MAATEWOOSI 27 - Qullaawa Maxaafa

YESUUSI PHILAAXOOSI ALBIRA YOOTE SHIQI

¹ Soodo guto qeesootu roorrootinna geerru baalu Yesuusi aana reyote yoo yiisiissara amaalantu.

² Hakkunni gedensaanni, Yesuusa usurte haadhe hadhe gashshaanchu Philaaxoosira sayisse uyitu.

³ Yihudi Yesuusi aana reyote yoo yinoonnita macciishshe gaabbi; sajjoonka kinchu birra qeesootu roorrootiranna gobbate geerrira masse qole,

⁴ «Keeraancho mancho reyote sayise aa'yara sao assoommo» yii. Insa kayinni, «Ninke mayi xiwinke! Umikki hajaati!» yitusi.

⁵ Isino sajjoonka birra Qullaawu Mini giddo fince hune, ha're qalxi're reyi.

⁶ Qeesootu roorrooti sajjoonka kinchu birra haadhe, «Kuni mundeete woxe ikkino daafira Qullaawu Mini fushshaati ledo karsa digaraho» yitu.

⁷ Kunnira amaalante wosinaho waammate darga ikkanno gede dora gananno manchi uulla hirtu.

⁸ Kunninni kainohunni, hattenne uulla techo geeshsha, «Mundeete uullaati» yinanni.

⁹ Kunni garinni, Himanaanchu Ermiyaasi, «Israeelete gosa heddinosi waaga sajjoo kinchu birra adhitu.

¹⁰ Mootichu hajajinoe garinni, dora ganannohu uullara baattu» yiino himani wo'mi.

YESUUSA PHILAAXOOSIWA HAADHE MASSITUSI

¹¹ Hatte yannara Yesuusi gashshaanchu Philaaxoosi albira shiqi. Philaaxoosino, «Ati Ayihudete mooteeti?» yee xa'misi. Yesuusino, «Ati yiitto gedeeti» yee dawari.

¹² Ikkollana qeesootu roorrootinna geerru bushiishshannasi mittoreno diqolino.

¹³ Hakkunni gedensaanni Philaaxoosi Yesuusa, «Meu coyinni bushiishshannahe sammi yaatto?» yiisi.

¹⁴ Yesuusi kayinni, gashshaanchu maala'la geeshsha yitinosi coyira mitte dawaro nafa diqolino.

YESUUSIRA REYOTE YOO YITU

¹⁵ Gashshaanchu, Agure Sa"ate Ayyaanira mannu, «Tirinke!» yaannoha mitto usuranya tira rosoho.

¹⁶ Hatte yannara, «Barbaani» yinannihu haxawarru manchi usurame no.

¹⁷ Kunnira mannu gamba yeenna Philaaxoosi, «Aye tirammo'nera baxxinanni? Barbaaninso Kiristoosa yinanni Yesuusa?» yee xa'mi.

¹⁸ Togo yiinohu, Yesuusa dhiibbetenni sayisse uyitinota afinohuraati.

¹⁹ Hakkunni gedensaanni Philaaxoosi yoote barcimira ofolle hee'reenna galtesi, «Isinni kainohunni ani ankarro haaqeete lowo geeshsha qarramanni galoommana, kunni keeraanchu manchi aana mittoreno assitooti!» yite sokka sokku.

²⁰ Hatte yannara qeesootu roorrootinna geerru, «Barbaani tirinke! Yesuusi kayinni reyo!» yite Philaaxoosi xa'manno manna kakkayissu.

²¹ Gashshaanchuno, «Lamunku giddonni hiikkonne tirammo'nera baxxinanni?» yee manna layinkimeeshsho xa'mi. Insano, «Barbaani tirattonkera banxeemmo» yite qoltusi.

²² Philaaxoosi, «Kiristoosa yinanniha Yesuusa hiissoyya?» yee xa'minsa. Insa baalunku, «Suti!» yite qoltu.

²³ Gashshaanchuno, «Mayira? Isi assino bunshe maati?» yiinsa. Insa kayinni, «Suti!» yite ledde cancitu.

²⁴ Kunnira, Philaaxoosi kuni coyi canco ledannota ikkinnina woyyannori nookkita afe, waa abbisiisi're, «Kunni manchi reyo ane dihassanno. Ki'ne kayinni diagurtanno'ne!» yee mannu albaanni anga hayishshi'ri.

²⁵ Mannu baalunku, «Isi reyonni daanno cubbi ninkeranna oosonkera iillo» yii.

²⁶ Hatte yannara Philaaxoosi Barbaani tire, Yesuusa kayinni lichetenni gansiise, suntanni gede sayise uyi.

GAADDO YESUUSA QACIFATTUSI

²⁷ Hatte yannara, Gashshaanchu gaaddo Yesuusa haadhe Philaaxoosi hoowe massitusi. Gaaddo baala Yesuusa gaangeessite uurritanno gede assitu.

²⁸ Uddanosi mulqite, duume xiillitte uddano uddisiissusi.

²⁹ Utu worraaqqa seekkite umoho wortusi. Qiniiticho angara siqqo worte, albasiinni guluphitanni, «Ayihudete Moote, mootimma geedonnita ikkitohe!» yitanni qacifattusi.

³⁰ Anja tuffanni, siqqono angasinni haadhe umo gantusi.

³¹ Qacifattusihu gedensaanni duume xiillitte uddano mulqite, uddanosi uddisiisse suttara haadhe hadhusi.

YESUUSI SUTAMA

³² Gashshaanchu hoowenni fultanni heedhe, Simiooni yinanniha Qereenu gobba mancho affe, Yesuusi masiqala duhanno gede qarrissusi.

³³ Yesuusa Golgoota haadhe massitusi. Golgoota yaa, Umu Qooncho yaate.

³⁴ Hakkiicho hadhote ledo karsinoonnita woyinete xajje uyitusi. Isi kayinni suumetenni kise kae aga giwi.

³⁵ Yesuusa suttuhu gedensaanni, uddannasira hixa tuqqite beeqqitu.

³⁶ Hakkiicho ofolte iso agartu.

³⁷ Yesuusi sutaminohu mayiraatiro kultanno borro, «Kuni Yihudu Moote Yesuusaati» yite borreessite umosiinni wortu.

³⁸ Hatte yannara, Yesuusi ledo lame addi-fuloota abbite mitto qiniitesiinni, mitto gurasiinni suttu.

³⁹ Mulesiinni hige sa"anno manni umo shafanni,

⁴⁰ «Qullaawa Mine diigge sasu barrinni minattohu, hanni umokki gatisissiyya! Maganu Beetto ikkoottoro, hanni masiqalu aaninni dirri!» yee arrassisi.

⁴¹ Kunni garinni Qeesootu Roorrooti, Muse Seeri rosiisaanonna geerru,

⁴² «Wole gatisinona, umosi kayinni gatisa didandaanno. Isi Israeelete Moote ikkinoro, hanni masiqalu aaninni dirrossi; ninkeno la'ne ka'ne ammanneemmosina!» yite qacifattusi.

⁴³ Isi Magano hexxino. « ‹Ani Maganu Beettooti› yiinona, baxinoro hanni Maganu xa gatisossisiyya!» yitu.

⁴⁴ Ledosi sutante noo addi-fulootino hakko garinni xontinosi.

YESUUSI REYO

⁴⁵ Barra lee saatenni kayise honse saate geeshsha baatto baala tunsitu.

⁴⁶ Honse saate ikkita Yesuusi, «Eloyi! Eloyi! Lama Sabaqitani?» yee lowo qaalinni coyi'ri. Hatto yaa, «Magano'ya, Magano'ya, mayira agurittoe?» yaate.

⁴⁷ Hakko uurrite noori giddonni mitu mitu macciishshite, «Kuneeti, Eeliyaasi woshshanni no!» yitu.

⁴⁸ Hatte yannara insa giddonni mittichu dode mare, haanxicho shiishu giddo cuue, Yesuusi aganno gede siqqote umira wore uyisi.

⁴⁹ Wolootu kayinni, «Hanni agarre! Eeliyaasi daye gatisannosiro la'neemmona!» yitu.

⁵⁰ Yesuusi layinkimeeshsho lowo geeshsha raare kaeenna foolu fulisi.

⁵¹ Hatte yannara, Qullaawu Mini dukko alinni eeli geeshsha dadhante lamewa fultu. Uullano milli yitu; kinnano daddadhantu.

⁵² Waammano fa'nanteenna, reyitino keeraano giddonnino lowo manni kai.

⁵³ Waammate giddonni fulte, Yesuusi reyotenni kaihu gedensaanni Qullaawa Katama Yerusaalame e'u. Hakkiicho lowo mannira leeltu.

⁵⁴ Olantote roorrichinna isi ledo Yesuusa agarte noori uulla milli yitutanna ikkino coye baala la'e lowo geeshsha waajjite, «Kuni manchi halaalintanni Maganu Beettooti» yitu.

⁵⁵ Lowo meenti xeertote uurre la"anni no. Insa Galiilunni kayise Yesuusa towatanni hoodesi ha'rinoreeti.

⁵⁶ Insa giddo Megidelitte Maariyaami, Yaiqoobinna Yooseefi ama Maariyaaminna Zebidewoosi ooso amano ledo no.

YESUUSA WAAMMOONNI GARA

⁵⁷ Hawarrita Yooseefi yinannihu mittu dureessu Armaatiyu Katami manchi hakkiira kae dayi. Isino Yesuusi rosaanchooti.

⁵⁸ Kuni manchi Philaaxoosiwa mare, Yesuusi reeshsha aannosi gede huucci'ri. Philaaxoosino Yesuusi reeshsha uyinannisi gede hajaji.

⁵⁹ Kunnira Yooseefi Yesuusi reeshsha masiqalu aaninni dirrise, haaro seemmanni kafani.

⁶⁰ Kincho kurkurre seekkinoonnitera haaro umisi waamma giddo madaarisi. Hakkunni gedensaanni lowo kincho gongo'mishe, waammate afoo cufe ha'ri.

⁶¹ Megidelitte Maariyaaminna wole Maariyaami hakkiicho waammate albaanni ofolle no.

YESUUSI WAAMMA AGARTINORE

⁶² Ga'a gede Ayihudete Fooliishsho Barraati; qeesootu roorrootinna Farisootu mitteenni Philaaxoosiwa marte,

⁶³ «Mooticha, hakku so'risiisaanchu lubbotenni hee're, ‹Sasu barri gedensaanni reyotenni kaeemmo› yiinoti qaagantinonke.

⁶⁴ Kunnira, rosaanosi marte moortannokki gedenna mannahono, ‹Kuneeti, reyotenni kaino› yite dudubbannokki gede sasu barri geeshsha waamma agarantanno gede hajaji. Hatto ikka hoogiro, gedensiidi so'risiisa albitenni roore ikkitanno» yitu.

⁶⁵ Philaaxoosino, «Kuneeti, agartanno gaaddo noo'nena martine hasidhinoonni garinni agarsiisidhe!» yiinsa.

⁶⁶ Kunnira marte waammate kinchi aana maattama gante agartanno gede gaaddo wortu.