MAATEWOOSI 20 - Qullaawa Maxaafa

WOYINETE HAQQICHO MAAMMAASHSHA

¹ Yesuusi qole, «Gordu Gashshooti woyinete kaashshi darga woxunni loossanno loosaasine hasi'rara gute fulino mancho lawanno.

² Isi mittu mittunkura mittu barrira mitto kinchu birra baatansara sumuu yii; loosaasineno loossanno gede woyinete kaashshi giddora soyi.

³ Sase saate ikkanno hedora fule, woloota loosu nookkiha gudumaaleho uurrite noore afe,

⁴ ‹Ki'neno woyinete kaashshi giddora hadhine loosse; hasiisanno'nere ani baateemmo'nena› yiinsa.

⁵ Insano woyinete kaashshi giddora hadhu. Leenna honse saate ikkanno hedorano fule hatto assi.

⁶ Tonaa mite saate ikkanno hedorano fule wole manna uurre nooha afe, ‹Ki'ne barra wo'ma loosiweello uurritine mayira hossini?› yee xa'minsa.

⁷ «Insa qolte, ‹Looso aannonkeha hoongeeti› yitu. «Isino, ‹Hakkawoyiteetiro, ki'neno hadhine woyinete kaashshi darga loosse!› yiinsa.

⁸ «Hawarro yannara woyinete kaashshi anni loosiisannoha, ‹Loosaasine woshshite hawarro barra dagge loossurinni kayisse soodo gutte hanaffuri geeshsha hunkiinsa waaga uyinsa!› yii.

⁹ Kunnira, tonaa mite saatera dagge loossurino mittu mittunku mitto mitto kinchu birra adhitu.

¹⁰ Balaxxe looso hanaffuri woxe adhitara shiqqu yannara, wolootunni roorsine uyinanninsaha lawinonsa. Ikkollana insano mittu mittunku mitto mitto kinchu birra adhitu.

¹¹ Woxe adhituhu gedensaanni woyinete kaashshi annira,

¹² ‹Kuri gede'nite dagguri mitte saate calla loossino. Ikkollana ninke barra wo'ma arrishshote giirammanni daafurre honsoommori ledo taashshootto› yite gunguntu.

¹³ «Woyinete kaashshi anni mittu loosaasinchira, ‹Jaala'ya, mittoreno dihunoommohe. Barrunni mitto kinchu birra baateemmohe gede dicoyi'rammoommo?

¹⁴ Kunnira iillannohere adhite ha'ri; atera baatummohu geeshshire gede'ne dayinohurano aa halcho'yaati.

¹⁵ Woxi'yanni hasi'roommore assa didandeemmo? Woy ani shooshaqa ikkoommota dhiibbifatatto?› yiino» yii.

¹⁶ Hakkunni gedensaanni Yesuusi, «Hattonni gedensiidiri albiidire ikkitanno; albiidiri gedensiidire ikkitanno» yii.

YESUUSI REYOSIRENNA KA"ASIRE SAYIKKIMEESHSHO COYI'RI

¹⁷ Hakkunni gedensaanni Yesuusi Yerusaalame ha'ranni doogote aana hee're tonaa lamenka rosaano calluwansa isiwa shiqqanno gede asse,

¹⁸ «Kuneeti, xa ninke Yerusaalame ha'nanni hee'noommo. Hakkiicho Manchi Beetto qeesootu roorrootiranna Seeru Rosiisaanora sayinse uyinanni. Insano reyote yoo yitannosi.

¹⁹ Dagate angara sayisse uyitannosi; insano qacifattannosi; lichetenni gantannosi; shitannosi. Ikkollana sasu barri gedensaanni reyotenni ka"anno» yii.

ZEBIDEWOOSI OOSO AMA HUUCCATTO

²⁰ Hakkunni gedensaanni, Zebidewoosi ooso ama oosose ledo Yesuusiwa shiqqe albasiinni guluphite, mitto coye assannose gede huuccidhu.

²¹ Yesuusino, «Ma assammohera hasi'ratta?» yiise. Iseno, «Tenne lamenta ooso'ya Gashshootikkira mittu qiniitekkiinni, mittu gurakkiinni ofollanno gede assie» yitu.

²² Yesuusi kayinni, «Huuccidhinannire diegentinoonni. Ani adhate rahe noommo qarra adha dandiitinannini?» yiinsa. Insano, «Ee, dandiineemmo» yitu.

²³ Yesuusino, «Addanka ani adheemmo qarra adhitinanni. Ikkollana, manna qiniite'yaanninna gura'yaanni ofollanno gede asseemmohu ane di"ikkoommo. Konne darga uyinannihu Anni'ya qixxeessino manniraati» yii.

²⁴ Gattinori tonnunku konne coye macciishshite, lamunku roduuwira hanqitu.

²⁵ Yesuusi kayinni baalanka woshshe, «Dagate roorrooti manninsa gashshaanooti. Roorrootinsa insa aana roorre afidhannota egentinoonni.

²⁶ Ki'ne giddo kayinni hattoo coyi dihasiisanno. Wo'munkura aliidiha ikka hasi'rannohu, soqqamaancho'ne ikko.

²⁷ Giddo'ne albiidiha ikka hasi'rannohuno, borojjicho'ne ikko.

²⁸ Manchi Beettino soqqamaranna lowo manna wode gatisate lubbosi sayise aara dayino ikkinnina soqqammasira didayino» yii.

YESUUSI LAME ILLIWEELOOTA ILLE FANI

²⁹ Hakkunni gedensaanni Iyyaarko fulte hadhanni heedheenna lowo manni Yesuusi hoode ha'ri.

³⁰ Doogote gama ofolte noori lamu illiweelooti hakkaanni hige sa"anni noohu Yesuusa ikkinota macciishshite, «Mooticha, Daawiti Beetto ballo mararinke!» yite raartu.

³¹ Mannuno, «Sammi yiiyye!» yee rufinsa. Insa kayinni, «Mooticha Daawiti Beetto ballo mararinke!» yitanni albinni roorsite raartu.

³² Yesuusino uurre woshshinsahu gedensaanni, «Ma assammo'nera hasidhinanni?» yiinsa.

³³ Insano, «Mooticha, ille fa'nitankera hasi'noommo!» yitu.

³⁴ Yesuusi marare illensa amammadi; insano hakkawoyintenni ille fa'niteennansa hoodesi hadhu.