MARRO 18 - Qullaawa Maxaafa

QEESOOTUNNIHA FUSHSHAATU QEECHA

¹ «Leewaawoota ikkitino qeesooti, Leewi sirchi baalunku Israeelete manni ledo baattote qeecha woy iqqa diadhitanno. Qeechinsa hakkonne ikkino daafira, Kaaliiqira shiqanno fushshaate ittona.

² Roduuwinsa mereero baattote iqqi dihee'rannonsa. Uyinonsa hexxo garinni insara Kaaliiqi iqqansaati.

³ «Lalo woy ge'reewo kakkallanni woyite qeesootaho haye, baqqaallanna godowire uyinona.

⁴ Gidi'neha, haaro woyine'neha, ejersu zayite'nehanna ge'reewi'ne ordaha umiha insara uuyyensa.

⁵ Kaaliiqi su'minni uurrite hegerera qeesesi ikkite heedhanno gede, Magani'ne Kaaliiqi ga're'ne baalante giddonni Leewi ga're doodhino.

⁶ «Israeelete gobbara noo katamma giddonni mittu Leewaawichi Kaaliiqi doodhino dargira daate wodana hediro,

⁷ Kaaliiqi albaanni uurrite soqqantannori Leewaawootu roduuwisi baalu gede, isino Maganisi Kaaliiqi albaanni soqqamona.

⁸ Qaetenni afi'ranno jajji hee'risiro nafa, wolootu qeesootira iillitanno sagale isirano taaloho.

DAGATE WOGA HOOLATE QOROPHISHIISHSHA

⁹ «Magani'ne Kaaliiqi aanno'ne gobba iillitinanni yannara, hakkiicho heedhanno dagata busha woga ha'runsitinoonte.

¹⁰ Ki'ne mereero oososi giire kakkalannohu, kiilaanchu, bitaamu, moora la"annohu, qaallichu,

¹¹ woy gojaamu, golfa woshshannohunna ekera hasaawisannohu giddo'ne horontanni hee'roonke.

¹² Konne coye assannoha baalanka Kaaliiqi dibaxanno. Kunni bushu rosinsanni kainohunni Magani'ne Kaaliiqi hattenne daga albi'nenni shorranno.

¹³ Magani'ne Kaaliiqi albaanni minshe nookkire ikke.

HIMANAANCHO SOYATE KAALIIQI UYINO HEXXO

¹⁴ «Baattonsa aaninni shorritinanni daga, bitaammu woy qaalloole yitannore macciishshitanno. Ki'ne kayinni hattoore assitinara Magani'ne Kaaliiqi difajjino'ne.

¹⁵ Magani'ne Kaaliiqi roduuwi'ne giddonni ane gedee himanaancho kayisanno'nena isi yaannota macciishshe.

¹⁶ «Korebi Ilaalira songitini barra, ‹Reyineemmo› yitine waajjitinoonnihura Kaaliiqi coyi'ranno'nekki gedenna isonoo egensiisannota waajjishshanno giira la'inannikki gede huuccidhinoonni.

¹⁷ Kaaliiqino, ‹Xa'monsa garaho;

¹⁸ roduuwinsa giddonni ate gedee himanaancho kayiseemmo; coyi'rannoha qaale'yano eemmosi. Ani hajajoommosire baala mannaho kulanno.

¹⁹ Kuni himanaanchi su'mi'yanni coyi'rannoha qaale'ya macciishsha giwannoha baala qorichisheemmo.

²⁰ Ikkollana, ani hajajoommosikkiha seyate su'mi'yanni coyi'ranno himanaanchi woy wole maganna su'minni coyi'rannohu hee'riro reyo› yiino.

²¹ «Ki'neno, ‹Mittu himanaanchi kulanno sokka Kaaliiqiwiinni ikkitinokkita mayinni anfeemmo› yitine wodani'nenni haddiniro,

²² himanaanchu Kaaliiqi su'minni coyi'rinori wo'ma hoogiro, sokka Kaaliiqi coyi'rinota ikkitinokkita affinanni. Hakku himanaanchi seyatella coyi'rinona iso waajjitinoonte.