MAATEWOOSI 12 - Qullaawa Maxaafa

FOOLIISHSHOTE BARRI DAAFIRA SHIQINSHOONNI XA'MO

¹ Hatte yannara Yesuusi Fooliishshote Barra, shoyitino qamade giddoonni hige sa"anni hee'reenna, ledosi noo rosaano shoye tattayisse ittu.

² Farisootu konne coye la'e Yesuusa, «Lai, rosaanokki Fooliishshote Barra hoolloonnire assitanni no» yitu.

³ Yesuusi qole, «Daawiti mannisi ledo hee're hudi'ri yannara assinore horonta dinabbabbinoonni?

⁴ Maganu Minira e"e, qeesoota callaho fajjinoonniha qullaawa tima itino; ledosi noo mannirano eenna itino.

⁵ Qoleno qeesootu Qullaawa Mine heedhe Fooliishshote Barra lageessansa sao ikkitannonsakkita Muse Seeri giddo borreessinoonniha dinabbabbinoonni?

⁶ Kuleemmo'nena, Qullaawa Mine roorannohu kuneeti konniicho no.

⁷ Ledeno, ‹Ani kakkalo ikkikkinni maaro baxeemmo› yaannoha maxaafu qaale wodanchitinoommero, sao assinokki manni aana yoo diyitinanni.

⁸ Manchi Beetti isinni Fooliishshote Barrira Mootichaho» yii.

YESUUSI ANGA LAANSHAAWINO MANCHO HURSI

⁹ Yesuusi hakkiichinni kae xaadu minira ei.

¹⁰ Hakko mittichu anga laanshaawino manchi no. Yesuusi aana coye hasidhe, «Fooliishshote Barra dhiwaminoha hursate fajjinoonnini?» yite xa'mitusi.

¹¹ Yesuusi qole, «Fooliishshote Barra, ki'ne giddo afi'rino ge'recho balete ubbeenna fushshannokkihu ayeti?

¹² Mannu ge'rechotenni hiikke roora hooganno! Kunni daafira Fooliishshote Barra danchare loosa fajjinoonni» yiinsa.

¹³ Hakkunni gedensaanni Yesuusi anga laanshaawino mancho, «Angakki diriirsi!» yiisi. Isino anga diriirsi'rita, angasi hurte te'enne gedee fayyaaleette ikkitu.

¹⁴ Farisootu kayinni hakkiinni fulte Yesuusa shitanno gara amaalantu.

DOORAMINOHA MAGANU SOQQAMAANCHO

¹⁵ Yesuusi kayinni ganonsa afe hakkiinni wirri yii; lowo mannino hoodesi ha'ri. Isino dhiwantinore baala hursi.

¹⁶ Isire ayirano kultannokki gedeno duu're dhaaminsa.

¹⁷ Kuni ikkinohu himanaanchu Isayaasi widoonni kulloonni himani wo'manno gedeeti:

¹⁸ «Doodhoommohu soqqamaanchi'ya konneeti. Isi ani baxeemmohonna hagiidheemmoho. Ayyaana'yano isi aana woreemmo; isi gosate ane yoo kulanno.

¹⁹ Isi dimoromanno woy cance dicoyi'ranno; dooggate aana huurosi dimacciishshinanni.

²⁰ Dabbino shomboqqo nafa dihiiqqanno; ba"ara rahino caabbichono dixoyissanno. Halaalu qeela geeshsha cincanno.

²¹ Gosa baala iso hexxitanno» yii.

YESUUSINNA BIELIZEBUULI

²² Hakkunni gedensaanni mannu mitto durriisu amadinoha, danqichanna illiweelo mancho Yesuusiwa haa're abbi. Yesuusino hurseennasi manchu coyi'ranna la"a dandii.

²³ Mannu baalu dhaggeeffate, «Kuni Daawiti Beettooti ikka?» yii.

²⁴ Farisootu kayinni tenne macciishshite, «Isi durriisa fushshanni noohu, roorrichinsa Bielizebuuli wolqanniitilla» yitu.

²⁵ Yesuusi wodaninsata afe, «Isiniiwa gosooma baxxanno gashshooti uwanno. Mittu katami giddo hee'rannohu woy mittu mini mannino babbaxxannoha ikkiro hee're diafanno.

²⁶ Sheexaanu Sheexaane fushshannoha ikkiro, isi isiniiwa babbadami yaate. Kunni garinni gashshootisi hiitto ikke kaajje uurrannoyya?

²⁷ Anino durriisa fushsheemmohu durriisu roorrichi wolqanni ikkiro, ki'ne hooderi mayi wolqanni fushshitannoyya? Kunnira, hoode'neri ki'ne aana yoo yitanno.

²⁸ Ani durriisa Maganu Ayyaaninni fushsheemmoha ikkiro kayinni, Maganu Gashshooti ki'newa dayino yaate.

²⁹ Qoleno, mittu manchi balaxe wolqaataamo usurikkinni wolqaataamu minira e"e jajjasi adha dandaannoni? Usurihu gedensaanni kayinni minesi mulqanno.

³⁰ Ane ledoha ikkinokkihu baalu giwannoe. Ane ledo gamba assi'rannokkihu baalu fince hu'nanno.

³¹ Kunni daafira, mannaho loosanno cubbonna xonanno xono baala agurranni. Qullaawa Ayyaana xonino baalira kayinni saosi diagurantannosi yeemmo'ne.

³² Manchi Beetti aana xonote qaale coyi'ranno baalira saosi agurrannisi. Qullaawa Ayyaana xonino baalira kayinni tenne alamerano ikko daggannotera saosi diagurrannisi» yiinsa.

DANCHA HAQQICHO GUMISENNI ANFANNI

³³ Yesuusi lede, «Haqqicho baala gumisenni anfanni daafira, haqqicho dancha assidhe; gumiseno dancha ikkanno'ne. Haqqicho busha ikkituro kayinni, gumiseno busha ikkanno.

³⁴ Ki'ne hamashshu ooso, bushuulle ikkitine heedhine dancha coye coyi'ra hiitto dandiitinanni? Mannu wodanisira wo'me gatinoha coyi'ranno.

³⁵ Danchu manchi danchu miinjisi giddonni dancha coye fushshanno; bushu manchi bushu miinjisi giddonni busha coye fushshanno.

³⁶ Halaale kuleemmo'nena, mannu sammi yee hasi'ri garinni coyi'rannohura mittu mittunku qaalira yoote barra xa'mamanno.

³⁷ Coyi'rootto coyinni kainohunni keeraawatto; coyi'rootto coyinni kainohunni xa'mamatto» yii.

MAALALE LEELLISHATE SHIQQINO XA'MO

³⁸ Hatte yannara mitu mitu Seeru rosiisaanonna Farisootu Yesuusa, «Rosiisaancho, ati maalale assitanna la'nammora hasi'neemmo!» yitusi.

³⁹ Yesuusi kayinni, «Bushanna foora ilama maalale la"a hasidhanno. Ikkollana himanaanchu Yoonaasi maalale ka'a wole maalale dileellinshanninsa.

⁴⁰ Yoonaasi mittu jawu qulxu'michi godowi giddo sase barranna sase hashsha keeshshinte gede, Manchi Beettino waammate giddo sase barranna sase hashsha keeshshanno.

⁴¹ Nennewe Katami manni Yoote Barra tenne yanna ilama ledo kae insa aana yoo yaanno. Nennewe manni Yoonaasi kuli yannara, yiinore macciishshe cubbo aagintaawe higino. Xa kayinni kune Yoonaasi rooru konne no.

⁴² Saaba Mootitte Selemooni hayyo macciishshitara gobbate qaccenni ka'e daggino daafira, yoote barra tenne ilama ledo ka'e insa aana yoo yitanno. Xa kayinni kune Selemooni rooru konne no» yiinsa.

BUSHU AYYAANI MANNU GIDDORA GALAGALE DAANNO GARA

⁴³ Yesuusi lede, «Bushu Ayyaani mannu giddonni fulanno woyite, Fooliishshi'rannowa hasi'ranni wayi nookkiwa moola gobbara raataawanno. Hasi're hoogiro kayinni,

⁴⁴ ‹Agure fuloommo minira galagale higeemmo› yaanno. Galagale higanno woyite, mine noori nookkiha fiine biifinseenna nooha afanno.

⁴⁵ Hakkunni gedensaanni bushu ayyaani ha're, isinni roore bushuulle wole lamala durriisa adhe daanno. Insano manchu giddora e'e ledosi heedhanno. Hakko manchira heeshsho albinni roore bushshannosi. Tenne busha ilamarano togoo coyi iillanno» yii.

YESUUSI AMANNA RODUUWASI

⁴⁶ Yesuusi mannaho coyi'ranni hee'reenna, Amasinna Roduuwisi hasaawissasira hasidhe dagge gobbaanni uurritu.

⁴⁷ [Hakko noo manni giddonni mittichu Yesuusa, «Kuneeti Amakkinna roduuwikki hasaawissahera hasidhe dagge gobbaanni uurrite no» yiisi.]

⁴⁸ Isi qole, «Ama'ya ayiti? Roduuwi'ya ayeooti?» yiinsa.

⁴⁹ Hakkunni gedensaanni rosaanosi widira malaatisanni, «Ama'yanna roduuwi'ya kuriuuti!

⁵⁰ Gordoho hee'rannohu Anni'ya hedinore wonshannohu baalu anere labbaa rodoo'yaati, meyaa rodoo'yaatinna ama'yaati» yiinsa.