MARRO 4 - Qullaawa Maxaafa

MUSE ISRAEELOOTU HAJAJANTANNO GEDE SEEJJINSA

¹ Xaano Israeele, lubbotenni heedhinanni gedenna annuwa'ne Magani Kaaliiqi aanno'ne baatto ragidhinanni gede rosiiseemmo'ne woganna seera wonshe.

² Eemmo'neta Magani'ne Kaaliiqi hajajo agadhe. Hajajoommo'nehu aana leddinoonte; xeissinoonte.

³ Kaaliiqi Ilaali aana assinore ille'nenni la'inoonni. Magani'ne Kaaliiqi hakkiicho Ba"aali magansidhannore baala mereeri'nenni hunino.

⁴ Magani'ne Kaaliiqira ammanantinoonniri ki'ne wo'munku kayinni, kuneeti techo geeshsha lubbotenni heedhinoonni.

⁵ Martine amaddinanni baattora, wonshitinanni gede Magani'ya Kaaliiqi hajajinoe garinni woganna seera rosiisoommo'ne.

⁶ Tenne woga baala macciishshitannoriranna, «Halaalinta tini bayira gosa mageeshshi ogimmanna wodancha afidhino!» yaanno mannira ogimma'nenna wodancha'ne leeltanno gede seekkitine agadhe.

⁷ Woshshi'neemmo yanna baalantera Maganinke Kaaliiqi ninkera mulenke hee're dawarannonkente gede, isi Maganinke gedeehu wolu magani noonsati wole bayira woy maa'ne gosa mama no?

⁸ Aye geeshshano batidhona, techo ani alba'neenni worummo gedeeta keeraancho woganna seera afidhinoti wole gosa nooni?

⁹ Ille'ne la'ino coye habbinannikki gede qaagge. Qoltineno lubbotenni heedhinoonni geeshsha wodani'nenni ba'annokki gedella jaattine agadhe. Tenneno ooso'neranna ooso'ne oosora rosiisse.

¹⁰ Siina Maganinke Kaaliiqi albaanni uurritini barra Kaaliiqi, «Baattote aana heedhanno yanna baalate ane ayirrisanna hajajama rossanno gede, oosonsarano rosiissanno gede, manna albi'yara gamba assi» yiieta qaagge.

¹¹ «Ilaalano kolishshu gomichinna dhi'mote tunsichi egemme hee'reenna, buwanuno gordo iilli yannara daggine ilaalu hunda uurritinoonni.

¹² Hattono Kaaliiqi giirate giddo hee're coyi'rino'ne. Huuro calla macciishshitinoonnita ikkinnina dana diaffinoonni.

¹³ Gondoorosi agadhitinanni gede lallambe kulloonni'ne. Hattino wonshitinanni gede uyinoonni'neti 10 hajajooti. Iseno 2 bonce seekkinoonni kinna aana borreessino.

¹⁴ Ragidhinanni baattora heedhine ha'runsitinanni woganna seera rosiiseemmo'ne gede hatte yannara Kaaliiqi hajajinoe.

KAPHU MAGANNA MAGANSI'NANNIKKI GEDE UYINOONNI QOROPHO

¹⁵ «Kaaliiqi Siina Ilaali aana giirate giddo hee're coyi'ri'ne barra, danasi horonta diaffinoonnina umo'ne seekkitine agadhe.

¹⁶ Battaabbinannikki gede, labbaahu woy meyate danita aye gari misileno boccine seekkidhinoonte.

¹⁷ Qoltineno baattote aana heedhanno saada daninni woy buubbanno cea daninni

¹⁸ woy godowunni ha'ranno kalaqami daninni woy wayi giddo hee'ranno qulxu'mi daninni misile seekkidhinoonte.

¹⁹ Gordu iimira higgine arrishsho, agananna beeddahe baala la'inanni yannara, insara kumbuultinannikki gedenna jifantinannikki gede, Magani'ne Kaaliiqi gordu woroonni nootera wole gosara qeechansa asse uyinore magansidhinannikki gede qorophe.

²⁰ Ki'ne kayinni techonte gede umisi manna ikkitinara, Magani'ne Kaaliiqi ki'ne siwiila daashshinanni boosonni Gibitsetenni fushshe abbino'ne.

²¹ «Kaaliiqi ki'nenni kainohunni anera hanqinoe. Yordaanoosino fuleemmokki gedenna Magani'ne Kaaliiqi iqqa asse aanno'ne baatto dancha iilleemmokki gede xaarino.

²² Ani tenne baattora reemmo; Yordaanoosi difuleemmo. Ki'ne kayinni fultine hattenne dancha baatto ragidhinaraati.

²³ Magani'ne Kaaliiqi ki'ne ledo eino gondooro habbinannikki gede qorophe. Magani'ne Kaaliiqi hoolinota kaphu maganna mayi daninnino seekkidhinoonte.

²⁴ Magani'ne Kaaliiqi ittanno giiraati. Wole magano banxanna lae cincannokki Maganooti.

²⁵ «Oosonna oosote ooso iltinihunna tenne baattora seeda diro heedhinihu gedensaanni, umo'ne batteessitine mayi danitano kaphu maganna seekkidhiniro, Magani'ne Kaaliiqi albaanni busha ikkino daafira hanqisannosi.

²⁶ Anera hajajama gibbiniero, baattote aaninni rakkine ba'inannita egensiisate gordonna baatto techo naqaashshe kiidheemmo. Yordaanoosi fultine ragidhinoonni baattora seeda diro hee'ra didandiitinanni; co'o yitine ba'inanni.

²⁷ Kaaliiqi ki'ne dagate mereero billaallisanno'ne. Dagate mereero billaalliseenna'ne shiimu manni callu gattinanni.

²⁸ Hakkiicho, la"a woy macciishsha, ita woy ulata dandiitannokkire mannu anganni seekkinoonnire haqqetenna kinchu maganna magansidhinanni.

²⁹ Ikkollana, hakkiicho heedhine Magano'ne Kaaliiqa wo'mu wodani'nenna wo'ma lubbo'nenni hasidhinisiro afidhinannisi.

³⁰ Qarrantinanni woyitenna kuni baalunku coyi iillanno'ne yannara, Magani'ne Kaaliiqiwa higgine hajajantinannisi.

³¹ Magani'ne Kaaliiqi maaranno Magano ikkinohura, diaguranno'ne; diinohunanno'ne. Annuwa'nera xaarotenni dhaawino gondooro dihawanno.

KAALIIQI MAGANOHO

³² «Maganu manna baattote aana kalaqi barrinni kayise, ki'ne heedhinara albaanni ikkinore xa'me; baattote qaccenni baattote qacce geeshsha xa'me. Togoohu jawu coyi horonta ikke woy macciishshame egenninoni?

³³ Maganu giirate mereero hee're coyi'ranna ki'ne gede macciishshe lubbotenni hee'rinohu horonta wolu manni nooni?

³⁴ Magano'ne Kaaliiqa ille'nenni la'inanni Gibitsete assinonte gede jifatenni, maalalete malaattanninna dhaggetenni, gaarunni, jawaata anganninna wolqaataame cigilenni woy jawunna waajjishanno loosinni wole gosa mereero mitte gosa umisita assi'rara dandiinohu wolu Magani nooni?

³⁵ «Kaaliiqi callu Magano ikkinotanna, isi ka'a wolu Magani nookkita affinanni gede ki'nera leellishino'ne.

³⁶ Hajajama rosiisa'nera yee gordoho hee're huurosi macciishshitinanni gede assino'ne. Baattote aanano jawa giirasi leellishino'ne. Qaalesino giirate mereero hee're macciishshiishino'ne.

³⁷ Annuwa'ne baxino daafira, insa gedensaanni sirchonsa doodhinohura, ledo'ne hee're jawa wolqasinni Gibitsetenni fushshino'ne.

³⁸ Tenne baatto iilla rakkini yannara, ki'nenni roore jajjabbanna jawaata daga albi'nenni hoolino. Hatto assinohu, techo la'inanninte gede ki'ne insa gobba haa're masse baattonsa iqqa asse aa'neraati.

³⁹ «Xaate kunni ka'a iima gordoho, uulla baattote Kaaliiqi Magano ikkinota affe. Isi callu Maganoho. Konneno wodani'nera wodhe.

⁴⁰ Ki'neranna ki'ne gedensaanni ooso'nera seyanno'ne gede, Magani'ne Kaaliiqi hegerera aanno'ne baattora diri'ne seedanno gede, techo ani hajajeemmo'neta wogasinna seerasi agadhe» yii.

EEGGOTE KATAMMA

⁴¹ Hatte yannara, Muse Yordaanoosira soojjaatoonni 3 katamma badi.

⁴² Hatto assinohu koma nookkiha hedeweelcho manna shiinohu aye manchino xooqe tenne katamma giddonni mittu katamira mare lubbosi gatisi'ranno gedeeti.

⁴³ Tini katammano halalla tullichaame gobbara nooti Beetseeri Roobeeli mannira, Raamooti Geleaadi Gaadi mannira, Baasaani noohu Goolaani Katami Minaase manniraati.

SEERAHO UYINOONNI XAWISHSHA

⁴⁴ Muse Israeelete mannira Maganu woganna seera uyinsa.

⁴⁵ Israeelete manni Gibitsete gobbanni fuli yannara, Muse uyinonsa rosiishshi, woganna seeru konneeti.

⁴⁶ Muse konne coye kulinohu isinna Israeele qeeltinohu Hasebooni moohinohu, Amooraawootu moote Sewooni baattora, Yordaanoosira soojjaatoonni Beete Fegoori Lagichira heedheennaati.

⁴⁷ Yordaanoosira soojjaatoonni noota isitanna Baasaani moote Aagita, lamunku Amooraawootu mootoolla baatto amadonsa assidhu.

⁴⁸ Tini baatto Arnooni Lagichi gamira noohunni Aroeeri Kataminni kayise, Seriooni Ilaali yaano, Hermooni geeshsha iillitannota ikkitanna,

⁴⁹ Yordaanoosira soojjaatoonni nooha Areba Lagicha gudise Fisiga Ilaali hunda noohu Areba Baari geeshshaati.