MARRO 29 - Qullaawa Maxaafa

GONDOORU HAAROO'MA

¹ Kaaliiqi Siina Ilaali aana Israeelete manni ledo eino gondooro agurranna, wole Moaabi baattora Israeelete manni ledo eara Muse hajajinohu gondooru qaali kunninni aane nooho.

² Muse Israeelete manna baalanka woshshe, «Kaaliiqi Gibitsete, moote Feriooni, gashshaanosinna gobbasi aana assino coye baala ille'nenni affinoonni.

³ Hakkonne jaddote qoomama, dhaggenna maalale ille'nenni la'inoonni.

⁴ Ikkollana, techo geeshsha Kaaliiqi wodanchitinannire diassino'ne.

⁵ Kaaliiqino, ‹40 diro wo'ma moola baattora albisummo'ne yannara, uddano'ne diakkaltino; lekka'ne koatteno digooffino.

⁶ Timunni roortinota addi sagale, woyinete xajjenna wole dimbisanno ago diagginoonni. Hatto assoommohu ani Kaaliiqi Magano'ne ikkoommo gede affinaraati› yiino.

⁷ «Kawiichira dangummo yannara, Hasebooni moote Sewooninna Baasaani moote Aagi qassankera daggino. Ikkollana ninke qeelloommonsa.

⁸ Baattonsano adhine Roobeeli gare'ra, Gaadi ilamaranna Minaase ga're daratira iqqa assine uyinoommo.

⁹ Kunnira, assitinanniri baalu qinaanno'ne gede, konne gondooru qaale seekkitine agadhe.

¹⁰ «Kuneeti techo ki'ne baalunku Magani'ne Kaaliiqi albaanni uurritinanni. Albisaano'ne, murra'nenna wolu Israeelete manni,

¹¹ meenti'ne, ooso'nenna ledo'ne hee'rannohu wole gobba manni, ki'nera haqqe hiiqqannohunna waa dirranno'nehu baalu ledo'ne uurranno.

¹² Kuneeti techo ki'ne kawiichira gamba yitinoonnihu Magani'ne Kaaliiqi ledo gondooru xaaro eatenna hasiisannore baala wonshate qixxaabbinoonnita egensiisateeti.

¹³ Ki'neranna annuwi'ne Abirihaamira, Yisihaaqiranna Yaiqoobira uyino hexxo garinni, isi ki'ne umisi manna assi'ranno'ne. Isino Magano'ne ikkanno.

¹⁴ Konne gondooro eannohuno ki'ne ledo calla di"ikkino.

¹⁵ Konne gondooro techo kawiicho Maganinke Kaaliiqi albaanni uurrinoommori callu ledo ikkikkinni, techo konne ledonke nookkiri dagganno ilama ledono eanno.

¹⁶ «Gibitsete gobbara hiitto ikkine hee'noommoronna kawiira dangummo yannara manni gobba giddoonni hiitto ikkine sa'noommoro affinoonni.

¹⁷ Mereeronsano tiyyi'nanni misilla haqqanna kinna bocce birrunninna culkunni seekkidhinota kaphu maganna magansidhanna affinoonni.

¹⁸ Kawiicho heedhinoonniri mereero ayino labbaahano ikko meyati, wole gosano ikkito ki'ne ilama Maganinke Kaaliiqiwiinni faffine wole kaphu maganna magansi'ra qorophe. Hatto assannohu, rumushshisenni qaraartanno hadho fultanno haqqicho gedeeho.

¹⁹ «Techo ninke mereero hee're tenne lowo geeshsha kaajjado hajajo macciishshe kae wodana mokkookke umisi doogo ha'rannohu hee'riro, ‹Baalunku coyi qinaannoe› yee umosi dogannokki gede agadho. Hattoo manchi danchunna bushu mannira bao abbanno.

²⁰ Kaaliiqi konne mancho dimaaranno. Giirannoha hanqosi isi aana bushshanno. Kunni maxaafira borreessinoonni rumo baalanti aanasi dirritanno. Kaaliiqino su'masi baattote aaninni co'o asse hunanno.

²¹ Kunni Seeru Maxaafira borreessinoonni rumo gondoori garinni, Kaaliiqi iso Israeelete sirchi baalu giddonni bade hunanno.

²² «Dagganno ilama gare'nenna wole xeerto gobba manni Kaaliiqi tenne baatto aana dirrisinoha jawa qoomamanna qarra abbinota affanno.

²³ Loosidhinanni baatto maxinetenninna baattote giddonni fulino ruqaninni dhiwantanno. Mittoreno dikaansanni; ciirannorino dihee'ranno; lophanno haqqi dimu'ranno. Tenne baattora dagganno goofo, jawu Kaaliiqi hanqi galchinohu Soddoomunna Gomooru, Adaamanna Sibayiimite gedeeta ikkitanno.

²⁴ Gosa baalanti, ‹Kaaliiqi tenne baatto aana konne coye mayira assi? Kuni waajjishannohunna buwanno hanqi tenne baatto aana mayira ikki?› yite mimmito xa'mitanno.

²⁵ «Tenne xa'mo dawaro, ‹Annuwansa Magani Kaaliiqi Gibitsetenni fushshinsa waro, insa ledo eino gondooro diigino daafiraati.

²⁶ Insano kunni albaanni affe egentinokkirenna Kaaliiqi magansidhannokki gede hoolinonsa maganna magansidhino; insara kumbuultino.

²⁷ Kunnira, Kaaliiqi hanqe kunni maxaafi giddo borreessinoonni rumo baala tenne baatto aana abbino.

²⁸ Kaaliiqi lowo geeshsha hanqe baattonsa aaninni buqqise wole baattora masse tuginonsa. Kuneeti xa techo geeshsha hakkiicho no› yitanno.

²⁹ «Maganinke Kaaliiqi xawo fushshikkinni maaxe amadinohu lowo coyi no. Seerasi kayinni xawisinonke. Kunnira ninkenna sirchinke hegere geeshsha seerasi ayirrisa hasiissannonke.