LUQAASI 5 - Qullaawa Maxaafa

YESUUSI UMI ROSAANO DOORI

¹ Mitto barra Yesuusi Gensareexi Baari gama uurre hee'reenna, lowo manni Maganu qaale macciishshara isiwa daye mimmito cife no.

² Isino baaru gama noota lame yowolo afi. Qulxu'me amaddannori yowollansanni dirrite woshshaaddansa hayishshidhanni no.

³ Yesuusi Simiooni yowolo afe giddora e"e Simiooni, «Hanni yowolo baaru giddora shiqqi assie» yiisi. Hakkunni gedensaanni yowolote aana ofolle manna rosiisa hanafi.

⁴ Rosiise kaihu gedensaanni Simiooni, «Jaallakki ledo yowolo giddora shiqqi assitine qulxu'me amadate woshshaado'ne baaru giddora tugge» yiinsa.

⁵ Simiooni, «Rosiisaancho, hashsha wo'ma daafurre mitto qulxu'michono diamandoommo; ati yiittoro kayinni woshshaado tugeemmo» yii.

⁶ Isi yiino garinni woshshaadonsa tugguta, lowo qulxu'me amaddeenna woshshaado ta'ara rakku.

⁷ Kunnira wole yowolo aana noota jaallansa dagge kaa'litannonsa gede qiphi assidhu. Insano dagge, qulxu'me wonshiteenna lamenti yowolo itamate rakku.

⁸ Simiooni Pheexiroosi tenne ikkito lae Yesuusi albaanni guluphe, «Mooticha, ani cubbaataamohona anewiinni ho'li» yiisi.

⁹ Togo yiinohu, isinna ledosi noori baalu amaddino qulxu'mi lowo geeshsha bati'reenna dhaggeeffattino daafiraati.

¹⁰ Simiooni jaalla, Zebidewoosi ooso Yaiqoobinna Yohaannisino dhagge assidhu. Yesuusi Simiooni, «Waajjitooti; kunni ka'a manna woshshaadattoha ikkatto» yiisi.

¹¹ Insa yowolonsa baaru qacce fushshituhu gedensaanni, wo'manka coye agurte Yesuusi hoode hadhu.

YESUUSI TARAAWANNOHU GOGU DHIBBI AMADINO MANCHO HURSI

¹² Mitto barra Yesuusi mittu katami giddo hee'reenna, taraawannohu gogu dhibbi amadinohu mittu manchi Yesuusiwa daye albasiinni gombisame, «Mooticha'ya, baxittoero hursattoera dandaatto» yee huucci'ri.

¹³ Yesuusino angasinni amammade, «Baxoommohena huri!» yiisi. Manchuno hakkawoyintenni taraawannohu gogu dhibbinni huri.

¹⁴ Yesuusi qole, «Konne coye hattono ikkite mannaho kultooti; huroottota kayinni marte qeesichaho leellishi'ri. Huroottota anfanni gede, Muse hajajinota keeraa'mate kakkalo Maganoho shiqishi» yee hajajisi.

¹⁵ Yesuusi duduwi kayinni albinni roore gobba baala tuqi. Lowo mannino Yesuusi yaannore macciishshatenna dhibbunni hurate isiwa dayi.

¹⁶ Isi kayinni yanna yannantenni mannu nookkiwa mare huuccatto assi'ranno.

YESUUSI LAANSHAAWA MANCHO HURSI

¹⁷ Mitto barra Yesuusi rosiisanni hee'reenna, Farisootunna Muse Seeri rosiisaano mulesi ofolte no. Insa Galiilunna Yihudu qachi baalunninna Yerusaalametenni dagginoreeti. Yesuusi dhiwantinore hursannoti Mootichu wolqa ledosi no.

¹⁸ Shiimu manni, mitto laanshaawa mancho reretenni duhe Yesuusiwa dayi. Yesuusi noo minira eessite albasiinni wortara hasidhu.

¹⁹ Ikkollana, mannu bati'rino daafira minira e'anno gara hooggu. Kunnira, minu iimira haadhe fushshite Yesuusi noo taalo la'e minu qalcho murte, mancho rerentenni dirrisse albasiinni wortu.

²⁰ Yesuusi amma'nansa afe laanshaawa mancho, «Koo mancho, cubbikki aguraminohe» yiisi.

²¹ Seeru rosiisaanonna Farisootu, «Kuni Magano xonannohu isi ayiti? Magano agurranna mannu cubbo agura dandaannohu wolu nooni?» yite heddu.

²² Yesuusi hedonsa afe, «Wodani'nenni konne coye mayira heddinanni?

²³ Anfina, ‹Cubbikki aguraminohe› yaatenna, ‹Ka'e rerekki duqqite hari!› yaate woyite shonte hiitti roortanno?

²⁴ Ikkollana Manchi Beettira uullate aana cubbo agursiisate roorre noosita affinaraati» yee, laanshaawa mancho, «Ka'e rerekki duqqite minikkira ha'ri yoommohe» yii.

²⁵ Laanshaawu manchino hakkawoyintenni kae, reresi duqqe Magano galaxxanni minisira ha'ri.

²⁶ Hakkiicho noo manni baalu lowo geeshsha dhaggeeffate, waajjillunni, «Techo dhagge la'nummo» yaanni Magano galati.

YESUUSI MAATEWOOSI WOSHSHI

²⁷ Hakkunni gedensaanni Yesuusi hakkiinni kae ha'ranni hee're Leewi yinanni qaraxaasincho qaranxanni daasira ofolle nooha afe, «Hoode'ya amo» yiisi.

²⁸ Leewino hakkawoyintenni baalankare agure hoodesi ha'ri.

²⁹ Hakkunni gedensaanni Leewi Yesuusira minesi lowo jila jili. Jilunniwa lowo qaraxaasinenna wolu lowo manni gamba yii.

³⁰ Farisootunna insa widiri Seeru rosiisaano, Yesuusi rosaanora, «Qaraxaasinetenna cubbaataammu ledo ittinannihunna agginannihu mayiraati?» yite gunguntu.

³¹ Yesuusi qole, «Dhiwantinorira ikkinnina fayyaaleeyyete xagisannohu dihasiisannonsa.

³² Ani cubbaataammu aagintaabbe higganno gede woshshammora ikkinnina, keeraano woshshate didayommo» yiinsa.

QATUME HUUCCI'RATE DAAFIRA XA'MINOONNI XA'MO

³³ Mitu mitu Yesuusa, «Yohaannisinna Farisootu rosaano batinye higge qatunte huuccidhanno; ate rosaano kayinni wo'manka woyite ittannohunna aggannohu mayiraati» yite xa'mitusi.

³⁴ Yesuusino, «Seenne adhannohu ledonsa hee'reenna albisootu qatuma hasiissannonsani?

³⁵ Ikkollana seenne adhannoha insawiinni haa'ne hoollanni yanna dagganno. Hatte yannara qatuntanno» yee dawarinsa.

³⁶ Qoleno Yesuusi masalsanni, «Akkala uddanora haaro qaafficho digannanni. Hatto assiniro, haaru dadhamanno. Haaru qaaffichi akkalu ledo dixaadanno.

³⁷ Hattono akkalu ogorira haaro woyinete xajje worannohu dino; worriha ikkiro kayinni, ogoro dhoossanno; woyinete xajjeno du'nantanno; ogoruno kaa'lannori nookkiha ikkanno.

³⁸ Kunnira, haaro woyinete xajje haaru ogorira worranni.

³⁹ Fultinota woyinete xajje aginohu, haaro aga dihasi'ranno. ‹Keeshshitino woyinete xajje woyyitanno› yaanno» yiinsa.