²⁹ Insa kayinni wolqakkinninna jawaata angakkinni fushshootto mannaatinna doodhootto gosaati› » yee huucci'roommo.