MAATEWOOSI 10 - Qullaawa Maxaafa

YESUUSI TONAA LAME ROSAANO DOORI

¹ Yesuusi tonaa lamenka rosaanosi isiwa woshshe, busha ayyaana fushshatenna addi addi dhibbanna dhiddo baala hursate roorre uyinsa.

² Tonaa lamunku dooranturi: Pheexiroosi yee su'ma fushshihu Simiooniiti, rodiisi Indiriyaasiiti, Zebidewoosi ooso Yaiqoobinna Yohaannisiiti,

³ Filiphoosiiti, Bertelemewoosiiti, Toomaasiiti, Qaraxaanchu Maatewoosiiti, Ilfiyoosi beetti Yaiqoobiiti, Taadewoosiiti,

⁴ Laalaataanchu Simiooniiti, Yesuusa sayise hirihu Asiqorootichu Yihudaati.

YESUUSI TONAA LAME ROSAANO DANCHA DUDUWO DUDUBBANNO GEDE SOYI

⁵ Yesuusi kore tonaa lamenka rosaano, «Daganniwa hadhinoonte; Samaarootu katamano e'inoonte.

⁶ Ge'reewu gede billaalle bainohuwa Israeelete manniwa hadhe.

⁷ Hadhine, ‹Gordu Gashshooti gamba yiino› yitine kulle.

⁸ Dhiwantinore hurse; reyitinore kayisse; taraawannoha gogu dhibba afidhinore keereense; durriisano fushshe. Calla adhitinoonnire calla uuyye.

⁹ Qoraho culka, birra, woy saante wodhitinoonte.

¹⁰ Doogo hajantinanni woyite ogoro woy lame uddano woy lame koatte woy siqqicho anga adhitinoonte; loosannohura hasiisannosire uyinannina.

¹¹ «Martinanni katamiranna qachira wosinchimma haa'ra'nera hagiidhanno mancho seekkitine buuxxe. Hakkiinni fultine hadhina geeshsha, isi mine keeshshe.

¹² Manni minira e'inanni woyite, ‹Keeru ledo'ne hee'ro› yiiyye.

¹³ Mini manni keere'ne adhiro keeri'ne iillonsa; keere'ne gibbannoha ikkiro kayinni keeri'ne ki'neranni higo.

¹⁴ Haa'ranno'nekkihu woy yitinoonnita macciishshannokkihu hee'riro, hakkonne mine woy katama agurtine fultinanni woyite lekka'ne buko ganga'ne.

¹⁵ Halaale kuleemmo'nena, yoote barra hakko katamira iillanno qarri, Soddoomunna Gomooru mannira iillino qarrinni rooranno» yee hajaje soyi.

MOOTICHU DAARA ALBAANNI QARRUNNA DARTU DAANNO

¹⁶ Yesuusi, «Kuneeti ani ge'reewu gede hiyyeeyyete giddora soyemmo'ne. Kunni daafira hamashshu gede busuloota, lembooli gede joogaadda ikke.

¹⁷ Mannu yoote sayise aanno'ne. Xaadu minnansa giddo lichetenni gantanno'ne. Kunnira manna qorophe.

¹⁸ Ane daafira yitineenna gashshaanonniwanna mootoollanniwa yoote massitanno'ne daafira, insanna dagate albaanni farcidhinannie.

¹⁹ Yoote shiqishshanno'ne yannara, coyidhinannire hakka woyite kullanni'nena, ‹Ma coyi'neemmo woy ma garinni coyi'neemmo?› yitine yaaddinoonte.

²⁰ Hatte yannara coyidhinanniri ki'ne ikkitinikkinni, giddo'ne hee're coyi'rannohu gordu Anni'nehu Qullaawa Ayyaanaati.

²¹ «Roduu rodoosi, annu beettosi reyote sayise aanno. Ooso iltinonsarira diina ikkitanno. Reyoteno sayisse uyitanno.

²² Ane daafira yitineenna mannu baalu giwanno'ne; goofimarchu geeshsha kaajje uurrannohu kayinni gatanno.

²³ Mittu katamira qarrissu'nero, wole katama xooqqe. Halaale kuleemmo'nena, Manchi Beetti galagale higa geeshsha Israeelete katamma baala dituqqinanni.

²⁴ «Rosaanchu rosiisaancho dirooranno. Soqqamaanchu biilosi dirooranno.

²⁵ Kunni daafira, rosaanchu rosiisaanchisi gedeeha, soqqamaanchuno biilisi gedeeha ikkiro ikkannosi. Minu anna, ‹Be"eeli Zebuuli› yituro, ayiddesi hiitto hakkiinni roore yaa hoogganno!» yii.

WAAJJA HASIISSANNOHU AYETI

²⁶ Yesuusi qole, «Kunni ka'a insa waajjitinoonte. Maanxoonnihu leellikkinni digatanno. Go'linohuno xawo fulikkinni dihee'ranno.

²⁷ Kunnira, ani tunsote kuleemmo'nere, ki'ne barra xawoho coyidhe. Maccate hashaanshoonni'nere minu iima uurritine lallabbe.

²⁸ Maala agurranna lubbo shaa dandiitannokkire waajjitinoonte. Hatteentenni, lubbonna maala gaannaamete giira giddo huna dandaanno Magano waajje.

²⁹ Lame gurrae onte saantenni dihirranni? Gordu Anni'ne afikkinni kayinni mitticho gurraicho nafa uulla diubbanno.

³⁰ Umi'ne dananchi baalu nafa kiirreenna no.

³¹ Batinye gurrae ki'ne roortinannina waajjitinoonte» yiinsa.

KIRISTOOSIRE FARCI'RA HASIISSANNO

³² Yesuusi lede, «Mannu albaanni farci'rannoe baalira anino gordoho hee'rannohu Anni'ya albaanni farci'reemmosi.

³³ Mannu albaanni, ‹Diegennoommohe› yaannoeha baala anino gordoho hee'rannohu Anni'ya albaanni, ‹Diegennoommohe› yeemmosi» yii.

OLA IKKINNINA KEERE DIABBINO

³⁴ Yesuusi lede, «Ani baattote aanira keere abbammora dayommoha lawoonke'ne. Ani ola ikkinnina keere abbammora didayommo.

³⁵ Ani labbaa beetto annu aana, meyaa beetto amate aana, beettu beetto ballote aana kayisammora dayommo.

³⁶ Kunnira, mannaho umisi mini manni diina ikkanno.

³⁷ Anenni roorse annasinna amasi baxannohu aneha ikka didandaanno. Anenni roorse labbaa beettosi woy meyaa beettosi baxannohu aneha ikka didandaanno.

³⁸ Umisi masiqala duqqe hoode'ya daannokkihu aneha ikka didandaanno.

³⁹ Lubbosi gatisi'ra hasi'rannohu baalu hu'nanno; ane daafira yee lubbosi hunannohu baalu kayinni gatisi'ranno.

DAAFURU GUMA

⁴⁰ «Ki'ne haa'rannohu ane haa'ranno. Ane haa'rannohuno, ane calla ikkummokkinni ane soyinoehano haa'ranno.

⁴¹ Himanaancho, himanaanchu su'minni haa'rannohu himanaanchu ba'raa'ra adhanno. Keeraancho keeraanchu su'minni haa'rannohu keeraanchu ba'raa'ra adhanno.

⁴² Halaale kuleemmo'nena, ane rosaancho ikkino daafira kuri shiimmaaddu giddonni mittoho qiidado waa finiinchoho wore aannohura daafurisi diba"anno» yii.