MAARQOOSI 7 - Qullaawa Maxaafa

ALBI MANNI SEERA

¹ Farisootunna Yerusaalametenni dagginori Muse Seeri rosiisaano Yesuusiwa shiqqe,

² rosaanosi giddonni mitu mitu lagaabbino anganni sagale ittanna affu. Hatto yaano hayishshidhukkinni ittino yaate.

³ Farisootunna Ayihudootu albi manni woga agadhite, anga hayishshidhukkinni sagale di"ittanno.

⁴ Dikkotenni higganno woyiteno hayishshidhukkinni di"ittanno. Qolteno finiincho, maaqqe, gambayichonna daallasa hayishshi'rate woga noonsa.

⁵ Kunnira, Farisootunna Seeru rosiisaano Yesuusa, «Rosaanokki albi manni woga diigge, sagale lagaabbino anganni mayira ittanno?» yite xa'mitu.

⁶ Isi qole, «Ki'ne lawisiisaano! Isayaasi, ‹Tini gosa afiinsanni ayirrissannoe; wodaninsa kayinni anewiinni xeerti'rinoho.

⁷ Mannu woga ane Seeri gede assite rosiissanni, kaphunni magansidhannoe› yine borreessinoonni garinni, ki'nere himanasi garaho.

⁸ Kunnira, ki'ne Maganu hajajo agurtine, mannu woga agadhitinanni» yii.

⁹ Ledeno, «Ki'ne woga'ne agadhitinara yitine Maganu hajajo diigate kaajjuulleho.

¹⁰ Muse, ‹Annakkinna amakki ayirrisi!› Qoleno ‹Annanna ama xonannohu horonta reyo!› yee hajajino.

¹¹ Ki'ne kayinni, mittu manchi annasinna amasi kaa'la agure, ‹Anewiinni afidhinanniri baalu Qurbaanete› (Maganoho uyinanni kakkalooti yaate) yiiro,

¹² hakku manchi annisiranna amasira mittoreno assara difajjitinanni.

¹³ Kunni garinni umi'ne seera kultinanni, Maganu qaale mullare assitinanni; konne lawannoha batinye coye assitinanni» yiinsa.

MANNA LAGEESSANNO COYE

¹⁴ Yesuusi xaano manna woshshe gamba asse, «Baalunku ani yeemmore macciishshitine wodanche!

¹⁵ Manna lageessannohu mannuwiinni fulanno coyeti ikkinnina, gobbayidinni giddora eannore di"ikkino.

¹⁶ Macca noosihu macciishsho!»

¹⁷ Yesuusi mannuwiinni baxxe minira eita, rosaanosi coyi'rino lawishshi tiro kulannonsa gede xa'mitu.

¹⁸ Isi qole, «Ki'neno xiinxallitine diaffinanni? Gobbayidinni giddora eannohu manna lageessannokkita diegentinoonni?

¹⁹ Godowu giddora e"e gobbara fulannota ikkinnina, wodanunniwa dimaranno» yee, sagale baala intannita ikkitinota xawise kulinsa.

²⁰ Xaano Yesuusi, «Manna lageessannohu, mannu wodani giddonni fulanno coyeti.

²¹ Hakkuno: Busha hedooti, baashaawate, mooraho, manna shaate,

²² foorrete, yortote, bunshete, xagarrote, amanyootiweellete, dhiibbete, hemete, boo'nate, yamalaimmate.

²³ Kuni bushu coyi baalu mannu wodani giddonni fule, manna lageessanno» yii.

MITTE MANCHO AMMA'NA

²⁴ Yesuusi hakkiinni kae, Xiroosinna Sidoona gobba ha'ri. Marino mine mannu afannosikki gede hasi'rino; ikkollana maaxama didandiino.

²⁵ Beettose bushu ayyaani amadino mancho hakkawoyintenni macciishshite dagge, Yesuusi lekkara ubbu.

²⁶ Tini mancho ilama dagate widite; dagginohuno, Giriiketenni Sirofiniqu gobbanniiti. Beettose giddonni busha ayyaana fushshannose gede Yesuusa huuccidhu.

²⁷ Yesuusi kayinni, «Oosote sagale haa'ne woshshu buttu'lira tuga gara di"ikkitino; balaxxe ooso duubbona!» yiise.

²⁸ Ise qolte, «Mooticha'ya, hattenne woyite halaaleho; ikkirono, ooso ittanna uwino giggilo buttu'lu xinqi're itannowe» yitu.

²⁹ Yesuusino, «Togo yee coyi'rakkinni bushu ayyaani beettokkiwiinni fulinona minikkira ha'ri!» yiise.

³⁰ Ise minisera martanno woyite, beettose giddonni bushu ayyaani fuleenna hurte daallasaho goxxe noota affu.

YESUUSI MACCIWEELONNA DANQICHA MANCHO HURSI

³¹ Yesuusi Xiroosi gobbanni agure ha'ri. Sidoonu widoonni hige, «Tonne Katamma» yinanniwa Galiilu Baari mulira dayi.

³² Hakko hee'reenna mitto macciweelonna danqicha mancho isiwa haadhe abbite, anga aanaho woranno gede huuccidhusi.

³³ Yesuusi hakkonne macciweelonna danqicha mancho mannuwiinni bade qacce fushshe, lamente maccasira qubbesi wore, anjicho tufe arrawosino amammadi.

³⁴ Gordo hige lae, lowo geeshsha foolihu gedensaanni mancho, «Efata!» yiisi. Hatto yaano, «Fa'nami!» yaate.

³⁵ Hakkawoyintenni maccasi fa'nitu; arrawisino tidhameenna xawise coyi'ri.

³⁶ Yesuusi, «Konne coye ayerano kultinoonte!» yee hajajinsa. Insa kayinni hajajinonsata agurte, roorsite dudubbu.

³⁷ Macciishshituri lowo geeshsha maala'lite, «Isi baala coye seekkino. Macciweelu maccatenni afanno gede, danqichuno coyi'ranno gede assanno» yitu.