MAARQOOSI 6 - Qullaawa Maxaafa

NAAZIRETETE KATAMI MANNI YESUUSA GIWI

¹ Yesuusi hakkiinni kae lophino katama ha'ri; rosaanosino hoodesi hadhu.

² Fooliishshote Barra, Xaandanni Mine rosiisanna lowo manni dhaggeeffatanni macciishshi. Insano dhiibbifatte, «Kuni manchi togoo coye maminni afi'ri? Tini uyinoonnisi hayyo hiittoote? Tenne maalale ma garinni loosanno?

³ Isi dihaqqa bocannoho? Maariyaami beetto di"ikkino? Qoleno, Yaiqoobi, Yooseefi, Yihudinna Simiooni rodoo di"ikkino? Seennu roduuwisi kawiicho dininke ledo no?» yite coyidhu.

⁴ Hakka woyite Yesuusi, «Himanaancho wole gobbara ayirrinsanni; baadosi, fiixisinna ayiddisi mereero kayinni dinaandannisi» yii.

⁵ Hakkiicho shiima dhiwamaano, anga aanaho wore hursa agurranna, wole maalale diassino.

⁶ Amma'na hoogansarano lowo geeshsha maala'li. Hakkunni gedensaanni, Yesuusi rosiisanni qacha baala doyi.

YESUUSI TONAALAME ROSAANO DANCHA DUDUWO DUDUBBANNO GEDE SOYI

⁷ Tonaalamenka rosaanosi woshshe battete ayyaana fushshitanno gede roorre eensa lame lame asse soyinsa.

⁸ Hadhanno woyite siqqo agurranna, sinqe, ogoro, womaashsha qoraho adhite hadhannokki gede hajajinsa.

⁹ Qoleno, «Lekka'nera koatte wodhe ikkinnina, lame uddano adhitine hadhinoonte!

¹⁰ Martinoonni darginni agurtine hadhina geeshsha e'inoonni mine keeshshe!

¹¹ Haa'ranna macciishsha gimbanni'newa baala agurtine fultinanni woyite, malaate ikkannonsa gede lekka'ne buko ganga'ne!» yiinsa.

¹² Insano fulte, mannu cubbosi aagintaawe higanno gede kultu.

¹³ Batinye durriisa fushshitu; lowo dhiwamaanono zayite buurte hursitu.

CUUAANCHU YOHAANNISI GORRAMA

¹⁴ Yesuusi duduwi wo'mankawa duduwamino daafira, Moote Heeroodisi macciishshi. Mitu mitu manni, «Yohaannisi reyotenni kaino; tini baala maalale loosantanni noohu kunniraati» yii.

¹⁵ Wolu manni, «Eeliyaasiiti» yii. Wolootu qolte, «Albi himanaano giddonni mittichoho» yitu.

¹⁶ Heeroodisi kayinni konne coye macciishshe, «Ani goowa mursiisummohu Yohaannisi reyotenni kaino» yii.

¹⁷ Heeroodisi, rodiisi Filiphoosi galte Heeroodiyaada adhino daafira, isi qole isenni kainohunni Yohaannisi usursiisino.

¹⁸ Hatto assinohu Yohaannisi Heeroodisi, «Rodiikki galte adha gara di"ikkitino» yiinosihuraati.

¹⁹ Heeroodiyaada kunni coyira Yohaannisi ko'mite, shiishiishshara hasidhino; ikkollana didandiitino.

²⁰ Dandaa hoogginohu, Heeroodisi Yohaannisi keeraanchonna qullaawa ikkinota afe waajje, ille aanaho wore agarannosihuraati. Heeroodisi Yohaannisi coyi'rannore macciishsha baxanno; ikkollana coyi'rannore macciishshanno woyite assannori ba"annosi.

²¹ Heeroodisi, ilamino barra ayirrisara gashshootu roorroota, olantote hajajaanonna ayirradda Galiilu gobba manna jila jile woshshi; hatti yanna Heeroodiyaadara injo ikkituse.

²² Hakka woyite Heeroodiyaada beetto mannu noowa e'e, sirbitanni Heeroodisinna wosinasi hagiirsiissu. Heeroodisi beetto woshshe, «Hasi'rittare baala xa'mie; eemmohena.

²³ Gashshooti'ya darate nafa bade eemmohena xa'mie!» yee xaari.

²⁴ Iseno amasewa marte, «Ma xa'miro?» yitu. Ama qolte, «Cuuaanchu Yohaannisi umo aannohe gede xa'mi'ri» yituse.

²⁵ Hakkawoyintenni rakke dagge moote, «Cuuaanchu Yohaannisi umo xaanni saffeho worte aattoera hasi'reemma» yitu.

²⁶ Moote lowo geeshsha ikke dadilli. Ikkirono xaarino xaaro daafiranna woshsheenna dayino wosini saalira yee, yitinore ho'la dibaxino.

²⁷ Hakkawoyintenni moote, agaraasinesi giddonni mitto gaaddicha woshshe, Yohaannisi umo mure abbanno gede hajaji. Gaaddichuno usuru minira mare, Yohaannisi goowa muri.

²⁸ Murino umo saffeho wore abbe, beettote uyi. Beettono amate uyitu.

²⁹ Yohaannisi rosaano konne coye macciishshite marte, reeshsha haadhe madaartu.

YESUUSI ONTE KUME MANNA ITISE DUUSHSHI

³⁰ Yesuusi soqqamaasine soyinowiinni galagalte dagge, assitinorenna rosiissinore baala kultusi.

³¹ Isino, «Ane ledo ka'a shiqqi yitine, shiima geeshsha fooliishshidhe» yiinsa. Hatto yiinohu, lowo manni daanninna ha'ranni qarriseenna sagale ittanno gara hoogginohuraati.

³² Kunnira, yowolote ofolte mannu nookkiwa higge hadhu.

³³ Ikkollana lowo manni insa afe katamu baalunni fule, lekkatenni balaxe sae agari.

³⁴ Yesuusi yowolote aaninni dirri woyite, lowo manni allaalaanchu nookki ge'reewi gede ikkinota lae marare, lowo coye rosiisinsa.

³⁵ Yanna hashshituta rosaano Yesuusiwa shiqqi yite, «Xa yanna hawarritino; gobbano halallaati.

³⁶ Muli qachanna ollaa ha're, itannore hidhona manna keerunni yite ha'risinsa» yitu.

³⁷ Isi kayinni, «Ittannore ki'ne uuyyensa!» yiinsa. Insa qolte, «Hatto ikkina, lamu xibbi birrinni timma hirre uyinammoraatiyyani?» yitu.

³⁸ Yesuusi, «Meu timi noo'ne? Martine la'e!» yiinsa. La'e ka'e, «Onte timaatinna lame qulxu'meeti» yitu.

³⁹ Yesuusi manna gaamo gaamo assite shaqqado hayisso aana ofoshshiishshanno gede rosaanosi hajaji.

⁴⁰ Kunnira, mannu xibbe xibbenna ontaa ontaa gaammeenna ofolli.

⁴¹ Yesuusi onte timanna lame qulxu'me haa're, gordo hige lae Magano galati. Timma hiiqqaqqe, mannaho iillishshanno gede rosaanosira uyi. Lamenta qulxu'meno baalunkura beehi.

⁴² Baalunku itte duubbu.

⁴³ Rosaanosi itteenna gatinoha timmatenna qulxu'mete giggilo tonaa lame soro wonshite kayissu.

⁴⁴ Hattenne sagale ittinori labballu onte kume mannaati.

YESUUSI BAARU AANAANNI HA'RI

⁴⁵ Hakkawoyintenni Yesuusi manna ha'risa geeshsha, rosaanosi yowolote ofolte balaxxe widira Beetesayida fultanno gede hajajinsa.

⁴⁶ Manna ha'risihu gedensaanni Magano huucci'rara ilaalu iimira fuli.

⁴⁷ Hashshi yannara yowolo baaru mereero no. Yesuusi kayinni callisi moola baatto aana no.

⁴⁸ Rosaanosi albansaanni bubbissanni noo bubbenni kainohunni yowolo laaqi'ra hoogge noota Yesuusi afi. Soodimaroho Yesuusi baaru aanaanni ha'ranni rosaanosiwa dayi. Sae ha'rara hasi're no.

⁴⁹ Insa baaru aana ha'ranna affe, ekera laweennansa raartu.

⁵⁰ Baalunku iso affe, lowo geeshsha jajjartu. Isi hakkawoyintenni, «Galfatte! Aneetina waajjitinoonte» yiinsa.

⁵¹ Yowolote giddora e"e insa ledo ofollita, bubbe gabbi yitu. Rosaanosi kayinni lowo geeshsha dhaggeeffattu.

⁵² Konne coye dhaggeeffattinohu, timmatenni loosino dhagge wodancha hoogginohuraati. Wodaninsa dillaawe no.

YESUUSI GENSAREEXI YINANNIWA DHIWANTINORE HURSI

⁵³ Yesuusinna rosaanosi baara fulte Gensareexi yinanni gobba iillite, yowolono hakkiicho usurtu.

⁵⁴ Yowolote aaninni dirritanni heedheennanni, mannu Yesuusa bade afi.

⁵⁵ Hatte yannara qachu baalunni dodante, dhiwamaano rerete dukke Yesuusi no yiniwa baala massitu.

⁵⁶ Isi ha'riwa baala qachuwate, katammate, gattate, dikkoteno dhiwamaasine massite goxissanni, uddanosi handaarano ikkiro kissara huuccidhinosi. Iso kissuri baalu hurtino.