LUQAASI 12 - Qullaawa Maxaafa

MEESSANAA ALE TUQQINANNIKKI GEDE UYINOONNI SEEJJO

¹ Kumunni kiirranni manni gamba yee mimmito cifanni hee'reenna Yesuusi balaxe rosaanosira, «Farisootu gamaancho agadhe!» yiinsa. (Hatto yaa insanaa ale tuqqitannore agadhe yaate.)

² Ledeno, «Dimboonnihu fa'namikkinni, maanxoonnihu anfikkinni digatanno.

³ Kunnira tunsote coyidhinoonnire barra xawoho macciishshinanni. Cunfoonni mini giddo hashaashantinoonnire, minu iimira giddine lallambanni» yii.

WAAJJINANNIHU MAGANO CALLAHO

⁴ Yesuusi, «Jaalla'ya ani kuleemmo'nena, maala shaa agurranna wolere assa dandiitannokkire waajjitinoonte!

⁵ Waajjitinanniha kuleemmo'nena, shiihu gedensaanni gaannaamete giirara tugate roorre afi'rinoha Magano waajje! Halaale kuleemmo'nena, iso waajje!

⁶ Onte gurrae lame saantera hirranni dihee'noonni? Maganu hakkuri giddonni mitticho nafa dihawanno.

⁷ Umi'ne dananchi baalu nafa kiirreenna no; kunnira, waajjitinoonte; ki'ne lowo gurraenni roortinanni» yii.

MANNU ALBAANNI KIRISTOOSIRE FARCI'RA

⁸ Yesuusi, «Kuleemmo'nena, mannu albaanni anere farci'rannohura, anino isire Maganu sokkaasine albaanni farci'reemmo.

⁹ Mannu albaanni, ‹Diegennoommosi› yaannoha, anino Maganu sokkaasine albaanni, ‹Diegennoommohe› yaannosi.

¹⁰ Manchi Beettira busha coyi'rannohu sao agurranni. Qullaawu Ayyaanira busha coyi'rannohu sao kayinni horonta diagurranni.

¹¹ Xaadu minira haadhe hadhu'nero gashshaanotenna roorrootu albira massitu'nero, ‹Ma dawarreemmo? Hiitto assine coyi'neemmo?› yitine yaaddinoonte.

¹² Yitinannire hatte yannara Qullaawu Ayyaani kulanno'ne» yii.

HAWANYA DUREESSA

¹³ Mannu giddonni mittu manchi Yesuusa, «Rosiisaancho, anninke uyinonke iqqa beehannoe gede rodii'yara kulisi» yiisi.

¹⁴ Yesuusi qole, «Koo mancho, ane ki'nera cimeessanna iqqa beeheemmoha asse worinoehu ayeti?» yiisi.

¹⁵ Qoleno wo'munkura, «Mannu heeshsho woxu batinyinni anfannita di"ikkitinona, hafuuraamma ikkitinoonte! Umo'ne agadhe!» yiinsa.

¹⁶ Hakkiinni aanche Yesuusi, «Jajja dancha gede fushshitanno baatto afi'rinohu mittu dureessu manchi no.

¹⁷ Isino wodanisinni, ‹Jajja'ya gamba assi're wodheemmo dargi dinoe. Ma asso?› yee hedi.

¹⁸ Kunnira, ‹Jajja wodheemmo gootara diige halashshi'reemmo. Gide'yanna jajja'ya hakko duu'neemmo.

¹⁹ Aneneera, lowo dirira ikkitannoti lowo jiro noohena, xaate fooliishshidhe ittanninna agganni hagiidhi yeemmo› yii.

²⁰ Maganu kayinni, ‹Koo hawanya, kunni hashshinni lubbokki atewiinni haa'nanni. Tini gamba assi'rootto jiro ayera ikkitanno?› yiisi.

²¹ Baattote aana jiro duu'ne, Maganu albaanni buxino manchi hattooho» yii.

MAGANO AMMANNE IKKINNINA YAADDINOONTE!

²² Hakkunni gedensaanni Yesuusi rosaanosira, «Kunnira ani kuleemmo'nena, ‹Ma inteemmo? Ma uddi'neemmo?› yitine heeshsho'nera yaaddinoonte!

²³ Sagaletenni lubbo roorete; uddanotenni mannimma roorete.

²⁴ Hanni haraqeeyye la'e; diwixidhanno; dimixxitanno; gide duu'nitannowi woy gootaru dinonsa. Maganu itisannonsa. Ki'ne, ceatenni lowo geeshsha diroortinanni?

²⁵ Ki'ne giddonni, yaade hojjasi aana mitte cigile lexxa dandaannohu nooni?

²⁶ Konne shiima coye nafa assa dandiitinoonnikkiri, wolu coyira mayira yaaddinanni?

²⁷ Xawu daraaro hiitto ikkite lophitannoro la'e! Insa diloosidhanno; disuqqidhanno. Kuleemmo'nena, Selemooni nafa hakkuyi baalu ayirrinyisinni, tenne daraaro giddonni mittichu geeshsha biifado uddano diuddi'rino.

²⁸ Techo leelte ga'a giirante ba'anno hayisso uddisiisanno Magani, ki'ne hiitto roore uddisiisa hooganno'ne? Ki'nera ammana ajjino'ne!

²⁹ «Kunnira, ‹Ma inteemmo? Ma angeemmo?› yitine yaaddinoonte.

³⁰ Konne coye afi'rate goxxukkinni galtannori Magano egentinokki dagaati. Ki'nera kayinni kuni baalu hasiisanno'neta Anni'ne egennino.

³¹ Balaxxine Isi gashshoote hasidhe; kuni coyi baalu ledamanno'ne.

GORDU JIRO

³² «Ki'ne shiima hoshsha, Anni'ne gashshootesi aa'nera hasi'rinona waajjitinoonte.

³³ Noo'nere baala hirtine buxanete uuyye! Akkalannokki ogoro seekkidhine, mooraanchu iillannokkiwa, daanillu qasannokkiwanna goofannokkiwa gordoho wodhe.

³⁴ Woxi'ne noowa, wodani'neno hakko galanno» yii.

DIINAGGAAMO SOQQAMAANCHO

³⁵ Yesuusi lede, «Hallo'ne qodhitine, caabbicho'ne xawisidhine qixxaabbine agadhe!

³⁶ Adhamate jiliwiinni daannoha mootichansa agadhite noore labbe. Hakkuri, mootichinsa hedeweelcho daye ciratanno woyite rakke cufana fanate qixxaabbinoreeti.

³⁷ Mootichinsa daanno woyite, baqqi yite agarte heedheenna afannonsari ba'raadhinoreeti. Halaale yeemmo'nena, hallo qodhe, insano sagale intanniwa ofoltanno gede asse kae soqqamannonsa.

³⁸ Mootichinsa hashshu taalo woy soodimaroho goxxukkinni agadhite heedheenna daye afannonsari, ba'raadhinoreeti.

³⁹ Mitto coye afa hasiissanno'ne: Minu anni mooraanchu daanno yanna afoommero, mooraanchu minesi fane eara wore diaguranno.

⁴⁰ Manchi Beetti, heddinoonnikki yannara hedeweelcho daannona, ki'neno qixxaabbine agadhe» yii.

AMMANAMINOHANNA AMMANAMINOKKI SOQQAMAANCHO

⁴¹ Pheexiroosino, «Mooticha, tenne masalo ninkeralla kultanni noottonso wo'munkuraati?» yee xa'mi.

⁴² Mootichu qole, «Sagale yannatenni aannonsa gede, mootichisi minisi manni baalaho annimma aannosihu, egennaamunna ammanamino soqqamaanchi ayeti?

⁴³ Hatto assanni hee'reenna mootichisi daye afannosi soqqamaanchi ba'raa'rinoho.

⁴⁴ Halaale kuleemmo'nena, mootichu jajjisi baalunku annimma, hakko soqqamaanchira aannosi.

⁴⁵ Hakku soqqamaanchi kayinni, ‹Mootichi'ya rahe didaanno› yee hede, meyaanna labbaa soqqamaano gananni, aganni, itanni, dimba hanafiro,

⁴⁶ Mootichisi hedeweelcho barranna agadhinokki yannara daye mure lamewa fushshe, ammantinokkiri ledo gaamannosi.

⁴⁷ Mootichisi hedo afanni hee'renni agadhinokkihunna hajajosi wonshinokki soqqamaanchi lowo geeshsha qorichishamanno.

⁴⁸ Ikkollana, mootichisi hedo afa hoogatenni qoricha abbanno coye assiro, shiima geeshsha calla qorichishamanno. Lowoha uyinoonnihuwiinni lowore agadhinanni; lowore eeggo uyinoonniha loworira hexxinanni» yee rosiisinsa.

MANNU MEREERO KA"ANNO BABBADOOSHSHE

⁴⁹ Yesuusi lede, «Ani baattote aana giira qasammora dayommo. Giirano rakke bubboommero halcho'yaati.

⁵⁰ Ikkollana, anera cuuama agarte nooe; ise sa'a geeshsha ani yaaddote giddo noommo.

⁵¹ Ani baattote aanira keere haa're dayommoha lawanno'ne? Dee'ni, kuleemmo'nena, babbadama haa're dayommo.

⁵² Kunni ka'a, mitto mine noohu ontu manni mimmituwiinni babbaxxe, sasu lamu aana, lamu sasu aana ka'anno.

⁵³ Annu beettu aana, beettu annu aana, ama beettote aana, beetto amate aana, ballo beettise galte aana, beettu galte ballose aana ka'e babbaxxitanno» yii.

YANNA EGENNA

⁵⁴ Yesuusi qole mannaho, «Soojjaatoonni gomicho affinanni woyite, ‹Techo xeena ganaraati› yitinanni. Yitinoonni gedeno ikkanno.

⁵⁵ Wodiidoonni bubbisanno woyite, ‹Techo arrishshanno› yitinanni. Hattono ikkanno.

⁵⁶ Ki'ne lawisiisaano, gordunna baattote dana la'ine ikkannore affinanni. Tenne yannara ikkannore baddine afa mayira hoogginiyya?» yii.

QAHU LEDO ARAARAMA

⁵⁷ Yesuusi lede, «Ki'ne umi'ne affine halaalaancho yoo mayira diyitinanni?

⁵⁸ Qahikki ate ledo giwame yoote dargira haa're ha'rannahe doogote aana heedhineenna araaramate wo'naali. Hatto assa hoogittoro, qahikki yoo yaannohuwa goshooshe massannohe; yoo yaannohuno usurannohura sayise aannohe; usurannohuno masse usuru mine tugannohe.

⁵⁹ Kuleemmohena, karroonnihe erecco mitturino gatikkinni baaxxite gudittokkinni hakkiinni difulatto» yii.