MAARQOOSI 15 - Qullaawa Maxaafa

YESUUSI PHILAAXOOSI ALBIRA YOOTE SHIQI

¹ Soodo guto Qeesootu Roorrooti geerru, Muse Seeri rosiisaanonna Aliidi Yoo Mini Gaamo baalu ledo xaadde amaalantu. Hakkunni gedensaanni, Yesuusa usurte massite Philaaxoosira sayisse uyitu.

² Philaaxoosi, «Ati Ayihudete Mooteetini?» yee xa'misi. Yesuusi qole, «Atinni yootto» yiisi.

³ Qeesootu Roorrooti kayinni Yesuusa bushiishshe lowo coye kultu.

⁴ Kunnira Philaaxoosi Yesuusa, «Togo batinye coye kulle bushiinshannahe sammi yaatto? Mittoreno diqolatto?» yee lede xa'misi.

⁵ Yesuusi kayinni mittoreno diqolino; sammi yaasira Philaaxoosi dhaggeeffati.

YESUUSIRA REYOTE YOO YITU

⁶ Philaaxoosira, Agure Sa"ate Ayyaani daanno kiiro mannu, «Tirinke!» yaannoha mitto usuranya tira rosoho.

⁷ Hatte yannara gashshoote qoxxisse, manna shite usurantinori haxawarrooti giddo, Barbaani yinanni manchi no.

⁸ Mannu Philaaxoosiwa mare, «Rosinke garinni manna tirinke!» yee xa'mi.

⁹ Philaaxoosi, «Ayihudete Moote tireemmo'neta baxxinannini?» yee xa'minsa.

¹⁰ Hatto yiinohu Qeesootu Roorrooti Yesuusa dhiibbetenni sayisse uyitinota afinohuraati.

¹¹ Qeesootu Roorrooti kayinni, Yesuusa agure, Barbaani tirannonsa gede, Philaaxoosi xa'mate manna kakkayissu.

¹² Philaaxoosi, «Konne, Ayihudete Mooteeti yitinanniha hiitto assoyya?» yee xa'minsa.

¹³ Insa qolte, «Suti!» yitanni cancitu.

¹⁴ Philaaxoosi, «Isi assino bunshe maati?» yiinsa. Insa kayinni, «Suti!» yite ledde cancitu.

¹⁵ Philaaxoosi manna hagiirsiisara yee, Barbaani tire, Yesuusa kayinni lichetenni gansiise, suntanni gede sayise uyi.

GAADDO YESUUSA QACIFATTUSI

¹⁶ Gaaddo Yesuusa haadhe gobba gashshe noo manchi hoowe massitusi; gattino gaaddono ledde woshshitu.

¹⁷ Duume xiillitte uddano uddisiisse, utu worraaqqa seekkite umoho wortusi.

¹⁸ «Ayihudete Moote, mootimma geedonnita ikkitohe!» yitanni keere haadhusi.

¹⁹ Siqqotenni umo gantanni, anja tuffanni, balalsitannisi heeshshi yite albasiinni kumbuultu.

²⁰ Qacifattusihu gedensaanni, duume xiillitte uddano mulqite, isi umisi uddano uddisiisse suttara haadhe hadhusi.

YESUUSI SUTAMA

²¹ Hadhanni heedheenna, Qereenu gobba mancho Alekisaanderinna Rafoosi anna Simiooni katamaho gobbayidinni daanna affe, Yesuusi masiqala duhanno gede qarrissusi.

²² Hakkunni gedensaanni, Yesuusa Golgoota yinanniwa haadhe massitusi. Golgoota yaa, Umu Qooncho yaate.

²³ Hakkiira iillitu yannara, kaarbete ledo karsinoonnita woyinete xajje uyitusi. Isi kayinni diadhino.

²⁴ Hakkunni gedensaanni iso suttu; iillannonsare afate hixa tuqqite uddannasi beeqqitu.

²⁵ Yesuusa suttu woyite, yanna soodinni sase saateeti.

²⁶ Mayira suntoonnisiro kultannoti, «Ayihudete Moote» yitanno borro masiqalu aana no.

²⁷ Manna mulqidhannore lame mannoota abbite, mitto qiniitesiinni, mitto gurasiinni suttu.

²⁸ Kunni garinni, «Garimalu manni ledo kiirami» yinoonni himani wo'mi.

²⁹ Mulesiinni hige doogo sa"anno manni malxifatanni, «Qullaawa Mine diigge sasu barrinni minattohu,

³⁰ hanni xa masiqalu aaninni dirrite umokki gatisi!» yee ajiiffatisi.

³¹ Kunni garinni Qeesootu Roorrootinna Muse Seeri rosiisaanono insa insanaawa, «Wole gatisinona, umosi kayinni gatisa didandaanno.

³² Buuraminohu Israeelete Moote, hanni xa masiqalu aaninni dirrossiyya; ninkeno la'ne ka'ne ammanneemmosina!» yite qacifattusi. Ledosi sutante noorino arrassitinosi.

YESUUSI REYO

³³ Barrunni lee saatenni kayise honse saate geeshsha baatto baala tunsitu.

³⁴ Honse saate ikkita Yesuusi, «Eloyi! Eloyi! Lama Sabaqitani?» yee lowo qaalinni coyi'ri. Hatto yaano, «Magano'ya, Magano'ya, mayira agurittoe?» yaate.

³⁵ Hakko uurrite noori giddonni mitu mitu macciishshite, «Kuneeti, Eeliyaasi woshshanni no» yitu.

³⁶ Insa giddonni mittichu dode mare, haanxicho shiishu giddo cuue, Yesuusi aganno gede siqqote umira wore ee, «Hanni agarre! Eeliyaasi daye masiqalu aaninni dirrisannasi la'neemmona» yii.

³⁷ Hakkunni gedensaanni Yesuusi lowo geeshsha raare kaeenna foolu fulisi.

³⁸ Qullaawu Mini dukko alinni woro geeshsha dadhante lamewa fultu.

³⁹ Yesuusa sunti masiqali albaanni uurre noohu mittichu xibbe olanto roorrichi, Yesuusi raare kae ikke reyi gara lae, «Kuni manchi halaalintanni Maganu Beettooti» yii.

⁴⁰ Hatte yannara shiimu meenti xeertote uurre la"anni no. Insa giddo Megidelitte Maariyaami, maa'niidihu Yaiqoobinna Yoosa ama Maariyaaminna Saloomeno ledo no.

⁴¹ Yesuusi Galiilaho hee'ri yannara, kuni meenti Yesuusi hoode ha'rino. Qoleno towatinosiho. Ledosi Yerusaalame dayinohu wolu lowo meentino hakko no.

YESUUSA WAAMMOONNI GARA

⁴² Ga'a gede Ayihudete Fooliishsho Barra ikkanna, techo gede qole, Qixxaawote barraati.

⁴³ Ayihudete Aliidi Yoo Gaamo miili, mittu ayirradu manchi Armaatichu Yooseefi kae dayi. Isino Maganu Gashshooti daa galaalchanni hee'ranno manchooti. Ruxxi yiikkinni Philaaxoosiwa mare, Yesuusi reeshsha aannosi gede huucci'ri.

⁴⁴ Philaaxoosi, Yesuusi rahe reyinota macciishshe maala'li. Xibbe olanto roorricha woshshe, reyinkunni keeshshinoro xa'mi.

⁴⁵ Xibbe olanto roorrichi Yesuusi reyinota kulisihu gedensaanni, Yooseefira, Yesuusi reeshsha adhe ha'ranno gede fajjisi.

⁴⁶ Yooseefi Yesuusi reeshsha masiqalu aaninni dirrise, dancha biiffino seemma hire kafane, kincho kurkurre seekkinoonni waamma giddo madaarisi. Madaarihu gedensaanni lowo kincho gongo'mishe, waammate afoo tui.

⁴⁷ Hatte yannara, Megidelitte Maariyaaminna Yoosa iltino Maariyaami Yesuusa madaarriwa la"anni no.