LUQAASI 21 - Qullaawa Maxaafa

GUNNITTE MANCHO UYITINO FUSHSHAATE

¹ Yesuusi caaqqi yaanno woyite, gamba assinanni ogori giddo dureeyye fushshaate wortanna afi.

² Mitticho buxicho gunnitteno dagge lame saante wortanna lai.

³ Kunnira, «Halaale kuleemmo'nena, tini buxicho gunnitte wo'munkunni roore uyitino.

⁴ Dureeyye wo'me gatinonsahu aaninni uyitino. Ise kayinni buxicho ikkite heedhenni, mittoreno gatisidhukkinni afidhinore baala gudisse uyitino» yii.

YESUUSI QULLAAWU MINI DIIGAMARE COYI'RI

⁵ Mitu mitu, «Kuni Qullaawu Mini hiitto biifino? Dilqa kinnanninna Maganoho shiqinshoonni afanshinni biifinsoonniho» yitanni hasaabbu.

⁶ Yesuusi qole, «Kuni la'inannihu, kinchu kinchu aana duunamino gedeenni hee'rannokki yanna dagganno. Tini kinna baala mitto barra diigantanno» yiinsa.

MOOTICHU DAARA ALBAANNI DAANNO QARRA

⁷ Insano, «Rosiisaancho! Kuni ikkannohu mamarooti? Kuni ikkara albaanni leellanno malaati maati» yite xa'mitusi.

⁸ Yesuusi daware, «Sodhinannikki gede qorophe! Lowo manni, ‹Ani Kiristoosaati! Kuneeti yanna iillitino› yee ane su'ma gananni daanno. Hakko manni hoode hadhinoonte.

⁹ Olu duduwonna luulo macciishshitinanni yannara massinoonte. Kuni gatannokki coyeti; ikkollana goofimarchu albillittete» yiinsa.

¹⁰ Yesuusi lede, «Gosa gosate aana, gashshootu gashshootu aana ola kayisanno.

¹¹ Addi addi darga baatto huxidhanno; wo'mankawa hudenna dhibbu daanno. Gordu iima, anfe egenninoonnikkirinna waajjishshannoti jajjabba malaatta leeltanno.

¹² Kuni baalu ikkara albaanni kayinni amaddanno'ne; gadadissanno'ne; xaadu miniranna usuru minira sayisse uyitanno'ne. Ane daafira yitineenna gashshaanotenna mootoollate albira massitanno'ne.

¹³ Kuni coyi, anere farci'rate injo ikkanno'ne.

¹⁴ Kunnira, bushiinshanni'ne woyite qoltinanni dawarora qarrantinannikkita balaxxine wodana asse.

¹⁵ Ani, baarigaarra'ne garta'nera dandiitannokki hayyonna egenno eemmo'nena.

¹⁶ Iltino'neri, roduuwi'ne, fiixi'nenna jaalla'ne ki'ne giddonni gama shitanno.

¹⁷ Ane daafira yitineenna, mannu baalu giwanno'ne.

¹⁸ Ikkollana umi'ne dananchi aaninni nafa mittu diba"anno.

¹⁹ Cincitiniro, lubbo'ne gatisidhinanni» yiinsa.

YESUUSI YERUSAALAME BA'ANNOTA BALAXE COYI'RI

²⁰ Yesuusi lede, «Yerusaalame diinu gaaddo doyissite amadde noota affinanni woyite, ba"ate mule noota huwatte.

²¹ Hatte yannara, Yihudaho noori ilaallate widira higge xooqqo; katamu giddo noori agurte fulto. Katamu gobbaanni noori galagalte e'oonke.

²² Borreessine worroonni himani wo'manno gede, hatti qorichu yannaati.

²³ Hatte yannara, godowinni nooriranna qansi'ranni noorira aanne'e! Baattote aana lowo qarri uwanno; Maganu hanqino hakko manni aana dirranno.

²⁴ Insa giddonni lowo manna bagadu shaanno; woloota qafande addi addi gobba haa'ne ha'nanni. Dagate yanna sa'a geeshsha Yerusaalame daga kadde gashshitanno» yii.

MANCHI BEETTITA LAYINKIMEESHSHI DAA

²⁵ Yesuusi lede, «Arrishshote, aganunna beeddahete aana maala'linanni malaati leellanno; baattote aana noo manni baalu, baarunna dambalu luulinni kainohunni waajje gara hawanno.

²⁶ Gordu kalaqami shafamanno daafira, ‹Baattote aana mayi daaraati ikka› yee noo manni waajje daaqanno.

²⁷ Hakkunni gedensaanni Manchi Beetti, lowo wolqanninna ayirrinyunni gomichu giddo daanna mannu la"annosi.

²⁸ Kuni coyi baalu ikka hanafanno woyite, gato'ne barri iillinona iima higgine la'e» yiinsa.

BALASETE HAQQICHO YANNATE GOOFIMARCHIRA MALAATE IKKITINO GARA

²⁹ Yesuusi lede, «Balasete haqqichonna wole haqqe ikkitino gara wodanchitine la'e.

³⁰ Darose ciirtanni noota la'inanni woyite, badheessu rahinota affinanni.

³¹ Hakko garinni, kuni coyi baalu ikkanna la'inanni yannara, Maganu gashshooti rahe noota affe.

³² Halaale kuleemmo'nena, kuni baalu ikka geeshsha, tini ilama disa'anno.

³³ Gordunna baatto sa'anno; qaali'ya kayinni disa"anno» yee lawishsha kulinsa.

QIXXAAWE AGADHA HASIISSANNO

³⁴ Yesuusi lede, «Itunna agu batinyinni, dimbatenninna tenne gobba heeshshora yaaddinanna wodanu daafuranno'nekki gede qorophe! Hakkuyi ka'a kayinni, hakku barri hedeweelcho woshshaadote gede ikke amadanno'ne.

³⁵ Hakku barri, baattote aana noo manna baala hedeweelcho woshshaade amadanno.

³⁶ Kunnira, daannohu bushu coyi baaluwiinni gatate wolqa afidhinanni gedenna Manchi Beetti albaanni uurra dandiitinanni gede wo'manka woyite jaattine huuccidhe» yii.

³⁷ Yesuusi barru baala Qullaawa Mine rosiisanni no. Hashshanno woyite kayinni, fule Ejedhete Ilaali aana galanno.

³⁸ Mannu baalu soodo gute fule, Yesuusi rosiisannore macciishshate Isiwa Qullaawu Minira ha'ranno.