MAATEWOOSI 8 - Qullaawa Maxaafa

YESUUSI TARAAWANNOHU GOGU DHIBBI NOOSI MANCHO HURSI

¹ Yesuusi ilaalu aaninni dirrita, lowo manni hoodesi ha'ri.

² Hatte yannara mittu taraawannohu gogu dhibbi noosi manchi Yesuusiwa daye albasiinni guluphe, «Mooticha, baxittoero hursattoera dandaatto» yee huucci'ri.

³ Yesuusino anga diriirse manchono amammade, «Baxoommohena huri!» yiisi. Manchuno hakkawoyintenni taraawannohu gogu dhibbinni huri.

⁴ Hakkunni gedensaanni Yesuusi hakkonne mancho, «Konne coye hattono assite mannaho kultooti; huroottota kayinni marte qeesichaho leellishi'ri. Huroottota anfanni gede, Muse hajajinota keeraawate kakkalo Maganoho shiqishi» yiisi.

YESUUSI MITTU OLANTOTE ROORRICHI SOQQAMAANCHO HURSI

⁵ Yesuusi Qifirinahoomi Katama iilli yannara, mittu Roomunnihu Xibbe Olanto Roorrichi isiwa daye,

⁶ «Mooticha, soqqamaanchi'ya dhibbu laansheesseenna lowo geeshsha shete mine goxe hee'ranno» yii.

⁷ Yesuusino, «Ani mare hurseemmosi» yii.

⁸ Xibbe Olanto Roorrichi kayinni, «Mooticha, ani mini'yara eatto gedeeha di"ikkoommo. Mitto qaale coyi'roottoro kayinni soqqamaanchi'ya huranno.

⁹ Ani umi'ya gashshaanote hajajameemmoho; anerano hajajeemmo olanto nooe. Insa giddonni mittu, ‹Ha'ri!› yuummoro ha'ranno; woleno, ‹Amo!› yuummoro daanno. Soqqamaancho'ya, ‹Konne assi!› yuummoro assanno» yii.

¹⁰ Yesuusi konne coye macciishshe dhagge assi're, hoodesi ha'ranni noo mannira, «Halaale kuleemmo'nena, togoota jawa amma'na afi'rinoha Israeelete giddo nafa afe diegennoommo.

¹¹ Lowo manni soojjaatinna galchiminni daanno; gordu Gashshooti jilira Abirihaami, Yisihaaqinna Yaiqoobi ledo ofollanno.

¹² Konne Gashshoote ragidhanno yine hendoonnire kayinni gobba tunsichoho tunganni. Hakkiicho wi'litanni suumensa ittanno» yii.

¹³ Hakkunni gedensaanni Yesuusi xibbe olanto roorricha, «Amma'nakki gede ikkohena ha'ri!» yiisi. Soqqamaanchisino hakkawoyintenni huri.

YESUUSI LOWO MANNA HURSI

¹⁴ Yesuusi Pheexiroosi minira mari yannara Pheexiroosi ballo iibbabbite goxxe noota afi.

¹⁵ Angase amadita iibbabbo higgeennase ka'e soqqantusi.

¹⁶ Hawarrita, durriisu ganinorenna dhiwantinore baala haadhe Yesuusiwa abbiteenna qaalisinni busha ayyaanna fushshi; dhiwantinore baalano hursi.

¹⁷ Hatto assasinni himanaanchu Isayaasi, «Ninke dhibba isi doyisse adhino; xissonkeno isi duqqino» yiino himani wo'mi.

YESUUSI HOODE HADHANNORIRA IILLANNONSA QARRA

¹⁸ Yesuusi lowo manni doyisse noosita afe rosaanosi baara widoonni fultanno gede hajajinsa.

¹⁹ Mittu Seeru rosiisaanchi Yesuusiwa daye, «Rosiisaancho, ha'rattowa baala hoodekki dayemmo» yii.

²⁰ Yesuusi qole, «Yeedaallate bale noonsa; buubbanno cearano minu noonsa. Manchi Beettira kayinni umo worannowi nafa dinosi» yee qolisi.

²¹ Rosaanosi giddonni mittichu, «Mooticha, balaxe ha're anna'ya madaadheemmo gede fajjie» yiisi.

²² Yesuusi kayinni, «Reyitinori reeshshansa madaadhitona agurte, ati ane hoode amo!» yii.

YESUUSI DAMBALA SAMMI ASSI

²³ Yesuusi ha'rara yowolo eita, rosaanosino ledosi hadhu.

²⁴ Baaru aana hadhanni heedheenna lowo hombobolatte ka'u. Dambaluno kae yowolo egemmara rahi. Hatte yannara kayinni Yesuusi goxe no.

²⁵ Rosaanosi Yesuusiwa shiqqe, «Mooticha, ba'nummona gatisinke!» yite baqqi assitusi.

²⁶ Yesuusi, «Ki'ne amma'na xe'ino'neri! Mayira waajjitinanni?» yiinsa. Hakkunni gedensaanni Yesuusi kae hombobolattenna baara rufeenna lowo geeshsha sammi yii.

²⁷ Mannuno dhaggeeffate, «Hombobolattenna baaru nafa hajajamannosihu kuni hiittoo manchooti!» yii.

YESUUSI DURRIISU AMADINORE LAME MANNA HURSI

²⁸ Yesuusi Galiilu Baara tayise fule Gergesenooni yinanniwa dayita, durriisu amadinori lamu manni mooggate giddonni fulte Yesuusinni xaaddu. Insa lowo geeshsha qarrissannore ikkitino daafira, mannu hatte doogo hige sa"a didandaanno.

²⁹ Insano, «Ati Maganu Beettooti; atera ninke ledo mayi noohe? Yanna daggukkinni qarrisattonkera dayitto?» yitanni raartu.

³⁰ Insawiinni shiimare xeertidhe kiiro haammata manchaame hayisso ittanni no.

³¹ Durriisu, «Fushshite hunattonkeha ikkiro marre manchaamete giddora e'neemmo gede assinke!» yite huuccidhu.

³² Yesuusino, «Maahoyyena martine e'e!» yeennansa durriissa lamunku manchi giddonni fulte manchaamete giddora e'u. Manchaame baala boonu gaminni bitintirtanni dirrite baaru giddo e'e reyitu.

³³ Manchaame allaalte noori xooqqe katamu giddora e'e ikkino coye baala dudubbu. Durriisu amadino manni aana ikkinore baala hasaabbu.

³⁴ Hakkunni gedensaanni katamu manni baalu Yesuusa la"ara fuli. Marte Yesuusa affuhu gedensaanni gobbansa agure ha'ranno gede huuccidhu.