MAATEWOOSI 7 - Qullaawa Maxaafa

WOLOOTU AANA YOO YAA DIHASIISSANNO

¹ Yesuusi, «Ki'nera yoo yinanni'nekki gede, ki'neno woleho yoo yitinoonte.

² Woleho yitinoonni yoo garinni Maganu ki'nerano yoo yaanno'ne. Woleho safartine uyitinanni safaraanchinni safarranni'ne.

³ Ate ille giddo noo mokkollicho laittokkinni rodiikki illera noo ishincho mayira la"atto?

⁴ Ate ille giddo noo mokkollicho afittokkinni rodookki, ‹Rodoo'ya, illekki giddo noo ishincho fushshoheni?› hiitto yaatto?

⁵ Ati lawisiisaanchu! Hanni balaxxe umikki ille giddo noo mokkollicho fushshi'ri. Hakkunni gedensaanni rodiikki illera noo ishincho fushshate illekki xunsite la'anno.

⁶ «Wirri yee ki'ne ga'manno'nekki gede, qullaawoota woshshaho tugginoonte. Lekkatenni kakkaddannona, maareekonnire manchaamete albaanni wortinoonte» yii.

HUUCCIDHE, HASIDHE, WOSHSHIDHE

⁷ Yesuusi qole, «Huuccidhe, uyinanni'nena; hasidhe, afidhinannina; woshshidhe fannanni'nena.

⁸ Huucci'rannohu baalu adhanno; hasi'rannohu afi'ranno; woshshi'rannohura fannannisi.

⁹ Ki'ne giddonni, beettisi tima huucci'reenna kincho aannohu nooni?

¹⁰ Qulxu'me huucci'reenna hamashsho aannoni?

¹¹ Ki'ne bushuulle ikkitine heedhinenni ooso'nera danchare aa egentinina, gordoho noohu Anni'ne huuccidhannorira roorenka hiitto danchare aa hooganno?

¹² Mannu ki'nera assa'nera hasidhinannire baala ki'neno insara assensa! Seeru maxaafinna himanaanono konne coye kultanno» yii.

RUUKKASHSHO WAALCHO

¹³ Yesuusi lede, «Ruukkashsho waalcho higgine e'e! Baote widira massanno waalchi hala'ladoho. Doogono hala'ladote; hakkaanni higge e'annorino batinyeho.

¹⁴ Heeshshote widira massanno waalchi ruukkashshoho; doogono gurchote; ise afi'ranno manni kiiro shiimaho» yii.

HAQQICHO LAALOSENNI ANFANNI

¹⁵ Yesuusi, «Kaphaano himanaanowiinni umo'ne agadhe! Insa ge'reewu lande uddidhe dogganno'ne; giddoyidonsa kayinni bibbiddanno hiyyeeyyeeti.

¹⁶ Insa baddine affinannihu guminsanniiti. Utu aaninni woyinete laalo xinqi'nannini? Kokko'lu aaninni balasete laalo xinqi'nannini?

¹⁷ Dancha haqqicho baala dancha laalo laaltanno. Busha haqqicho kayinni busha laalo laaltanno.

¹⁸ Dancha haqqicho busha laalo laala didandiitanno; busha haqqichono dancha laalo laala didandiitanno.

¹⁹ Dancha laalo laaltannokki haqqicho baala murre giirate tunganni.

²⁰ Kaphaano himanaanono loosinsa guminni affinanninsa» yii.

²¹ Yesuusi lede, «‹Mooticha'ya! Mooticha'ya!› yaannoehu baalu gordu Gashshoote dieanno. Gordu Gashshoote eannohu Anni'ya yiinore wonshannoho.

²² Yoote barra lowo manni, ‹Mooticha'ya! Mooticha'ya! Su'mikkinni himana dicoyi'nummo? Su'mikkinni durriisa difushshinummo? Su'mikkinni lowo maalale diloonsummo?› yaannoe.

²³ Hatte yannara ani kayinni, ‹Horonta diegennoommo'ne; ki'ne bunshe assitinanniri, anewiinni faffe!› yeemmonsa» yii.

KINCHUNNA SHAAFU AANA MINNOONNI MINNA LAWISHSHA

²⁴ Yesuusi aanche, «Qaale'ya macciishshe wonshannohu baalu mine kinchu aana mi'ninoha egennaamo mancho lawanno.

²⁵ Xeena gani; lolahuno dayi; bubbeno bubbisse hakkonne mine xiibbu. Ikkollana minu kinchu aana minnoonni daafira diuwino.

²⁶ Qaale'ya macciishshe wonshannokkihu, mine shaafu aana mi'ninoha hawanya mancho lawanno.

²⁷ Xeena gani; lolahuno dayi; bubbeno bubbisse hakkonne mine xiibbu. Minuno hakkawoyintenni uwi; uwasino lowo geeshsha jaddonnite» yii.

²⁸ Yesuusi konne coye coyi're gudihu gedensaanni, macciishshitinori rosiisino roso dhaggeeffattu.

²⁹ Yesuusi Muse Seeri rosiisaano gede ikkikkinni Gashshootu mootoolla gede ikke rosiisinonsa.