MAATEWOOSI 25 - Qullaawa Maxaafa

TONNU SEENNI LAWISHSHA

¹ Yesuusi lede, «Hatte yannara Gordu Gashshooti seenne adhara daannoha haa'rara caabbicho anga adhe noore tonne seenne lawanno.

² Insa giddonni onte balalootaho; onte busulootaho.

³ Balalootaho laamba worranniri noonsana laambu kayinni dinonsa.

⁴ Busulootu laamba worrannire anga adhe giddono laamba wodhe no.

⁵ Seenne adhannohu daa keeshshita, wo'munku goxe bai.

⁶ «Hashshu taalootira, ‹Kuneeti, seenne adhannohu dayino! Amme fultine haadhe!› yinanni canco macciishshini.

⁷ Hatte yannara baalunku seenni kae caabbichonsa biddi assi'ri.

⁸ Balalootu seenni busuloota, ‹Caabbichinke xoaraatina laambi'ne aaninni shiima uuyyenke› yii.

⁹ Busulootu kayinni, ‹Ninkeranna ki'nera ikkanno laambi dinonke. Kunni daafira hadhine hirranniwiinni ki'nera ikkannoha hidhe› yiinsa.

¹⁰ «Balalootu seenni laamba hidhara ha're hee'reenna seenne adhannohu dayi. Qixxaawe agadhe noo seenni dayinoha haa're ledosi jilu hari giddora ei; cufanano cunfi.

¹¹ Gede'ninori kae daye, ‹Mooticha ballo, faninke!› yii.

¹² «Isi kayinni, ‹Halaale kuleemmo'nena, ani diegennoommo'ne!› yiinsa.

¹³ «Kunnira, barranna saate diaffinoonnina jaattine agadhe!» yiinsa.

SASE SOQQAMAANO LAWISHSHA

¹⁴ Yesuusi, «Gordu Gashshooti, ‹Mittu manchi wole gobba ha'ranni soqqamaanosi woshshe jajjasi uyi're ha'rinoha lawanno.

¹⁵ Mootichuno dandiitanno deerrinni, mittoho onte kume birra, mittoho lame kume birra, mittoho qole mitto kume birra beehe ha'ri.

¹⁶ Onte kume birra adhihu, ha're daddale wole onte kume birra ledi.

¹⁷ Lame kume birra adhihuno, ha're daddale wole lame kume birra ledi.

¹⁸ Mitto kume birra adhihu kayinni, ha're mootichu woxe baatto ume madaari.

¹⁹ Lowo yanna gedensaanni, hattenne soqqamaano mootichi daye jajjasi towaxxi.

²⁰ «Onte kume adhi soqqamaanchi daye, ‹Mooticha'ya, ati onte kume birra oottoe; kuneeti, ani daddale onte kume ledoommo› yii.

²¹ Mootichisino, ‹Dancha assootto! Ati ammanamoottohonna dancha soqqamaanchooti. Shiimurira ammanamoottona, loworira shoomeemmohe. Amo Mootichikki hagiirre gutami!› yiisi.

²² «Lame kume birra adhihuno daye, ‹Mooticha'ya! Ati lame kume birra oottoe; kuneeti, ani daddale lame kume ledoommo› yii.

²³ «Mootichisino, ‹Danchaho! Ati ammanamoottohonna dancha soqqamaanchooti. Shiimurira ammanamoottona, loworira shoomeemmohe. Amo Mootichikki hagiirre gutami!› yiisi.

²⁴ «Mitto kume birra adhihu daye, ‹Mooticha'ya! Wixi'roottokkiha mixxattoha, fincoottokkiha gamba assi'rattoha kaajjado mancho ikkoottota egennoommo.

²⁵ Kunnira waajje woxekki baatto ume madaaroommo; woxikki kuneeti› yiisi.

²⁶ «Mootichu kayinni, ‹Ati bushunna cee'maleessu soqqamaanchi, wixi'roommokkiha mixxeemmota, fincoommokkiha gamba assi'reemmota egennoottoha ikkiro,

²⁷ woxe'ya lexxannowa wora hasiissannohe; ani dayemmo yannara qallote ledo adheemmoha hunootto.

²⁸ Xa woxe haadhine tonnu kumi noosihura uuyye.

²⁹ Noosihura lendanni; noosikkihu aaninni kayinni noosinka haa'ne hoollanni.

³⁰ Konne tidhinokki soqqamaancho gobba fushshitine tunsichoho tugge. Hakkiicho wi'lanna suume ita agartannosi› yiino» yii.

GOOFIMARCHOHO DAGGANNO YOO

³¹ Yesuusi lede, «Manchi Beetti sokkaasine baalatenni dukkisame ayirrinyunni daye ayirrinyu barcimira ofollanno.

³² Gosa baala albasiinni gamba yitanno. Allaalaanchu ge'reewo meuwiinni badannonte gede, isino gosa kawanna ka'a badanno.

³³ Ge'reewo qiniiteenni, me"e guraanni uurrisanno.

³⁴ «Hatte yannara Moote qiniitesiinni noore, ‹Ki'ne Anni'ya maassi'rino'neri! Amme! Alame kalaqantuhunni kayise qixxaawino'neha Gordu Gashshoote ragidhe!

³⁵ Hudi'reenna itissinoonnie; goo'reenna hayikkissinoonnie; wosinchimma dayenna haadhinoonnie.

³⁶ Kalleenna uddisiissinoonnie; dhiwameenna la'inoonnie; usurameenna xa'mitinoonnie› yaannonsa.

³⁷ «Hatte yannara keeraano, ‹Mooticha, hudidhe daggeenna anfe mamoote itinsummohe? Goo'rite daggeenna anfe mamoote hayikkinsummohe?

³⁸ Wosinchimma daggeenna anfe mamoote haa'nummohe? Kallite daggeenna anfe mamoote uddisiinsummohe?

³⁹ Dhiwanteenna woy usuranteenna anfe mamoote xa'minummohe?› yitanno.

⁴⁰ «Mooteno, ‹Halaale kuleemmo'nena, kuri maa'nuullu roduuwi'ya giddonni mittoho nafa assitinoonnihu baalu anera assitinoonniho yaate› yee qolinsa.

⁴¹ «Hakkunni gedensaanni guraanni noorirano, ‹Ki'ne rumantinoonniri! Anewiinni xeertidhe! Sheexaanehonna sokkaanosira qixxeessinoonnitewa hegere giirawa hadhe!

⁴² Hudi'reenna di"itissinoonnie; goo'reenna dihayikkissinoonnie;

⁴³ wosinchimma dayenna dihaadhinoonnie. Kalleenna diuddisiissinoonnie; dhiwameenna dila'inoonnie; usurameenna dixa'mitinoonnie› yaannonsa.

⁴⁴ «Insa qolte, ‹Mooticha, hudidheenna woy goo'riteenna, wosinchimma daggeenna woy kalliteenna, dhiwanteenna woy usuranteenna anfe mamoote kaa'la hoongummohe?› yite qoltannosi.

⁴⁵ «Mooteno, ‹Halaale kuleemmo'nena, kuri maa'nuullu roduuwi'ya giddonni mittoho nafa assitinoonnikkihu baalu anera assitinoonnikkiho yaate› yee qolannonsa.

⁴⁶ «Kunni daafira, ki'ne hegere qorrichiwa, keeraano kayinni hegere heeshshowa hadhanno» yiinsa.