LUQAASI 17 - Qullaawa Maxaafa

CUBBO, AMMA'NONNA SOQQANSHO

¹ Yesuusi rosaanosira, «Manna sarraaqe cubbu giddo tugannori dayikkinni digatanno. Cubbu sarraaqo abbanno manchira kayinni aanne'e!

² Kuri shiimmaaddu giddonni mitto sarraaqankunni daamma haxote usudhe baaru giddo bairo woyyate.

³ Kunni coyinni umo'ne agadhe! Rodiikki ate aana sao assiro seejjisi. Aagintaawe higiro saosi agurisi.

⁴ Barrunni lamala hige ate aana sao asse, barrunni lamala hige atewa daye, ‹Sao'yara gaabboommona agurie› yiihero, saosi aguri» yii.

⁵ Soqqamaasineno Mooticha, «Eeggakkiitina Amma'na ledinke!» yitusi.

⁶ Mootichuno, «Shiimiidi gumi geeshshi amma'na heedhu'nero, tenne odakko, ‹Kawiinni buqqisante baaru giddo kaasami!› yitiniro, hajajantanno'ne» yiinsa.

⁷ Yesuusi lede, «Ki'ne giddonni mittoho gate loosannosihu woy saada allaalannosi soqqamaanchi hee'risiro, soqqamaanchisi loosuwiinni higanno yannara, hakkawoyintenni, ‹Amo ofolte sagale iti!› yaannohu ayeti?

⁸ Hatteentenni, ‹Amo sagale worie; itenna age ka"ammo geeshsha soqqamie; ati hakkunni gedensaanni itatto, agatto› diyaanno?

⁹ Soqqamaanchisi hajajinosire wonshino daafira mootichisi jajannosiha lawanno'ne?

¹⁰ Ki'neno hajanjoonni'nere hatto assitine wonshitinanni woyite, ‹Ninke tidhinoommokki soqqamaanooti; assa hasiissannonke daafiralla assinoommo› yiiyye» yii.

YESUUSI TONNE ANATAAMMA HURSI

¹¹ Yesuusi Yerusaalame ha'ranni, Samaariyunna Galiilu giddoonni hige sai.

¹² Mitto qacha iillanno yannara, tonnu anataammi isinni xaadde xeertidhe uurritu.

¹³ Qoonqonsa naggi assite, «Yesuusa, Biilonke ballo, eeggatena saonke agurinke!» yitanni raartu.

¹⁴ Yesuusi insa lae, «Hadhe! Biso'ne qeesootaho leellishidhe!» yiinsa. Insano hadhanni heedhe doogote dhibbinsanni keeraabbu.

¹⁵ Insa giddonni mittu dhibbisinni hurinota afi yannara, qoonqosi naggi asse Magano galatanni higi.

¹⁶ Yesuusano galatanni lekkasi hunda kumbuuli. Isi ilama Samaarichaho.

¹⁷ Yesuusino, «Dhibbunni keeraabburi tonne manna di"ikkino? Honsu hiikkituyya?

¹⁸ Konne manni gobba mancho agurranna Magano galatate galagale higinohu wolu mittuno dino?» yii.

¹⁹ Hakkunni gedensaanni Yesuusi hakkonne mancho, «Ka'e ha'ri; amma'nakki gatissinohena» yiisi.

MAGANU GASHSHOOTI DAA

²⁰ Farisootu Yesuusa, «Maganu Gashshooti mamoote daanno» yite xa'mitusi. Isi daware, «Maganu Gashshooti daannohu mannu jaate agadhanno garinni di"ikkino.

²¹ Qoleno, ‹Kuneeti kawiicho no. Woy hakkiicho no› yinanniha di"ikkino. Maganu Gashshooti kune mereero'ne no» yiinsa.

²² Yesuusi rosaanosira, «Manchi Beetti barruwa giddonni mitto barra la"ate halchitinanni yanna dagganno. Ikkollana dila'inanni.

²³ Mannu, ‹Kuneeti, Kiristoosi kawiicho no! Woy hakkiicho no!› yaanno'ne. Martinoonte; hoodensano hadhinoonte.

²⁴ Banqo gordu iima beleqqanno woyite, qaccetenni qaccete geeshsha xawissannonte gede, Manchi Beetti daanno barrano hatto ikkanno.

²⁵ Ikkollana, Manchi Beetti balaxe lowo qarra adhanna tenne ilamanni mishama hasiissannosi.

²⁶ Nohi yannara ikkinte gede, Manchi Beetti daanno yannarano hatto ikkanno.

²⁷ Nohi yowolo ei barri geeshsha, mannu itanninna aganni, adhanninna adhamanni no. Hatte yannara baote wayi daye wo'manka gudino.

²⁸ Looxi yannarano hatto ikkino. Hatte yannarano mannu itanninna aganni, hiranninna hidhanni, kaasi'ranninna mi'nanni no.

²⁹ Ikkollana, Looxi Soddooma agure fuli barra, gordunni giiranna ruqanu dirre wo'manka gudino.

³⁰ Manchi Beetti daanno barrano hatto ikkanno.

³¹ «Hakko barra minu iima noohu mininni uduunne adhara dirroonke. Gate loosi'ranni noohuno minira higoonke.

³² Looxi galtere qaagge!

³³ Lubbosi gatisi'rara hasi'rannohu hu'nanno. Lubbosi sayise aannohu kayinni gatisi'ranno.

³⁴ Kuleemmo'nena, hakko hashsha lamu manni mittu daallasi aana goxanno; insa giddonni mitto haa'neenna mittu gatanno.

³⁵ Lamu meenti mitteenni daaqqanno; mitte haa'neenna mitte gattanno.

³⁶ Lamu manchi mitto gate loosidhanno; mitto haa'neenna mittu gatanno» yii.

³⁷ Rosaanono Yesuusa, «Mooticha, hiikka haa'ne ha'nanninsa?» yite xa'mitusi. Yesuusi qole, «Reeshshu noowa doowiru gamba yaanno» yiinsa.