LUQAASI 11 - Qullaawa Maxaafa

YESUUSI ROSAANOSIRA HUUCCATTO ROSIISI

¹ Yesuusi mitte hige mitto darga huuccatto assi'ri. Huuccatto gudita rosaanote giddonni mittichu, «Mooticha, Yohaannisi rosaanosira rosiisinte gede, ninkerano huuccatto rosiisinke» yii.

² Yesuusi qole, huuccidhinanni woyite, « ‹Annanke gordoho hee'rattohu, su'mikki qullaawa ikko. Gashshootikki dayo;

³ techo barrita sagalenke uyinke.

⁴ Wolootu sao agurreemmonte gede, ninke saono agurinke; bushu coyiwiinni gatisinke ikkinnina, jifammeemmo gede assitootinke› yitine huuccidhe» yiinsa.

⁵ Rosaanosira lede, «Ki'ne giddonni mittu hashshu mereero jaalisi minira mare, ‹Jaala'ya ballo sase tima liqiissie.

⁶ Mittu jaali'ya xeertote gobbanni kae dayenna itisi'reemmore hoogoommo› yaanno.

⁷ Jaalisi qole, ‹Eeggatena qarrissootie; minu cufamino; ooso'yano daallasaho ledo'ya goxxe no. Kunnira kae sagale aammohera didandeemmo› yaannoni?

⁸ Jaaloomisi daafira yee kae aa hoogiro nafa, qarrisinosi daafira kae hasi'rannore baala aannosi.

⁹ «Anino, ‹Huuccidhe, uyinanni'nena. Hasidhe, afidhinannina. Waalcho ganganne fannanni'nena› yeemmo'ne.

¹⁰ Huucci'rannohu baalu adhanno. Hasi'rannohuno afi'ranno. Waalcho ganganannohura fannannisi.

¹¹ Ki'ne giddo anna ikke hee're, beettisi [tima huucci'reenna kincho aannohu nooni?] Qulxu'me huucci'reenna hamashsho aannosini?

¹² Woy quuphe huucci'reenna idda aannosini?

¹³ Ki'ne bushuulle ikkitine heedhinenni ooso'nera dancha coye aa egentinoonniha ikkiro, gordoho noohu Anni'ne huuccidhannosirira hakkiinni roorse Qullaawa Ayyaana hiitto aa hooganno?» yiinsa.

YESUUSINNA BIELIZEBUULI

¹⁴ Yesuusi mittu manchi giddonni danqicha durriisa fushshi. Durriisu fulita danqe keeshshino manchi coyi'ra hanafi. Mannuno konne coye lae dhaggeeffati.

¹⁵ Gamu manni kayinni, «Durriisa fushshinohu Durriisu roorrichi Bielizebuuli wolqanniiti» yitu.

¹⁶ Wolootu qolte fonqoltasira hedde gordunni mitto malaate aannonsa gede xa'mitusi.

¹⁷ Yesuusino hedonsa afino daafira, «Mimmitu ledo gosooma kalaqi'ranno gashshooti ba"anno. Babbadamanno ayiddino billaalle ba"anno.

¹⁸ Sheexaanu gashshootino babbaxxannoha ikkiro, hiitto ikke hee'ra dandaanno? Ki'ne, ‹Isi durriisa fushshannohu Bielizebuuli wolqanniiti› yitinanni.

¹⁹ Ani durriisa Bielizebuuli su'minni fushsheemmoha ikkiro, ki'ne hoode hadhannori hiitto assite fushshitannoyya? Kunnira ki'ne, hoode'ne hadhannori yoo yitanno'ne.

²⁰ Ani durriisa Maganu wolqanni fushsheemmoha ikkiro, kuni coyi Maganu Gashshooti ki'newa iillinota leellishanno.

²¹ «Wolqaataamu manchi bagadosi baala gamba assi're qaesi agadhiro jajjisi dieddaramanno.

²² Iso roorino jawaati daye gawajje qeelisiro kayinni, hexxinoha bagadosi adhanno. Qeele adhinoreno woleho beehanno.

²³ Ane ledoha ikkinokkihu baalu ane giwanno. Ane ledo xaadannokkihu billaallisi'ranno.

BATTETE AYYAANI GALAGALE MAYIRA HIGANNO

²⁴ «Battete ayyaani mannuwiinni fule fooliishshi'rannowa hasi'ranni, moola gobba ha'ranno; fooliishshi'rannowa hoogiro, ‹Galagale fulummo minira ha'reemmo› yaanno.

²⁵ Galagale daye mine feyame biifinoha afanno.

²⁶ Hakkunni gedensaanni ha're lamala isinni roore bushuulle durriissa adhe daanno. Insano dagge hakko heedhanno; manchohono gedensiidi heeshsho albitenni roore busha ikkitanno» yii.

HALAALAANCHO MAASSO

²⁷ Yesuusi konne coye coyi'rita, mannu giddonni mitte mancho qoonqose naggi assite, «Ate ilte qansidhu ama maassantinote» yitu.

²⁸ Yesuusi qole, «Maassantinori Maganu qaale macciishshite hajajantannoreeti» yii.

MAALALE LA"ATE HASI'RANNO MANNA

²⁹ Lowo manni gamba yeenna Yesuusi, «Tini busha ilamaati. Maalale leellinshansara hasidhanno; Yoonaasi maalale agurranna wole diuyinanninsa.

³⁰ Himanaanchu Yoonaasi Nennewe mannira malaate ikkinte gede, Manchi Beettino tenne yanna ilamara malaate ikkanno.

³¹ Yoote barra Wodiidi gobba Mootitte tenne ilama ledo ka'e insara yoo yitanno. Ise Selemooni hayyo macciishshitara gobbate qaccenni ka'e daggino. Selemooni rooru kayinni kawiicho no.

³² Yoote barra Nennewe gosa tenne ilama ledo ka'e insara yoo yitanno. Nennewe gosa Yoonaasi sokka macciishshitu woyite cubbonsa aagintaabbe higgino. Yoonaasi rooru kayinni kawiicho no» yii.

MANNIMMATE CAABBICHO

³³ Yesuusi lede, «Caabbicho xawisihu gedensaanni go'lino darga woy gimboolaho woroonni worannohu dino. Mannaho eanno woyite xawanno gede caabbicho worranni uduunnichi aana woranno.

³⁴ Illekki mannimmakki caabbichooti. Illekki fayyo ikkituro, mannimmakki baala xabbanno. Illekki fayya hoogguro kayinni, mannimmakki baala tunsitanno.

³⁵ Giddokki noo xawaabbi tunsannokki gede agadhi.

³⁶ Kunnira, mittu dargino tunsikkinni, bisikki gudisame xawaabba ikkiro, caabbichu xawannohe garinni manninatikki baalu wara'a yee xawanno» yaanni rosiisi.

YESUUSI FARISOOTANNA MUSE SEERI ROSIISAANO MISHI

³⁷ Yesuusi konne coye coyi'ranni hee'reenna mittu Farisichi ledosi sagale itanno gede koyisisi. Isino mare sagale itara ofolli.

³⁸ Farisichu Yesuusi itara albaanni anga hayishshi'rinokkita afe, dhaggeeffati.

³⁹ Kunnira Mootichu, «Ki'ne Farisootu finiinchohonna xilteho gobbayido seekkitinanni; giddo'ne kayinni xagarronna bunshe wo'mitino.

⁴⁰ Ki'ne gowwootu, gobbayido kalaqinohu giddoyidono dikalaqino?

⁴¹ Finiinchi'nenna xilti'ne giddo noore buxanete uuyye; hakkunni gedensaanni wo'munku coyi fayyaaleessa ikkanno'ne.

⁴² «Ki'ne Farisootaho aanne'e! Afuduudu, sunkurtunna shaanu giddonni tonnunni mitte anga uyitinanni; wole widoonni kayinni Maganu baxillenna halaale agurtinoonni. Hakkoreno agurtinikkinni konne coyeno agara hasiissanno'ne.

⁴³ Ki'ne Farisootaho aanne'e! Xaadu mine ayirrado darga ofolla baxxinanni. Dikkoteno keere haa'na'nera hasidhinanni.

⁴⁴ Mannu afikkinni aanaanni ha'rannota malaatu nookki waamma labbinanni daafira, ki'nera aanne'e» yiinsa.

⁴⁵ Seeru rosiisaano giddonni mittu Yesuusa, «Rosiisaancho, togo yaatto woyite ninkeno xontanniwe nootto» yii.

⁴⁶ Yesuusi qole, «Ki'ne Seeru rosiisaanora aanne'e! Mannaho dandiinannikki duha duhisiissinanni; ki'ne kayinni qubbichunni nafa dikissinanni.

⁴⁷ Himanaanote waammara madaada gantinannirira ki'nera aanne'e; insa shitinorino akaakka'neeti.

⁴⁸ Akaakka'ne shitino himanaano waamma seekka'nera, ki'neno hakkunni bushu loosinsara ledoreetinna naqaashshete.

⁴⁹ Kunnira Maganu hayyo, ‹Insawa himanaanonna soqqamaasine soyemmo. Insa giddonnino gama shitanno; gama gadadissanno.›

⁵⁰ Kalqe kalaqantuhunni kayise himanaanote mundee du'nantinohura,

⁵¹ Abeelinni kayisse kakkalote darginna Qullaawu Mini mereero shinihu Zakkaariyaasi geeshsha du'nantino mundeera, tini ilama xa'mantanno.

⁵² Ki'ne Seeru rosiisaanora aanne'e! Ki'ne egennote waalcho fannanniricho adhitine ho'litinoonni. Ki'neno die'inoonni; e'annoreno hooltinoonni» yii.

⁵³ Yesuusi hakkiinni kae ha'rita Farisootunna Seeru rosiisaano iso qussitanni baca coye coyi'ranno gede assitusi;

⁵⁴ hatto assitinohuno, coyinni sarraaqqe amaddasira hasidheeti.