MARRO 1 - Qullaawa Maxaafa

ISRAEELETE MANNI SIINA ILAALINNI KAE HA'RANNO GEDE UYINOONNINSA BIDDISHSHA

¹ Yordaanoosira soojjaatoonni Areba Halallittera Suufi Katamira albaanni, Faaraaninna Xoofeeli, Laabaani, Hatserootinna Dizahaabi mereero heedheenna, Muse sa'u yannare marro hige qaagiissanni Israeelete manni baalaho coyi'rino qaali konneeti.

² Siina Ilaalinni ka'ne, Edoomi Ilaali widoonni hinge Qaadesi Berne iillate tonaa mitu barri doogooti.

³ Gibitsetenni fultuhunni shoyilliikki diro, tonaa mitikki aganira umi barra, Muse Israeelete mannira Kaaliiqi hajajinore baala kulinsa.

⁴ Kuni ikkinohu Hasebooni gashshe nooha Amooraawootu moote Sewooninna Astaarooti gashshe nooha Aagi moote Baasaani Edirayi yinanni darga Kaaliiqi qeelihu gedensaanniiti.

⁵ Israeele Yordaanoosi Wayira widoonni Moaabi gobbara heedheenna, Muse kulinonsa seerinna rosiisinonsa rosi kunninni aane nooho:

⁶ Muse, «Kaaliiqi Maganinke Siina Ilaalira, ‹Xaate kunni ilaalira hee'ra ikkitino'ne.

⁷ Galtinanni darga diiggine gaaraame Amooraawootu gobba hadhe. Hakkiichinnino Yordaanoosi Lagichira, ilaalaame gobbara gammoojjittete Negebinna Mediteraaniyu Baari qaccera hee'ranno manniwa hadhe. Qoltineno Kana"aanootu gobbanna Libaanoosi, lowo Wayi Efiraaxisihu geeshsha iille.

⁸ Kuneeti tenne baatto oommo'ne. Ani Kaaliiqi annuwa'nera Abirihaamira Yisihaaqiranna Yaiqoobira insa gedensaannino sirchinsara aammora xaaroommo gobba e'ine ragidhe› yiino» yiinsa.

MUSE ALBISSANNORE DOORI

⁹ Muse mannaho, «Siina Ilaalira hee'neenna, ‹Calli'ya duqqammo'nera didandeemmo.

¹⁰ Kuneeti Magani'ne Kaaliiqi kiiro'ne gordu beeddahe gede batisino.

¹¹ Xaano Kaaliiqi annuwa'ne Magani kume hige batiso'ne. Uyino hexxo garinni maassi'ro'ne!

¹² Kayinnilla gibbo'nenna gereerama'ne calli'ya hiitto asse duqqa dandeemmo?

¹³ Ki'nera albisaano asse woreemmo gede, hayyoole, wodanchitannorenna mannu ayirrisannore ga're ga're'ne giddonni doorre› yoommo.

¹⁴ «Ki'neno, ‹Ati yootto coyi danchaho› yitine dawartinoonnie.

¹⁵ «Kunnira, anino ga're ga're'ne sooreeyye giddonni hayyoolenna ayirrinsanni manna haa're 1,000 roorroota, 100 roorroota, 50 roorroota, 10 roorroota, hattono ga're ga'rente albisaano asse woroommo'ne.

¹⁶ Hatte yannara, daanyoota'ne, ‹Roduuwi'ne mereero kalaqamanno coye taashshitine la'e. Roduuwa ikkitino Israeelooti woy mittu Israeelichunna gobba'nera hee'rannohu wole gobba manchi coyi'ranturono coyensa taashshitine la'e.

¹⁷ Yoo dawissinoonte; lowohano shiimano taashshitine la'e. Yoo Maganunnita ikkitinohura, ayeno waajjitinoonte. Wolqa'nera aleenni ikkinoha baalanka ani laeemmona, anewa abbe› yoommo.

¹⁸ Hatte yannara assate hasiisannore baalanka kuloommo'ne.

SONKOONNIRE TONAA LAME DOOYYAASINE

¹⁹ «Hakkunni gedensaanni affininte gede Maganinke Kaaliiqi hajajinonke garinni, Siinanni ka'ne hattenne hala'ladonna waajjishshannota halallitte gobba sa'ne, gaaraame Amooraawotu gobba ragaanni hinge Qaadesi Berne dangoommo.

²⁰ Anino, ‹Maganinke Kaaliiqi aannonketewa gaaraame Amooraawotu gobba iillitinoonni.

²¹ Kuneeti annuwa'ne Magani Magani'ne Kaaliiqi tenne baatto uyino'ne. Xaano isi kulino'ne garinni fultine ragidhe. Waajjitinoonte wodani'neno daaqoonke› yoommo'ne.

²² «Ki'ne baalunku kayinni anewa daggine, ‹Hattenne gobba dooyyanno gede manna balanxe sonko. Insano hakka massitanno doogonna marreemmo katamma hiittootero la'e galagalte dagge kultannonke› yitinoonni.

²³ «Tini hedo dancha labbeennae, mitte mittente ga'renni mitto mitto mancho doore 12 manna haa'roommo.

²⁴ Insano gaaraame gobba fultuhu gedensaanni, Eshikooli Lagicha marte hattenne gobba dooyyitu.

²⁵ Hatte baattonni laalcho haadhe dagge, ‹Maganinke Kaaliiqi aannonke baatto danchate› yite kultinonke.

²⁶ Ki'ne kayinni fulate hasidhinoonnikki daafira, Maganinke Kaaliiqira hajajama gibbinoonni.

²⁷ Dukkani dukkani'nera heedhine, ‹Kaaliiqi giwinonke daafira, Amooraawootu guddannonke gede angansara sayise aankera Gibitsetenni fushshe abbinonke.

²⁸ Roduuwinke: Mannu ninkenni roore jawaatahonna hojjaameeyyete; katammano jajjabbatenna gordo iillino huxxa huxxinoonnite. Qolteno hakkiicho jajjabba Enaaqi ooso anfoommo yite, wodananke daaqissinona, hanni hiikka ha'neemmo?› yitinoonni.

²⁹ «Anino, ‹Insa la'ineenna wodani'ne masoonke; waajjitinoonte.

³⁰ Alba'neenni ha'rannohu Magani'ne Kaaliiqi kunni albaanni ille'ne la'anna Gibitsete assi'nente gede, xaano ki'nera gaaramanno.

³¹ Kawiichira iillitini geeshsha halallitte gobbara daggini doogo baalantera annu ilasi qoteho duqqannonte gede, Magani'ne Kaaliiqi ki'neno asse duhino'ne gara affinoonni› yoommo'ne.

³² «Tenne giddoonni kayinni Magano'ne Kaaliiqa diaddaxxitinoonni.

³³ Doogote aana heedhineenna ofoltinanni darga hasanni, hadhinanni doogono leellishate hashsha giiratenni, barra gomichunni massagino'ne.

KAALIIQI ISRAEELETE MANNA QORICHISHI

³⁴ «Kaaliiqi gunguma'ne macciishshi yannara hanqe,

³⁵ ‹Akaakka'nera aammonsara xaaroommota hattenne dancha gobba, tenne busha ilama giddonni mittu manchi nafa dieanno.

³⁶ Yoofooni beetto Kaaleebi agurranna wolu dieanno. Isi kayinni eanno. Wo'mu wodaninni ane Kaaliiqi hoode ha'rino daafira, isi kadino baatto isiranna sirchisira eemmo› yee xaarino.

³⁷ «Ki'nenni kainohunni Kaaliiqi anera hanqe, ‹Muse, ati umikki nafa hattenne gobba dieatto.

³⁸ Kaa'laanchikki Newe beetti Iyyaasu kayinni eanno. Baatto ragi'ranno gede Israeelete mannira albisannohu iso ikkinohura jawaachishisi.

³⁹ Qafadantanno yitiniri shiimmaaddu, bushanna dancha badde affinokkiri ooso'ne hattenne gobba marte e'anno. Gobba insara eennansa ragidhanno.

⁴⁰ Ki'ne kayinni, badhera higgine Duumu Baariwa massitanno doogo amaddine halallitte gobba higgine hadhe› yiino.

⁴¹ «Ki'ne, ‹Kaaliiqi aana sao assinoommo. Maganinke Kaaliiqi hajajinonke garinni fulle gaarammeemmo› yitine dawartinoonnie. Hakka ilaalaame gobba ha'ra shota labbe leeltino'ne daafira, mitti mitti'ne olu uduunne qodhitine ka'inoonni.

⁴² «Kaaliiqi kayinni, ‹Ani ki'ne ledo dinoommona olaho fultinoonte; gibbine fultiniro kayinni diinna'ne qeeltanno'ne yite kulinsa› yiinoe.

⁴³ «Anino Maganu yiinore kuloommo'ne. Ki'ne kayinni dimacciishshitinoonnie. Kaaliiqi hajajono gibbine, boo'natenni ka'ine gaaraame gobba gaaddinoonni.

⁴⁴ Hattenne gaarra aana heedhanno Amooraawooti qassa'nera fultino; idditanno diishsho gede ikkite shorritino'ne. Edoomi gobbanni kayisse Herma Katami geeshsha shorrite gawajjitino'ne.

⁴⁵ Ki'neno galagaltine daggine Kaaliiqi albaanni wi'litinoonni. Kaaliiqi kayinni wi'la'ne qaale dimacciishshino; maccasino ki'ne widira diqolino.

⁴⁶ Kunni daafira Qaadesi lowo yanna keeshshinoommo» yiinsa.