LUQAASI 15 - Qullaawa Maxaafa

BA'EENNA ANFOONNI GE'RECHO LAWISHSHA

¹ Mitto barra qaraxaasinenna cubbaataammu baalu yaannore macciishshitara ka'e Yesuusiwa daggu.

² Farisootunna Seeru rosiisaano, «Kuni manchi cubbaataamma baala gamba assi're insa ledo itanno» yite gunguntu.

³ Kunnira Yesuusi,

⁴ «Ki'ne giddonni xibbe ge'reewo afi'rino manchira mitte ge'recho baxxite ba'usiro ma assanno? Honsayina honse dubbu giddo agure mitticho ba'uta hasi'rara diha'ranno?

⁵ Afi'ranno woyite hagiidhe qoteho duqqe minira adhe daanno.

⁶ Minira iillanno woyite, jaallasinna olliisi manna mitteenni woshshe, ‹Ba'inota ge'recho'ya afi'roommona, amme hagiidhe"e!› yaanno.

⁷ Kuleemmo'nena, aagintaawa hasiissannonsakkiri honsayina honse keeraanonni roore, aagintaawe higannohu mittu cubbaataaminni kainohunni gordoho lowo hagiirre ikkanno» yee lawishsha kulinsa.

BA'EENNA ANFOONNI SAANTE LAWISHSHA

⁸ Yesuusi lede, «Tonne saante afidhino manchora mitte ba'usero ma assitanno? Caabbicho qasse mine fiite ba'ino saante afi'rate jaatanaabbe dihasidhanno?

⁹ Afidhanno woyite jaallasenna olliise manna mitteenni woshshite, ‹Ba'ue saante afi'roommana, amme hagiidhe"e!› yitanno.

¹⁰ Kuleemmo'nena, aagintaawe higannohu mittu cubbaataaminni kainohunni, gordoho Maganu sokkaasine hagiidhitanno» yii.

BAE LEELLINO BEETTO

¹¹ Yesuusi lede, «Mittu manchira lame ooso noosi.

¹² Maa'niidihu annasi, ‹Anna'ya, jirokki giddonni iillannoe qeecha beehie› yii. Annuno jirosi lamunku beettira beehi.

¹³ Shiimu barri gedensaanni, maa'niidi beetti iillinosire baala gamba assi're, fule xeerto gobba ha'ri. Hakko marinowa afi'rino woxe baala haafurira fince gudino.

¹⁴ Woxesi baala gudihu gedensaanni, hattenne hee'ranno gobbara wolqaataame hude ubbeenna qarrami.

¹⁵ Kunnira hatte gobbara hee'rannohuwa mittu manchiwa mare irki'ri. Manchuno manchaame allaalannosi gede soqqi.

¹⁶ Hudi're manchaame ittanno kura itara halchi. Aannosiha mittono diafi'rino.

¹⁷ «Hakkunni gedensaanni galfate, ‹Anni'ya mine soqqantanno faantooti, sagale itte duubbe gatisidhannori batinyeho. Ani kayinni konne hudetenni reyanni noommo.

¹⁸ Kae anni'yawa mare, «Anna'ya, atenna Maganu albaanni bushoommo.

¹⁹ Kunni ka'a ate beetto ikka dimaltinoe. Soqqamannohe manni giddo mittu gede assite kiirie» yeemmo› yii.

²⁰ Kunnira kae annisiwa ha'ri. «Annuno fafowa hee'reenna afe mararisi; dodanni mare beettosi hanqafe sunqisi.

²¹ Beettuno, ‹Anna'ya, atenna Maganu albaanni bushoommo. Kunni ka'a ate beetto ikka dimaltinoe› yii.

²² Annu kayinni soqqamaanosi woshshe, ‹Rakkine woyyaabbino uddano abbitine uddisiissesi. Qubbichisira cuuicho, lekkasirano koatte worresi.

²³ Hardino middichano abbitine gorre; intanni hagiidhineemmona.

²⁴ Kuni beetti'ya reyinohu kaino; bainohu leellino› yeenna hagiidhitu.

²⁵ «Hatte yannara bayiriidi beetti loosunniwa ha're no. Loosuwiinni kae daanni minira iilla rahe hee're, sirbunna godo'lete luulo macciishshi.

²⁶ Soqqamaanote giddonni mitto woshshe, ‹Kuni sirbunna godo'le mayinnite?› yee xa'mi.

²⁷ Soqqamaanchuno, ‹Rodiikki keerunni dayenna, annikki hardino middicha gorre, jila jileennaati› yiisi.

²⁸ «Bayiriidi beettino lowo geeshsha hanqe, minira ea giwi; annuno fule minira eanno gede huuccisi.

²⁹ Beettu kayinni, ‹Kageeshshi diro borojjimma soqqamoommohe; hajajokki mitteno dixeisoommo. Ikkollana jaalla'ya ledo hagiidheemmo gede wilii'licho nafa dioottoe.

³⁰ Kuni beettikki kayinni woxekki baala fooru meenti ledo fince gude galagale dayenna, hardino middicha gorroottosi› yee qoli.

³¹ Annuno, ‹Beetto'ya, ati wo'ma woyite ane ledo nootto. Ani afi'roommori baalu ateho.

³² Kuni rodiikki kayinni, reyinohu kaino; bainohu leellino. Kunnira, hagiidha hasiissannonke› yiinosi» yii.