LUQAASI 7 - Qullaawa Maxaafa

YESUUSI OLANTOTE ROORRICHI SOQQAMAANCHO HURSI

¹ Yesuusi konne coye baala mannaho kule kaihu gedensaanni Qifirinahoomi ha'ri.

² Hakkiicho xibbe olanto roorrichi mittu Roomichu no; isira lowo geeshsha baxanno soqqamaanchi lowo geeshsha dhiwame reyara rahe no.

³ Xibbe olanto roorrichi Yesuusire macciishshi yannara Ayihudete geerra, «Eeggatena Yesuusi daye soqqamaancho'ya hursannoe gede xa'me"e» yee soqqi.

⁴ Insano Yesuusiwa marte, «Kunni manchira addinta ate kaa'lo hasiissannosi.

⁵ Isi mannanke baxanno; xaadu mineno mininonke» yite duudhe huuccitusi.

⁶ Kunnira Yesuusi insa ledo ha'ri. Minira iilla rahe hee'reenna xibbe olanto roorrichi jaallasi isiwa soye, «Mooticha'ya, ani mini'yara eatto gedeeha di"ikkoommo; kunnira ane minira daate qarrantooti.

⁷ Ani nafa atewa daate di"ikkoommoho. Kunnira ati hakko heedhe mitto qaale coyi'rittoro soqqamaanchi'ya huranno.

⁸ Ani umi'ya gashshaanote hajajameemmoho; anerano hajajeemmo olanto nooe. Insa giddonni mittu, ‹Ha'ri!› yuummoro ha'ranno; woleno, ‹Amo!› yuummoro daanno. Soqqamaancho'ya, ‹Konne assi!› yuummoro assanno» yii.

⁹ Yesuusi konne coye macciishshe dhaggeeffate, hoodesi ha'ranni noo manna caaqqi yee lae, «Halaale kuleemmo'nena, togoo amma'na afi'rinoha Israeelete giddo nafa afe diegennoommo» yiinsa.

¹⁰ Sonkoonniri galagalte xibbe olanto roorrichi minira higganno woyite soqqamaanchu hure nooha affu.

YESUUSI GUNNITTETE BEETTO REYOTENNI KAYISI

¹¹ Layinki soodo Yesuusi Nayini yinanni katama ha'ri. Rosaanosinna lowo manni ledosi ha'ranni no.

¹² Yesuusi katamu waalcho iilli yannara, mannu mittu beetti reeshsha duhe katamunni fulanni no. Kuni beetti amate afidhino mittooti. Iseno gunnittete. Katamunnihu lowo manni ledose no.

¹³ Mootichu mancho lae marare, «Wi'litooti!» yiise.

¹⁴ Hakkunni gedensaanni Yesuusi shiqqi yee rere kisi. Duhino mannino uurri. Yesuusino, «Koo wedellicha kai yeemmohe!» yii.

¹⁵ Reyinohu gotti yee kae ofolle hasaawi. Hakkunni gedensaanni Yesuusi amate kune beettikki yee uyise.

¹⁶ Baalunku waajjite, «Giddonke jawu himanaanchi kaino; Maganu mannasi towatara dayino» yitanni Magano galattu.

¹⁷ Yesuusi duduwi Yihudanna gobbate gaangaawa baala tuqi.

CUUAANCHU YOHAANNISIWIINNI YESUUSIWA SONKOONNI SOKKAANO

¹⁸ Yohaannisi rosaano, ikkino coye baala isira kultusi. Yohaannisino rosaanosi giddonni lame woshshe,

¹⁹ «Daanno yinannihu ateetinso wole agadhino?» yite Mooticha xa'mitanno gede soyi.

²⁰ Insa Yesuusiwa marte, «‹Daanno yinannihu ateetinso wole agadhino?› ‹yitine xa'me› yee Cuuaanchu Yohaannisi atewa soyinonke» yitusi.

²¹ Hattenne yannara Yesuusi addi addi dhibbinni amadamino manna hursi; bushu ayyaani amadinoreno hursi; lowo illiweelootano ille fani.

²² Yesuusi Yohaannisi sokkaanora, «Hadhine la'inoonnirenna macciishshitinoonnire baala Yohaannisira kullesi. Ballootu la'anno; naafootu uurrite hadhanno; dhiigaammu keeraabbanno; macciweelootu macciishshitanno; reyitinori ka'anno; buxanete Dancha Duduwo kullanni.

²³ Anere huluullamannokkihu maassaminoho» yee qolinsa.

²⁴ Yohaannisi sokkaano hadhuhu gedensaanni Yesuusi Yohaannisire, «Halalla ma la'inara fultini? Bubbe milli assitanno leemma la'inaraati?

²⁵ Ma la'inaralla fultini? Biifado uddano uddi'rino manna la'inaraati? Biiffino uddano uddidhannore mootete mine anfanni.

²⁶ Mayiralla daggini? Himanaancho la'inaraati? Ee, himanaancho lowo geeshsha roorinoha la'inaraati.

²⁷ Isi, ‹Kuneeti doogo biddi assannohe gede soqqamaancho'ya atera alba qole soyemmo› yine borreessinoonniho.

²⁸ «Halaale kuleemmo'nena, baattote aana ilamino manni giddo Cuuaancho Yohaannisi roorannohu dino. Ikkollana, Gordu Gashshootira wo'munkura woriidiha ikkinohu roorannosi» yee kulinsa.

²⁹ Konne macciishshihu baalunna qaraxaasine nafa gattukkinni Yohaannisi anga cuuamansanni, Maganu doogo halaale ikkitinota buuxxu.

³⁰ Farisootunna Seeru fullahooti kayinni Yohaannisi anga cuuama gibbe Maganu hedo facci assite agurtu.

³¹ Yesuusi lede, «Xa tenne yanna manna mayinni lawiseemmo? Kuni manni ma lawanno?

³² Insa, gudumaaleho ofolte mimmito woshshitanni, « ‹Suusulle ufuunfummo'ne, kayinni disirbitinoonni; hamaraancho kiirrummo'ne, kayinni diwi'litinoonni› yitanni godo'litanno ooso labbanno.

³³ «Qoltineno Cuuaanchu Yohaannisi itikkinninna woyinete xajjeno agikkinni dayita, ‹Kunnira durriisu no!› yitinoonni.

³⁴ Manchi Beetti itanninna aganni dayita, ‹Kuni itonna ago baxannoho! Qaraxaasinetenna cubbaataammu jaalaati› yitinoonni.

³⁵ Afate halaalaanchimma oososenni buuxantanno» yiinsa.

MITTE MANCHO YESUUSI LEKKARA SHITTO DUNTU

³⁶ Farisootu giddonni mittu manchi Yesuusa sagalete koyisisi. Yesuusino Farisichu minira mare sagalete ofolli.

³⁷ Hakko katamira mitte cubbaataame mancho no. Ise Yesuusi Farisichu minira jilaho woshshaminota macciishshite, shitto wo'mitinota albasxiroosi yinanni kinchinni seekkinoonni gujuujjera haadhe daggu.

³⁸ Yesuusira badheenni lekkasi mule uurrite wi'litanni lekkasi hindiiddotenni shanshite, umise dananchinni fiite lekkasi sunqitanni aanaho shitto duntu.

³⁹ Yesuusa jilaho woshshi Farisichi konne coye lae, «Kuni manchi himanaancho ikkoommero, tini amammaddannositi ayetironna hiittoo cubbaataameetiro afannohu baino» yee wodanisinni hedi.

⁴⁰ Yesuusi, «Simiooni, mittu kuleemmohe coyi no» yiisi. Isino, «Rosiisaancho'ya maahoyye kuliexa» yii.

⁴¹ Yesuusino, «Mittu manchiwiinni woxe liqiidhinori lamu manni no. Mittu 500 kinchu birra, layinkihu 50 kinchu birra liqii'ri.

⁴² Lamunku liqiidhinoha qola hooggeenna liqiissinsa manchi asalensa agurinsa. Lamunku giddo liqiissinsa mancho roorse baxannohu hiikkonneeti?» yee xa'mi.

⁴³ Simiooni qole, «Roorse baxannohu lowo woxe agurrisi mancho lawannoe» yii. Yesuusino, «Yaatto gedeeti» yii.

⁴⁴ Hakkunni gedensaanni Yesuusi manchonniwa hige Simioonira, «Tenne mancho la"atto? Ani ate minira dayummonkunni lekka'yara waa nafa dioottoe. Ise kayinni lekka'ya hindiiddosenni hayishshite, umise dananchinni mooshshitino.

⁴⁵ Ati disunqoottoe; ise kayinni minikkira eummonkunni xaa geeshsha lekka'ya sunqa diagurtino.

⁴⁶ Ati umi'yara buuro dibuuroottoe; ise kayinni lekka'yara shitto duntino.

⁴⁷ Kunnira lowo baxille leellishinohura lowoha cubbose agurroonni. Shiima cubbo agurrannisihu kayinni shiima geeshshalla baxanno» yiisi.

⁴⁸ Hakkunni gedensaanni Yesuusi manchote, «Cubbokki agurroonnihe» yiise.

⁴⁹ Isi ledo sagale ittanni noori, «Cubbo nafa agurannohu kuni isi ayeti?» yitanni wodaninsanni heddu.

⁵⁰ Yesuusi kayinni manchote, «Ammanakki gatissinohena keerunni ha'ri» yiise.