LUQAASI 19 - Qullaawa Maxaafa

YESUUSINNA ZAKKIWOOSI

¹ Yesuusi Iyyaarko Katama e"e giddoonni hige sae ha'ri.

² Hakkiicho mittu qaraxaasinete roorrichi Zakkiwoosi yinannihu dureessu manchi no.

³ Isi Yesuusi ayetiro la"ara hasi're no. Ikkollana hojja harancho ikkinohuranna mannu bati'rino daafira la"a didandiino.

⁴ Yesuusi hakkaanni hige sa"anni noo daafira, Zakkiwoosi iso la"ara alba hige dode mare mitte odakko giddi.

⁵ Yesuusi hakkiichira iilliti, iima hige lae, Zakkiwoosi, «Zakkiwoosi, techo ate mine hosa hasiissannoena rakke haqqichote aaninni dirri» yiisi.

⁶ Zakkiwoosi rahe dirre, Yesuusa hagiirrunni minisira haa're ha'ri.

⁷ Konne coye lai manni baalu, «Kuni manchi cubbaataammu mine itara eino» yaanni Yesuusira gungumi.

⁸ Zakkiwoosi kayinni kae uurre Mootichaho, «Mooticha'ya, afi'roommo jiro baalatenni taaloote buxanete eemmo. Mannuwiinni hanaaqe adhoommo woxi hee'rirono, shoole anga asse qoleemmo» yii.

⁹ Yesuusino, «Kuni manchino Abirihaami sircho ikkinohura, techo gato kunni minira daggino.

¹⁰ Manchi Beetti bainoha hasaranna gatisara dayino» yiisi.

TONNE SOQQAMAANO LAWISHSHA

¹¹ Mannu konne coye macciishshanni hee'reenna, Yesuusi lede tenne masalo kulinsa. Isi Yerusaalame iilla rahe noo daafira, mannaho Maganu Gashshooti hakkawoyintenni leellannoha lawinonsa.

¹² Kunnira Yesuusi, «Mittu ayirradu manchi gashshootu roorre adhe higara xeerto gobba ha'rino.

¹³ Isi ha'rara albaanni soqqamaanosi giddonni tonne woshshe, mittu mittunkura tonne minaane eensa, ‹Galagale daammo geeshsha kunni woxinni daddalle› yiinsa.

¹⁴ Gobbasi manni kayinni giwannosi daafira, ‹Kunni manchi ninkera moote ikkara dihasi'neemmo› yite, isi ha'rihu gedensaanni manna sokku.

¹⁵ «Hakku manchi moote ikke galagale higi yannara, uyinonsa woxinni daddalte mageeshsha leddinoro afara hatte soqqamaano isiwa dagganno gede hajaji.

¹⁶ Umo asse uyi soqqamaanchi shiqe, ‹Mooticha'ya, ati mitte minaane oottoe; kuneeti tonne minaane lexxitino› yiisi.

¹⁷ Mootichisi, ‹Ati danchu soqqamaanchi, dancha coye assootto. Shiimurira ammanamootto daafira, ani qole tonnu katami gashshaancho assoommohe› yiisi.

¹⁸ Layinki soqqamaanchino shiqe, ‹Mooticha'ya, oottoe minaane kuneeti onte leddino› yii.

¹⁹ Mootichisi, ‹Ateno ontu katamira gashshaancho assoommohe› yiisi.

²⁰ «Wolu soqqamaanchino shiqe, ‹Mooticha'ya, oottoe minaane kuneeti, hoccunni xaaxe maaxeenna no.

²¹ Hatto assoommohu, ati wodhoottokkiha adhattoha, wixi'roottokkiha mixxattoha kaajjado mancho ikkootto daafira waajjeeti› yii.

²² Mootichisi qole, ‹Ati bushu soqqamaanchi, ati coyi'rootto coyinni yoo yeemmohe. Ani wodhoommokkiha adheemmoha, wixi'roommokkiha mixxeemmoha kaajjado mancho ikkoommota afittona,

²³ woxe'ya lexxanno darga wora mayira hoogittoyya? Higeemmo woyite lexxinoha adheemmohu baino› yiisi.

²⁴ Hakkunni gedensaanni mootichu hakkiicho uurrite noorira, ‹Woxe isiwiinni haadhine tonne minaane noohura uuyye› yii.

²⁵ Insano, ‹Mooticha, isira tonne minaane noosi› yitu.

²⁶ Mootichuno, ‹Kuleemmo'nena, noosihura lende uyinannisi; noosikkihuwiinni afi'rinonkanni haa'ne hoollanni.

²⁷ Insa gashshaancho ikkeemmota gibbinore hakkore baarigaarra'ya abbitine alba'yaanni shiiyye!› yiino» yiinsa.

YESUUSI LOWO AYIRRINYINNI YERUSAALAME EI

²⁸ Yesuusi konne coye coyi're gudihu gedensaanni, alba ikke Yerusaalamete widira hige ha'ri.

²⁹ Yesuusi, Ejedhete Ilaali mule nooriwa Beetefaagenna Biitaaniya iilla rahiti, rosaano giddonni lame,

³⁰ «Alba'neenni noo qacha marre! Hakka iillitinanni woyite, gulunfe egenninoonnikkita harrichote ilmatticho usurante noota affinannina tirtine abbe"e.

³¹ Ayino, ‹Mayira tirtinanni?› yee xa'mi'nero, ‹Mootichu hasi'ranno daafiraati› yiiyye» yee alba qole soyi.

³² Sonkoonniri martanno woyite baalunku coyi Yesuusi yiino gede ikke nooha affu.

³³ Ilmatticho tirtanna ayiddu afe, «Mayira tirtinanni?» yee xa'minsa.

³⁴ Insano, «Mootichaho hasiissanno» yite qoltu.

³⁵ Hakkiichinni ilmatticho Yesuusiwa haadhe abbitu. Uddanonsa ilmattichote badhera worte Yesuusi gulufanno gede assitu.

³⁶ Isi gulufe ha'ranni hee'reenna mannu uddanna abbe doogote aana kari.

³⁷ Yerusaalame iilla rahe, Ejedhete Ilaali eelallitte dirranni hee'reenna, hoodesi ha'ranni noo manni laino maalalenni hagiidhe lowo qoonqonni Magano galati.

³⁸ «Mootichu su'minni daanno moote maassaminoho. Keeru gordo, ayirrinyu aliidi gordo iillo!» yitu.

³⁹ Mannu mereero noo Farisooti giddonni gamu Yesuusa, «Rosiisaancho, rosaanokki sammi yitanno gede assi!» yitu.

⁴⁰ Yesuusi qole, «Kuleemmo'nena, insa nafa sammi yituro, kinna raartanno» yiinsa.

YESUUSI YERUSAALAMETE DAAFIRA WI'LI

⁴¹ Yesuusi Yerusaalame iille laihu gedensaanni katamu daafira wi'li.

⁴² «Techo keerikkira ikkannoha afoottaha ikkoommero woyyannohehu baino! Xa kayinni illekkinni go'lino.

⁴³ Diinnakki gaangaawakki huxxite qoqqobbe, raga baala fula ho'litannohe barri daanno.

⁴⁴ Atenna giddokki noota oosokki tugge cancantanno; Maganu towatahera dayi yanna diafoottana, diiggukkinni mitto kinchono diagurtanno» yii.

YESUUSI QULLAAWA MINE DADDA'LITANNORE FUSHSHE SHORRI

⁴⁵ Yesuusi Qullaawu Minira e"e, giddo dadda'litanni noore fushshe shorri.

⁴⁶ Insara qole, «Maganu, ‹Mini'ya huuccattote mineeti› yine borreessinoonni. Ki'ne kayinni mulqidhannori goda assitinoonni» yii.

⁴⁷ Yesuusi barru baala Qullaawa Mine rosiisi. Qeesootu roorrooti, Seeru rosiisaanonna gashshaano shitasira hasidhe no.

⁴⁸ Mannu baalu Isi coyi'rannore macciishshate roorae noo daafira, mittoreno assa didandiitino.