MAARQOOSI 5 - Qullaawa Maxaafa

YESUUSI DURRIISU AMADINO MANCHO HURSI

¹ Galiilu Baara tayisse fulte Gergesenooni yinanniwa daggu.

² Yesuusi yowolote giddonni fulita, durriisu amadino manchi mooggate giddonni fule, Yesuusinni xaadi.

³ Kuni manchi alba mooggate giddo hee'rannoho. Konne mancho hatte yannara ayino amade cagaagetenni usura didandiino.

⁴ Lowo yanna cagaagetenninna quwetenni usurranna, cagaagenna quwe tattayise tuganno. Kunnira amade heeshshi assa dandiinohu dino.

⁵ Hashshanna barra mooggate giddonna ilaallate aana raaranno. Biso kinnatenni huduuxxanni madiissi'ranno.

⁶ Yesuusa xeertote hee're afe, dodanni mare albasiinni kumbuuli.

⁷ Lowo geeshsha raaranni, «Ati Wo'munkura Aliidi Magani Beetto Yesuusa, atera ane ledo mayi noohe? Shetisattoekki gede Maganu su'minni eegameemmohe» yii.

⁸ Hatto yiinohuno Yesuusi balaxe, «Koo busha ayyaana, kunni manchi giddonni fuli!» yee hajajinosihuraati.

⁹ Yesuusi, «Su'mikki ayiti?» yee xa'misi. Isino, «Batinye ikkinoommohura, su'mi'ya Legewooniiti» yee dawarisi.

¹⁰ Yesuusi gobbatenni fushshe hunannonsakki gede duu're huucci'ri.

¹¹ Hakkiicho gaaru hunda kiiro haammata manchaame hayisso ittanni no.

¹² Durriissa, «Marre manchaamete giddora e'neemmo gede fajjinke!» yite huuccidhu.

¹³ Yesuusino, «Maahoyyena martine e'e!» yeennansa durriissa manchu giddonni fulte manchaamete giddora e'u. Lame kume ikkitino manchaame baaru gaminni giddora higge bitintirtu.

¹⁴ Manchaame allaalte noori xooqqe marte, katamahonna katamu gobbaanni dudubbu. Mannuno tenne ikkito la"ara dayi.

¹⁵ Macciishshiturino Yesuusiwa dagge, durriisu amadino manchi hure uddanosi uddi're ofolle nooha affe waajjitu.

¹⁶ Balaxe afino manni durriisu ganino manchirenna manchaame ikkitinore kuli.

¹⁷ Hatte gobba manni, Yesuusa hakkiichinni agure ha'ranno gede huucci'ri.

¹⁸ Yesuusi yowolo eanni hee'reenna durriisu fulisi manchi, «Ballo ledokki ha'roni?» yee huucci'ri.

¹⁹ Yesuusi kayinni maahoyye diyiinosi. Ikkollana, «Hadhe ayiddikkira Mootichu assinoheha jawa coyenna mararinohe gara kulinsa» yiisi.

²⁰ Manchu, «Tonne Katammaati» yinanni gobba baalate Yesuusi assinosire duduwanni ha'ri. Konne coye macciishshihu baalu dhagge assi'ri.

IYAIROOSI BEETTONNA YESUUSI UDDANO KISSU MANCHO

²¹ Yesuusi galagale yowolotenni baara widoonni fuli yannara, lowo manni isiwa shiqqi yii. Isino baaru mule no.

²² Xaadu Mini roorrooti giddonni mittu Iyairoosi yinanni manchi hakkiira daye, Yesuusa afe lekkasira uwe,

²³ «Shiima qaaqqo'ya lowo geeshsha dhiwanteenna, reyote agarre hee'noonni. Ballo gatte lubbotenni heedhannoe gede marte angakki aanaho worise» yee huucci'ri.

²⁴ Yesuusino kae ledosi ha'ri. Ha'ranni hee'reenna, ledosi noohu lowo manni doogote aana cifisi.

²⁵ Hakko manni mereero tonaa lame diro wo'ma mundee lolakkanna heedhannoti mitte mancho no.

²⁶ Hatti mancho xagissannori baalunkuwa hadhanni, lowo geeshsha qarrantino. Woxese baalano guxxitino; ikkollana dhibbu lexxinoseta ikkinnina horonta woyyimma diafidhino.

²⁷ Yesuusi duduwo macciishshite, mannu mereeroonni higge dagge, badheenni uddanosi kissu.

²⁸ Hatto assitinohu, «Uddanosi kisummaro nafa hureemma» yite heddinohuraati.

²⁹ Lolakkanni nooti mundeeno hakkawoyintenni uurritu. Dhibbunni hurtinoti bisise aana leeltuse.

³⁰ Yesuusi hakkawoyintenni wolqa giddosinni fultinota afe, mannu widira caaqqi yee lae, «Uddano'ya kisihu ayeti?» yee xa'mi.

³¹ Rosaanosi, «Mannu cifanni nooheta affanni heedhe, ‹Ayi kisie› yaatto?» yitu.

³² Isi kayinni kisinosihu ayetiro afara hasi're wirri yee lai.

³³ Mancho kayinni aanase ikkinore affino daafira, waajjite huxidhanni albasiinni ubbe, ikkinore baala gudisse kultu.

³⁴ Yesuusi, «Beetto'ya, amma'nakki gatissinohena keerunni ha'ri! Dhibbikkinni hurte hee'ri!» yiise.

³⁵ Yesuusi togo yee coyi'ranni hee'reenna, Iyairoosi mininni dayino manni, «Qaaqqo reyitinona, xa rosiisaancho mayira daafursatto?» yiisi.

³⁶ Yesuusi kayinni insa yitinota mishe agure Iyairoosi, «Ammani ikkinnina, waajjitooti!» yiisi.

³⁷ Yesuusi Pheexiroosinna Yaiqoobi, Yaiqoobi rodoo Yohaannisi agurranna wolu manni ledosi ha'rannokki gede hooli.

³⁸ Iyairoosi minira iillitu yannara, Yesuusi mannu raaranna, didannanna kooce wi'lanna afi.

³⁹ Yesuusi minira e"e, «Tini raarenna didatto mayiraati? Qaaqqo goxxinota ikkinnina direyitino» yiinsa.

⁴⁰ Mannu kayinni iso maaeelse oso'lisi. Ikkollana Yesuusi manna baala mininni fushshe, qaaqqote annanna ama ledosi dayino manni ledo haa're qaaqqo noowa ei.

⁴¹ Qaaqqote anga amade, «Xaliita kuumi» yiise. Hatto yaa, «Tee beetto gotti yii yeemmohe!» yaate.

⁴² Qaaqqo 12 dirrite. Iseno hakkawoyintenni ka'e ha'rantu. Mannuno tenne ikkito lae, lowo geeshsha dhaggeeffati.

⁴³ Yesuusi kayinni konne coye mannaho kultannokki gede qorophisiise, «Ittannore uuyyese» yiinsa.