MAATEWOOSI 9 - Qullaawa Maxaafa

YESUUSI LAANSHAAWA MANCHO HURSI

¹ Hakkunni gedensaanni Yesuusi yowolotenni baara fule katamasi dayi.

² Mannu mitto laanshaawa mancho rerete aana goxe nooha duhe Yesuusiwa abbi. Yesuusi amma'nansa afe laanshaawa mancho, «Beetto'ya bashshi yitooti; cubbikki aguraminohe» yiisi.

³ Hatte yannara mitu mitu Seeru rosiisaano wodaninsanni, «Kuni manchi Magano xonanni no!» yitu.

⁴ Yesuusi giddonsata afe, «Konne busha coye wodani'nenni mayira heddinanni?

⁵ ‹Cubbikki aguraminohe› yaatenna, ‹Ka'e hari!› yaate woyite shonte hiitti roortino?

⁶ Manchi Beettira kayinni uullate aana cubbo agursiisate roorre noosita egentinanni gedeeti» yee, laanshaawa mancho, «Ka'e rerekki duqqite minikkira ha'ri» yiisi.

⁷ Manchuno kae minisira ha'ri.

⁸ Mannu tenne ikkito lae dhaggeeffate, mannaho togoo roorre uyino daafira Magano galati.

YESUUSI MAATEWOOSI WOSHSHI

⁹ Yesuusi hakkiinni kae ha'ranni hee're, Maatewoosi yinanni qaraxaanchi qaranxanni daasira ofolle nooha afe, «Hoode'ya amo» yiisi. Isino kae hoodesi ha'ri.

¹⁰ Hakkunni gedensaanni Yesuusi Maatewoosi minira mare, sagalete ofolle hee'reenna qaraxaasinenna cubbaataammu hakkiira dagge isinna rosaanosi ledo sagalete ofoltu.

¹¹ Farisootu konne coye affe rosaanosira, «Rosiisaanchi'ne qaraxaanotenna cubbaataammu ledo mayira itanno?» yitu.

¹² Yesuusi konne coye macciishshe, «Dhiwantinorira ikkinnina fayyaaleeyyete xagisaanchu dihasiisannonsa.

¹³ Hadhine, ‹Ani kakkalotenni roore maaro hasi'reemmo› yine borreessinoonnihu mayaatero seekkitine buuxxe! Ani cubbaataamma ikkinnina, keeraano woshshammora didayommo» yiinsa.

QATUMATE DAAFIRA XA'MINOONNI XA'MO

¹⁴ Hatte yannara Yohaannisi rosaano Yesuusiwa dagge, «Ninkenna Farisootu wo'manka woyite Maganittete qatuma qatummeemmo; ate rosaano qatuma gibbannohu kayinni mayiraati?» yite xa'mitusi.

¹⁵ Yesuusi daware, «Seenne adhannohu ledonsa hee'reenna albisootu qatuntannoni? Adhannoha insawiinni haa'ne hoollanni yanna dagganno; hakka waro kayinni qatuntanno.

¹⁶ «Akkala uddanora haaro qaafficho digannanni. Hatto assiniro, haaru qaaffichi akkala uddano daranno. Dadhamaseno albinni roore ikkitanno.

¹⁷ Haaro woyinete xajjeno akkalu ogorira diworranni; worriha ikkiro kayinni, ogoru dhoohanno; woyinete xajjeno du'nantanno; ogoruno kaa'lannori nookkiha ikkanno. Kunnira, haaro woyinete xajje haaru ogorira worranni. Kunni garinni lamunku dancha gede ikkite heedhanno» yiinsa.

IYAIROOSI BEETTONNA YESUUSI UDDANO KISSU MANCHO

¹⁸ Yesuusi konne coye kulanni hee'reenna mittu Iyairoosi yinanni roorrichi Yesuusiwa daye lekkasira uwe, «Kuneeti qaaqqo'ya reyitino; ati dagge angakki aanaho worittosero kayinni ka'e lubbotenni heedhanno» yii.

¹⁹ Yesuusi kae manchu faana ha'ri; rosaanosino ledonsa hadhu.

²⁰ Hadhanni heedheenna tonaa lame diro wo'ma mundee lolakkanna heedhannoti mitte mancho, Yesuusira badheenni higge dagge uddanosi qacce kissu.

²¹ Hatto assitinohu, «Uddanosi nafa kisummaro hureemma» yite heddinohuraati.

²² Yesuusi caaqqi yee lae, «Beetto'ya waajjitooti; amma'nakki gatissinohe» yiise. Manchono hakkawoyintenni hurtu.

²³ Hakkunni gedensaanni Yesuusi Iyairoosi minira iille, xurumba ufuuffannorenna raataabbanni wi'litannore lai.

²⁴ Isino, «Baalunku kawiichinni fulle, qaaqqo goxxinota ikkinnina direyitino» yiinsa. Insa kayinni iso maaeelsite oso'litu.

²⁵ Mannu mininni fulihu gedensaanni Yesuusi qaaqqo noowa e"e angase amadita iseno ka'u.

²⁶ Kuni duduwi hatte gobba baalate duduwami.

YESUUSI LAME ILLIWEELOOTA HURSI

²⁷ Yesuusi hakkiinni kae ha'ranni hee'reenna lamu illiweelooti hoodesi hadhu. Insano, «Daawiti Beetto ballo mararinke!» yitanni raarte huuccidhu.

²⁸ Yesuusi minira eita, illiweelootu isiwa shiqqi yitu. Isino, «Ani konne coye assa dandeemmota ammantinannini?» yiinsa. Insano, «Ee, Mooticha» yitu.

²⁹ Hakkunni gedensaanni Yesuusi illensa angasinni amammade, «Ammana'ne gede ikko'ne!» yiinsa.

³⁰ Illensano fa'nitu. Yesuusino, «Konne coye ayerano kultinoonte!» yee duu're dhaaminsa.

³¹ Insa kayinni hadhe, hatte gobba baalate Yesuusire dudubbu.

YESUUSI MITTO DANQICHA MANCHO HURSI

³² Illensa fa'nitunsa manni fulte hadhanni heedheenna, wolu manni durriisu ganinoha danqicha mancho haa're Yesuusiwa abbi.

³³ Durriisu giddosinni fulanni hee'reennanni danqichu manchi coyi'ri. Mannuno, «Togoo coye Israeelete gobbara anfe diegenninoonni» yaanni dhaggeeffati.

³⁴ Farisootu kayinni, «Isi durriisa fushshannohu durriisu roorrichi wolqanniiti» yitu.

YESUUSI MANNA MARARI

³⁵ Yesuusi xaadu minna giddo rosiisanni, gordu Gashshootiha Dancha Duduwo kulinsa. Addi addi dani dhibbinni amadamino mannano hursanni, katammatenna qachuwa baalate ha'rami.

³⁶ Allaalaanchu nookki ge'reewi gede ikke qarramenna gara hawe noo manna afe marari.

³⁷ Kunnira Yesuusi rosaanosira, «Gidu lowoho; gide gamba assanno manni kayinni shiimaho.

³⁸ Gide gamba assate, lowo loosaasine soyanno gede loosu Mooticha huuccidhe!» yiinsa.