LEEWAAWOOTA 26 - Qullaawa Maxaafa

HAJAJAMATENNI AFI'NANNI MAASSO

¹ Kaaliiqi, «Magansi'rate kaphu maganna, misile woy kalaqamunnita, boncoonnita woy boncoonnikki kinna magansi'rate uurrisidhinoonte. Ani Kaaliiqi Magano'neeti.

² Fooliishshote Barruwa agarre; Qullaawa Mine'ya ayirrisse. Ani Kaaliiqaati.

³ «Woga'ya garinni heedhiniro, hajajo'yano seekkitine agadhitiniro,

⁴ xeena yannatenni eemmo'ne; baatto gide fushshitanno'ne; haqqeno laalo uyitanno'ne.

⁵ Gide ga'nitinanni heedhineennanni, woyinete laalo gudhitinanni yanna iillitanno; woyinete laalono gudhitinanni heedhineennanni, gide gamba assidhinanni yanna iillitanno; sagale duubbina geeshsha ittinanni; baatto'ne aana harshammi yitine heedhinanni.

⁶ «Baattote keere eemmo; waajjishannori nookkiha goxxine galtinanni; busha moyicho baattote aaninni hooleemmo; baatto'nera olu dika"anno.

⁷ Diinna'ne shorritinanni; bagadunni guddinanni.

⁸ Ki'nehu 5 manchi insaha 100 manna, ki'nehu 100 manchi insaha 10,000 manna shorranno; diinna'ne bagadunni guddinanni.

⁹ Alba'ya ki'newa qoleemmo; ilantinanninna batidhinanni gede asseemmo'ne; ledo'ne eoommo gondooro seekke agareemmo.

¹⁰ Niri gidi ittineenna gootarunni goofikkinni, haaro gide wodhitinara albiha fushshitine huntinanni.

¹¹ Ki'ne mereero galeemmo; badheno diwodheemmo'ne.

¹² Mereero'ne hee'reemmo; Magano'ne ikkeemmo; ki'neno manna'ya ikkitinanni.

¹³ Gibitsootaho borojje ikkitinannikki gede Gibitsete gobbanni fushshoommo'nehu ani Kaaliiqi Magano'neeti; borojjimma'ne qambara hiiqqe, gotti yitine hadhinanni gede assoommo'ne» yii.

HAJAJAMA GIWATENNI DAANNO QORICHA

¹⁴ Kaaliiqi qole, «Yoommota macciishshanna tenne hajajono agadha gibbiniro,

¹⁵ woga'ya mishshiniro, seera'ya shotissinironna hajajo'ya baalantanni wonsha giwatenni gondooro'ya diigginiro kayinni,

¹⁶ anino hedeweelcho masille, ille hunannohanna manninate maniissannoha fooggashshannohanna shetisanno dhibba abbeemmo'ne; gide beebballa wixidhinannina loosidhinoonniha diini'ne itanno.

¹⁷ Diinna'ne qeeltanno'ne gede badhe wodheemmo'ne; gibbinanniti diinna'ne gashshitanno'ne; waajjitinoonni daafira, shorrini'nekkinni xooqqinanni.

¹⁸ «Hakkunni gedensaanni hajajama gibbiniero, 7 ero lede qorichisheemmo'ne;

¹⁹ boo'na'ne qiisseemmo; iimaanni noo gordo siwiilu gedeeha, baatto'ne camote gedeeta asseemmo.

²⁰ Wolqa'ne beebba gooffanno; baatto gide, haqqeno laalo diuyitanno'ne.

²¹ «Higginannikkihanna hajajantinannikkiha ikkiro, cubbi'ne deerrinni 7 ero lede qorichisheemmo'ne.

²² Dubbu moyicho soyenna ooso'ne itanno; saada'neno gudanno; kiiro'ne ajjanno; doogga'neno ontanno.

²³ «Tenne giddoonni anewa higanna mokkookka agura gibbiniro kayinni,

²⁴ anino diina ikkeemmo'ne; cubbi'ne daafira, 7 ero lede albinni roore qorichisheemmo'ne.

²⁵ Ledo'ne eoommo gondooro diigginoonni daafira, ki'ne rabbisate bagado soyemmo; katamma'nera maaxamate gamba yitinanni yannara, dhibba soyemmo'ne; diinu angara sa'ine aamantinanni gede asseemmo'ne.

²⁶ Ittinannire hoogginanni gede asseemmo'ne yannara, 10 meenti 1 mixashshora raisi'ranno; sagaleno keenaasinchunni keentine ittinanni; ikkeennano diduubbinanni.

²⁷ «Tenne giddoonni higanna hajajama gibbiniero,

²⁸ anino hanqi'yanni dayemmo'ne; cubbi'ne daafira, ani umi'ya 7 ero lede qorichisheemmo'ne.

²⁹ Hudete batinyinni kainohunni, ooso'ne maala ittinanni.

³⁰ Gaarunnita kumbuultinanni baseno diigeemmo; hixaana giidhitinanni uduunne huneemmo; reeshsha'neno hiiqqaqqantino maganna'ne aana tugeemmo; ki'neno tiyyi're giweemmo'ne.

³¹ Katamma'ne diigeemmo; magansidhinanni darguwa ona asseemmo; su'niitannota kakkalo'neno diadheemmo.

³² Dagge amaddara agarte nooti diinna'ne nafa massa geeshsha, baatto'ne mulla asseemmo;

³³ dagate mereero billaalliseemmo'ne; bise'ya fushshe shorreemmo'ne. Baatto'ne mulla darga ikkitanno; katamma'neno diigante gattanno.

³⁴ Baatto mulla ikkitanno yannaranna ki'neno diini'ne gobbara heedhinanni yannara, baatto addita fooliishshote dirra assidhe hagiidhitanno.

³⁵ Baatto mulla ikkitanno yannara, ki'ne heedhinoonni waro afidhinokkiha addiha fooliishshote diro afidhanno.

³⁶ «Ki'ne giddonni gatte diinna'ne gobbara heedhannorira masille soyemmonsa; milli yaanno darchi dammassannonsa; shorrannonsahu nookkiha bagado xooqqannori gede ikkite xooqqanni ubbanno.

³⁷ Shorrannohu nookkiha bagado xooqqannori gede insa insanaawa sarraaqantanno; diinnansa albaannino uurrite diaffanno.

³⁸ Dagate mereero gooffinanni; diinna'ne baattono egemmitanno'ne.

³⁹ Ki'ne giddonni gattinori, diinna'ne baattora uminsa cubbinninna annuwansa cubbinni jaabbe gooffanno.

⁴⁰ «Kayinni, anera ammanama hoogansanna haxawarrimmansa agurte, uminsahanna annuwansa cubbo aagintaabburo,

⁴¹ ani diina ikkeemmonsa gedenna diinnansa gobba qole shorreemmonsa gede assino cubbo aagintaabburo, umonsa heeshshi assituronna cubbinsara malino qoricha adhituro,

⁴² Yaiqoobi, Yisihaaqinna Abirihaami ledo eoommo gondooro qaageemmo; ki'ne manni'yara baatto aammora coyi'roommo qaale haaroonseemmo.

⁴³ Ikkollana kayinni balaxxe baatto insa agurte hadhino daafira mulla gattanno; insa nookki yannara mulla gatte addita fooliishshote dirra assidhe hagiidhitanno; seera'ya gibbino daafiranna woga'ya mishshino daafira cubbinsa qoricha adhitanno.

⁴⁴ Tenne giddoonni kayinni, ledonsa eoommo gondooro diige, diinnansa gobbara dicallachisheemmonsa; co'o yite ba'arano diagureemmonsa. Ani Kaaliiqi Maganonsaati.

⁴⁵ Insa daafira yee, Maganonsa ikkeemmo gede daga la'anna Gibitsete gobbanni fushshummonsa waro, annuwansa ledo eoommo gondooro qaageemmo. Ani Kaaliiqaati» yii.

⁴⁶ Kaaliiqi Israeelete mannira Siina Ilaali aana Muse widoonni qole uyino woga, seerinna hajajo tenneeti.